نەوەكانی موفتی پێنجوێنی سوپاسی زانكۆی سلێمانییان كرد



نەوەكانی موفتی پێنجوێنی  سوپاسی زانكۆی سلێمانییان كرد

 kosar othman(kosar.amin@univsul.edu.iq)

 ئەمڕۆ 8/28 نەوەكانی موفتی بە یاوەری زانا رەحمان قائیمقامی قەزای پێنجوێن و لیژنەی ڕێكخەرانی فێستیڤاڵی موفتی سەردانی زانكۆی سلێمانیان كردو لەلایەن سەرۆكی زانكۆی سلێمانی پڕۆفیسۆری یاریدەدەر دكتۆر رەزاحەسەن پێشوازییان لێكرا.

لەو سەردانەیاندا عەتا موفتی بە ناوی نەوەكانی موفتییەوە سوپاسی زانكۆی سلێمانییان كرد بۆ رێكخستنی ئەو كۆنفرانسە زانستییە كە بە كۆنفرانسێكی زۆر باش وەسفی كرد هیواشی خواست كە بەردەوام بن لە ڕێكخستنی ئەو كۆنفرانسانە.

پاشان پڕۆفیسۆری یاریدەدەر دكتۆر رەزا حەسەن سەرۆكی زانكۆی سلێمانی ووتی زانكۆ بە ئەركی خۆی زانیوە بایەخێكی تەواو بەو كەڵە پیاو  و رۆشنبیرانەی میلـلەتەكەمان بدات، كە هەوێنی هۆشیاركردنەوەی ئەم گەلە ستەمدیدەیەبوون، كە یەكێك لەو رۆشنبیرە  گەورانەی گەلەكەمان مامۆستا مەلا عەبدوڵڵای موفتییە كەلە سەرەتای سەدەی رابردوو تا ناوەڕاستی سەدەی بیستەم هەمیشە وەك چرایەكی رۆشن لەشەوەزەنگی ئەم نەتەوەیە بانگەواز دەكات بۆ هۆشیاركردنەوەی خەڵكی بۆ خوێندەواركردنی كۆمەڵگەو ناردنی منداڵانی كورد بۆ خوێندن و كردنەوەی خوێندنگاو داواكاری بۆ دابینكردنی خزمەتگوزاری، هەروەها وەك تێكۆشەرێكی بواری سەربەستی ئافرەت و یەكسانی نێوان ژن و پیاو كاری كردوە.

 وتیشی هیوادارم لەساڵانی ئایندە ئەم كۆنفرانسەو چەندین كۆنفرانسی زانستی گرنگ لەهەموو شارو شارۆچكەكانی كوردستان رێكبخەین، تا بتوانین لەم بۆنانەدا ئەو توێژینەوانە بخرینەڕوو گفتوگۆی زانستی و ئەكادیمی تێروتەسەلیان لەسەر بكرێت، بە ئامانجی برەودانی زیاتر بە كایەی رۆشنبیری و هونەری مەعریفی كوردی.

لەكۆتایشدا وەك ئەرك و ماندوبوونی زانكۆی سلێمانی نەوەكانی موفتی پۆرترێتێكی موفتی شاعیریان پێشكەشی زانكۆی سلێمانی كرد

جێی باسە لە ڕۆژانی (١٨-١٩-٨-٢٠١٨)، لە هۆڵی بۆنەکانی پێنجوێن و هۆڵی وەرزش و لاوان، بەدروشمی (موفتی شاعیری هۆشیاربونەوەو هەڵوێست)، كۆنفرانسی زانستی موفتی پێشكەشكرا كە تێیدا ٣٢ توێژینەوە پێشکەشکران، کۆنفڕانسەکە بە هاوبەشیی زانکۆی سلێمانی و قائیمقامییەتی قەزای پێنجوێن بەڕێوەچوو.

 

 

 

 





 2018-08-28
 2120