ڕاگەیەندراوێك لە زانكۆی سلێمانیەوە



ڕاگەیەندراوێك لە زانكۆی سلێمانیەوە

 kosar othman(kosar.amin@univsul.edu.iq)

شەوی دووشەممە بەرواری2017/1/9 كەناڵی رووداو لە بەرنامەی (رووداوی ئەمرۆ) كە پێش ماوەیەك لەمەو پێش تۆمار كرابوو كۆمەڵێك مامۆستای بەناوی ناڕازی لە بەرنامەكەیدا كۆكردبووەوە بۆ باسكردنی بایكۆتی دەوام، لە كاتێكدا لە سەرجەم كۆلێژەكانی زانكۆی سلێمانی بە فەرمی دەوام دەستیپێكردووە،  زانكۆی سلێمانی بە پێویستی دەزانێت روونكردنەوەی لەمبارەیەوە بڵاوبكاتەوە:

ئەم بەرنامەیەی كەناڵی رووداو لە كاتێكادایە كە پرۆسەی خوێندن لە زانكۆی سلێمانی لە سەرەتای مانگی 11 ەوە لە گشت سكۆل و كۆلێژەكان دەست پێكردووە،  لە سۆنگەی باوەڕبوونمان بە ئازادی ڕادەربڕین و  ئازادی ڕەهایی میدیای باشترین و جوانترین هۆڵی زانكۆمان بۆ تەرخانكردبوون بۆ پێشكەشكردنی بەرنامەكەیان، بەڵام بەداخەوە كەناڵی رووداو دوور لەئێتیك و بەرپرسیارێتی كاری میدیای و بەبێ‌ رەچاوكردنی دۆخی ئێستای هەرێمی كوردستان هەڵسەنگاندنێكی نارەوای بۆ زانكۆی سلێمانی كرد و ئەفسوس كۆمەڵێك مامۆستاش كەوتنە داوی ئەو  ئەجیندایەی كەناڵی رووداو كەبەرامبەر زانكۆكەمان ئەنجامیاندا، تیایدامامۆستایان كۆمەڵێك زانیاری ناڕاست و دروستیان   پێشكەش بە خەڵكی كوردستان كرد كە هیوادارین ئەو زانیارییانەی لە هۆڵەكانی خوێندن بۆ خوێندكاری زانكۆی باس دەكەن وەك ئەو زانیارییانە هەڵە نەبێت كە لەو بەرنامەیەدا باسیان كرد،چونكە هەموو خەڵكی كوردستان دەزانێت بۆ ساڵی خوێندنی پار بە هەموو ئەو كۆسپ  وتەگەرانەی هاتنە بەردەم پڕۆسەی خوێندن  توانرا بەردەوام بێت،دیارە ئەوەش بە هەوڵ وهیمەتی مامۆستایان و فەرمانبەران و خوێندكارانی خۆشەویست بووە .

لەو بەرنامەیەدا  نوێنەری مامۆستایانی زانكۆی سلێمانی بانگهێشتكرابوو بەڵام بەداخەوە بەهۆی ڕوداوێكی كتوپڕ نەیتوانی ئامادە بێت، بۆیە ئەو كەناڵە بەڕێزە ئەوەی بە هەل زانی بوو بۆ كۆكردنەوەی ئەو مامۆستایانەی كە خۆیان ناو ناوە ناڕازی لەكاتێكدا ئێمە وەك سەرۆكایەتی زانكۆی سلێمانی چەندین جار ئەوەمان دوپاتكرۆتەوە كە هەموو مامۆستایانی زانكۆ ناڕازین لەسیستمی پاشەكەوتی مووچەو دواكەوتنی، خۆزگە ئەو مامۆستا بەڕێزانەی  زانكۆی سلێمانی نەكەوتنایەتە ژێر كاریگەری سیاسەتی كەناڵێك كە چاویان بەوەدا هەڵنایەت زانكۆی سلێمانی لەو ئاستە بەرزەدا بێت و ئەجیندای كاری میدیایی كەناڵەكەش دەكەوێتە ژێر پرسیارەوە بەتایبەت بۆچی لە كاتێكدا بەرنامە لەبارەی پرۆسەی خوێندن و بایكۆتی مامۆستایان دەكات كە خوێندن لە زانكۆی سلێمانی لە دۆخی ئاسایی خۆیدایە و لە ناوەرۆكی بەرنامەكەش دا و چەند جارێك بە شێوەی پرسیاركردن هانی مامۆستایان و خوێندكارانی دەدات كە بەردەوام بن لە بایكۆت كردن ، یا خۆد پێدەچێت كەناڵەكە خاوەن دوو ئەجیندای جیاواز بێت لەم هەرێمەدا بەتایبەت دەتوانێت هەمان كار لەگەڵ زانكۆیەكی تر بكات؟ بۆیە زانكۆی سلێمانی بە مافی خۆی دەزانێت رێكار و رێ وشوێنی تایبەت بەرامبەر بەودەزگا ڕاگەیاندنانە بگرێتە بەر كە بەشێوەیەكی نارەوا لەدژی زانكۆی سلێمانی كاردەكەن.

زانكۆی سلێمانی تووشی زۆر هەورازو نشێو بوو لە مێژووی خۆیدا بەجۆرێك ڕژێمی بەعس هەر لەسەرەتای دروستبوونی دا چەندین گورزی كوشندەی لێدا بەڵام خۆڕاگربووە،چۆڵ كردنی زانكۆی سلێمانی لەساڵی 1974 و گواستنەوەی بۆ قەڵادزێ  نەیتوانی ڕەوڕەوەی ئەم زانكۆیە پەكبخات، هەروەها راگواستنی زانكۆ لەساڵی 1981 بۆ شاری هەولێریش نەیتوانی ئەم زانكۆیە لەپێشەنگ بخات بۆیە ئەم هەوڵە زۆر لەوانە بچوكترە وبەهیچ شێوەیەك هیچ كەناڵ و گروپێك ناتوانێت ناوبانگی لەكەدار بكات.

هەر بۆ وەبیر هێنانەوەی ئەو كەناڵەو ئەو مامۆستایەنەی لەو بەرنامەیەدا ئامادەبوون ئاشكرای دەكەین كەزانكۆی سلێمانی سەرمەشقی زانكۆكانی كوردستان بووە  بەپێی تازەترین ریزبەندی زانكۆكانی كوردستانلەسەر ئاستی جیهان بەپێی پێوەری OS  ی جیهانی بۆ ریزبەندی كردنی زانكۆكانی جیهان كەیەكێكە لەهەرە دەزگا بەناوبانگەكانی جیهان هەروەها لەسەر ئاستی وڵاتانی عەرەبی 57 مین و پێنجەمین زانكۆشە لەسەر ئاستی عیراق و یەكەمین زانكۆیە لەسەر ئاستی كوردستان.

لەكۆتایدا دەستخۆشی و سوپاسی خۆمان بۆ سەرجەم مامۆستایان و فەرمانبەران و خوێندكارانی زانكۆكەمان دوپاتدەكەینەو كە توانییان ئاڵای شەكاوەی زانكۆی سلێمانی بەرز ڕابگرن و نەیانهێشت ساڵی خوێندنی 2016-2017 لەزانكۆی سلێمانی پەكی بكەوێت.

 

راگەیاندنی زانكۆی سلێمانی

2017/1/10

 





 2017-01-10
 1777