یەكەمین كۆنفرانسی نێودەوڵەتی پەرەپێدانی تەلارسازی لەژێرناوی بەرەو تەلارسازییەكی خۆماڵی نوێ بەڕێوەچوو



یەكەمین كۆنفرانسی نێودەوڵەتی پەرەپێدانی تەلارسازی  لەژێرناوی بەرەو تەلارسازییەكی خۆماڵی نوێ بەڕێوەچوو

 zanyar.fatah@univsul.edu.iq

ئەمڕۆ  14-11-2018، بەچاودێری د. یوسف گۆران وەزیری خوێندنی باڵاو توێژنەوەی زانستی حكومەتی هەرێمی كوردستان و بەسەرپەرشتی هەریەك لە پرۆفیسۆری یاریدەدەر د. رەزا حەسن سەركی زانكۆی سلێمانی و د. ئالان فەرەیدون سەرۆكی زانكۆی پۆڵیتەكنیكی سلێمانی و بە ئامادەبوونی چەندین مامۆستاو پسپۆرو وەبەرهێن و كەسایەتی پسپۆڕی ناوخۆیی و بیانی، بە بۆنەی یوبیلی زێڕینی دامەزراندنی زانكۆی سلێمانی، لە نێوان زانكۆی سلێمانی و زانكۆی پۆلیتەكنیكی سلێمانی، یەكەمین كۆنفرانسی نێودەوڵەتی پەرەپێدانی تەلارسازی  لە ژێر ناونیشانی (بەرەو تەلارسازییەكی خۆماڵی نوێ)، لە هۆڵی گراند ملنیۆمی هۆتێل شاری جوان لە سلێمانی دەستی بەكارەكانی كرد.

سەرەتای كۆنفرانسەكە بە ساتێك وەستان بۆ گیانی پاكی شەهیدانی كوردستان دەستیپێكرد، دواتر وتاری بەخێرهێنان و دەستپێكردنی كۆنفرانس خوێندرایەوەو پاشان لەلایەن پرۆفیسۆری یاریدەدەر د. رەزا حەسەن حسێن سەرۆكی زانكۆی سلێمانی وتاری سەرۆكایەتی زانكۆی سلێمانی خوێندرایەوە، كە تێیدا وێڕای بەخێرهێنانی میوانەكان بۆ بەشداری لەكۆنفرانسەكە، سەرۆكی زانكۆ رایگەیاند: جێگەی شانازییە بۆ زانكۆی سلێمانی و شاری سلێمانی كە لە یادی دامەزراندنی شاری سلێمانیدا كۆنفرانسێكی زانستی لەبواری تەلارسازی رێكدەخات، كە گەشەو پێشكەوتنی وڵاتان بە گەشەی بواری تەلارسازی دەناسرێتەوە، شاری سلێمانیش هەرلە سەرەتای دروستبوونییەوە لە بواری شارستانی و تەلارسازیدا سیمایەكی زۆر گەشەكوردو شارستانی و پێشكەوتووی پێوە دیاربووەو مێژووی شارەكەش شایەتی ئەوە دەدات.
راشیگەیاند: راستە ئەركی سەرەكی ئەندازیاران نوێگەری و پێشخستنی بواری تەلارسازییە و داهێنانە لەوبوارەدا، هەمان كات ئەركێكی تری بواری تەلارسازی و ئەندازیاران پاراستنی تەلارە كۆن و مێژووییەكانە، هەروەها رووپێوكردنیان بەشێوەیەكی زانستی و هێشتنەوەیان و پاراستنیان لە لەناوچوون  .
وتیشی: رێكخستنی ئەم جۆرە كۆنفرانسانەش گرنگی تایبەتی هەیە بۆ گەشەپێدانی بواری تەلار سازی و ئەندازیاری لە وڵاتەكەماندا.
دواتر وتاری سەرۆكی زانكۆی پۆڵیتەكنیكی سلێمانی بەو بۆنەیەوە خوێندرایەوە و پاشان پانێڵەكانی یەكەم رۆژی كۆنفرانسەكە دەستیپێكرد.
 كۆنفرانسەكە دوو رۆژ بەردەوام دەبێت واتە رۆژانی 14و 15 -2018   .




 2018-11-14
 436