بۆ یه‌كه‌مین جار له‌ كوردستاندا كۆنفرانسی بەراوردكاری زمانی كوردی و عەرەبی ئه‌نجامده‌درێت



بۆ یه‌كه‌مین جار له‌ كوردستاندا كۆنفرانسی بەراوردكاری زمانی كوردی و عەرەبی ئه‌نجامده‌درێت

 kosar othman(kosar.amin@univsul.edu.iq)

 بۆ یە كە مجار لەمێژووی هەرێمی كوردستان و عیراقدا، زانكۆی سلێمانی میوانداری یەكەمین كۆنفرانسی هاوبەشی هەرێمی كوردستان و عیراق ده‌كات كه‌ تایبه‌ت ده‌بێت به‌ به‌راوردكاری له‌ نێوان زمانی كوردی و عه‌ره‌بی. 

 بڕیارە 15 و 16ی ئه‌م مانگه‌، لە زانكۆی سلێمانی بۆ ماوەی دوو ڕۆژ هه‌ردوو (زانكۆى سلێمانى/ كۆلێژى زمان-به‌شى زمانى كوردى ) و (زانكۆى به‌غداد /كۆلێژى په‌روه‌رده‌ى ئیبن ڕوشد- به‌شى زمانى كوردى)، كۆنفڕانسى زانستى نێوده‌وڵه‌تى هاوبه‌شى نێوانیان به‌ ناونیشانى ( لێكۆڵینه‌وه‌ى به‌راوردكارى له‌ نێوان زمانى كوردى و زمانى عه‌ره‌بیدا"دراسات تقابلیه‌ بین اللغتین الكردیه‌ و العربیه‌") ساز بكه‌ن. 

پ.ی.د. كاروان عومەر قادر سەرۆكی بەشی كوردی لە كۆلێژی زمان زانكۆی سلێمانی، سه‌باره‌ت به‌ ئامانجی وتی "ئامانج لە م كۆنفرانسە بەهێزكردنی پەیوەندی نێوان توێژەران لە لایەك و پەیوەندی نێوان بەشە زانستییەكانی پەیوەست بە لێكۆڵینەوەی زمانەوانی و ئەدەبی لە هەردوو زمانی كوردی و زمانی عەرەبی لە لایەكی تر".

 ئاماژه‌ی به‌وه‌شكرد ئه‌م كۆنفرانسه‌ هه‌وڵێكه‌ بۆ درێژكردنەوە و بەردەوامیدان بە ڕەهەندی هاوكاری و پەیوەندی زانستی و ئەكادیمی لە نێوان توێژەران. هەروەها ده‌شیه‌وێت كاربكات بۆ بەكاربردنی ڕێبازی لێكۆڵینەوەی زمانەوانی بەراوردكاری و ئەدەبی بەراوردكاری بۆ مەبەستی فێركردنی زمانی كوردی و زمانی عەرەبی بۆ ئاخێوەرانی هەردوو زمانەكە و ئەو كەسانەش، كە وەك زمانی دووەم مەبەستییانە فێری ئەم دوو زمانە ببن.

ئه‌وه‌شیخسته‌ڕوو كه‌ یه‌كێكی دیكه‌ له‌ ئامانجه‌كان بریتییه‌  نواندن و خستنەڕووی جیاوازی و لێكچوونی فۆنۆلۆژی و مۆرفۆلۆژی و ڕستەسازی و واتاسازیی و پڕاگماتیكی لە نێوان هەردوو زمانی كوردی و زمانی عەرەبی".

به‌ پێی وته‌كانی د. كاروان ئامانجی كۆتایی برییته‌ له‌ بەشداری پێكردنی هەوڵ و لێكۆڵینەوەی زمانەوانی هەرێم و عێراق لە نێوەندە زانستی و ئەكادیمییە نێودەوڵەتییەكاندا بە سوود وەرگرتن لە ڕێبازی لێكۆڵینەوەی بەراوردكاری.

به‌ پێی كارنامه‌ی كۆنفرانسه‌كه‌، ئه‌مانه‌ی خواره‌وه‌ بریتین له‌ گرنگترین ته‌وه‌ره‌كانی كۆنفرانسه‌كه‌:- 

1.لێكۆڵینەوەی بەراوردكاری لە ئاستی دەنگسازی (فۆنەتیك و فۆنۆلۆژی) لە نیوان هەردوو زمانی كوردی و زمانی عەرەبی.

2.لێكۆڵینەوەی بەراوردكاری مۆرفۆلۆژی و ڕستەسازی لە نێوان هەردوو زمانی كوردی و زمانی عەرەبی.

3.لێكۆڵینەوەی بەراوردكاری واتاسازسی و پڕاگماتیكی لە نێوان هەردوو زمانی كوردی و زمانی عەرەبی.

4.لێكۆڵینەوەی بەراوردكاری لە سەر  كاریگەری و كاردانەوە لە نیوان هەردوو زمانی كوردی و زمانی عەرەبی.

5.گەشەدان بە هۆكارەكانی فێربوون و فێركردن لە نێوان هەردوو زمانی كوردی و زمانی عەرەبی.

6.لێكۆڵینەوەی بەراوردكاری وشەدانی و فەرهەنگی ئاوەزیی لە نێوان هەردوو زمانی كوردی و زمانی عەرەبی.

7.ئارێشە و گرفتی فرەزاراوەیی لە هەردوو زمانی كوردی و زمانی عەرەبی.

8.لێكۆڵینەوەی دەقی ئەدەبی، كە چ بە زمانی كوردی چ بە زمانی عەرەبی نوسراون.

 





 2018-07-09
 572