كێشەی بەشەناوخۆییەكانی زانكۆی سلێمانی بەتەواوی چارەسەركرا



كێشەی بەشەناوخۆییەكانی زانكۆی سلێمانی بەتەواوی چارەسەركرا

 zanyar.fatah@univsul.edu.iq

 سەرجەم كێشەی بەشەناوخۆییەكانی زانكۆی سلێمانی چارەسەركراوە، بەڕێوەبەری بەشەناوخۆییەكانی زانكۆی سلێمانی رایدەگەیەنێت: "سێ‌ كۆمپانیای پاككەرەوەو چاككەرەوە بەرپرسن و هەموو كەموكوڕییەكانمان چارەسەركردووە".

جەمال نەسرەدین، بەڕێوەبەری بەشەناوخۆییەكانی زانكۆی سلێمانی، راگەیاند: لەدوای ئەوەی تەندەر بۆ سێ‌ كۆمپانیا دەرچوو بۆ پاككردنەوەی بەشەناوخۆییەكان و چاككردنەوەی ئەو ئامێرانەی پێویستیان بە چاككردنەوە هەیە، لە رۆژی پێنجشەممەی رابردوەوە ئەو كۆمپانیایانە دەستبەكاربوون و ئێستا كاری بەشەناوخۆییەكانمان لە ئەستۆی ئەوانە".
 
وتیشی "وەك بەڵێنمان بە خوێندكارانی ئازیز دابوو كە تا رۆژی یەكشەممە 2-12-2018، سەرجەم كەموكوڕییەكانی بەشەناوخۆییەكانمان چارەسەركردووەو بەردەوامیش دەبین".
 
جەمال نەسرەدین، ئاماژەی بەوەشدا "سەرجەم خەڵات و ئاو و ئاوەڕۆ و گڵوپی سەرجەم بیناكانمان چاككردووە و هەموویانیشمان پاككردۆتەوە، هەروەها گەلی و زێرابەكانمان بەرداوە و ئەو بەشانەشمان گۆڕیوە كە پێویستی پێی هەبووە، ئێستا هەموو بیناكانی بەشەناوخۆییەكان ئامادەكراون بۆ خوێندكارانی خۆشەویست و هەموو بینایەكیش كارمەندێك بۆ دوو كارمەندی چاككەرەوەمان بۆ داناوە و پێویست بكات زیاتریشی دەكەین".
 
بەڕێوەبەری بەشەناوخۆییەكان، باسی لەوەشكرد "بەپێی ئەو گرێبەستەی زانكۆ  لەگەڵ كۆمپانیاكانی پاككەرەوە و چاككەرەوەی بەشەناوخۆییەكان كردووە، ئەگەر هەر كەمتەرخەمییەك بنوێنن ئەوا سزای داراییان دەدەین، ئەگەر هەر بەردەوامیش بوون بەپێی یاسا گرێبەستەكە هەڵدەوەشێنینەوە تەندەری تر رادەگەیەنین".
جەختیشی كردەوە "بەشەناوخۆییەكانمان بۆ خوێندكارانی ئازیز ئامادەكردووە، بۆ ئەوەی لە ئەمڕۆ شەممەوە بگەڕێنەوە بۆ شوێنەكانی خۆیان، چونكە لە سبەینێ‌ یەكشەممەوە دەوامی رەسمی هەیە لە زانكۆ".
 
سەبارەت بە كێشەی بوونی سەگ لەناو بەشەناوخۆییەكانی كەمپی نوێی زانكۆدا، جەمال نەسرەدین، وتی "بە سپاسەوە رێكخراوێكی ئاژەڵدۆستی سەرجەم سەگەكانیان لەگەڵ خۆیان بردووە و ئێستا هیچی لێنەماوە و ئێمەش تەلبەندەكانمان بەتەواوی چاككردۆتەوە بۆ ئەوەی هیچ سەگێك نەتوانێت بێنە ناو زانكۆوە".
 




 2018-12-02
 211