شاندێكی بەڕێوبەرایەتی شەهیدان سەردانی زانكۆی سلێمانی دەكەن



شاندێكی بەڕێوبەرایەتی شەهیدان سەردانی زانكۆی سلێمانی دەكەن

 shna.amin@univsul.edu.iq

پڕۆفیسۆری یاریدەدەر دكتۆر ڕەزا حەسەن سەرۆكی زانكۆی سلێمانی پێشوازی لە شاندێكی بەڕێوبەرایەتی گشتی كاروباری شەهیدان و ئەنفالكراوان/سلێمانی دەكات.

سەرلەبەیانی ئەمڕۆ2017/8/7 شاندێكی بەڕێوبەرایەتی گشتی كاروباری شەهیدان و ئەنفالكراوان كە پێكهاتبوون لە مەلا بەهادین محه‌مه‌د عەبدولڕەحمان بەڕێوەبەری گشتی كاروباری شەهیدان و ئەنفالكراوان و د.پەروین نوری عارف لێپرسراوی بەشی مێژووی زارەكی لە بەڕێوبەرایەتی شەهیدان سەردانی زانكۆی سلێمانیان كرد و لەلایەن د. ڕەزا حەسەن سەرۆكی زانكۆی سلێمانیەوە پێشوازییان لێكراو،  لە كۆبونەوەیەكدا وێڕای بەخێرهاتنیان چەند تەوەرێكی گرنك باسیان لێوەكرا.

لە كۆبونەوەكەدا بەڕێوبەری گشتی كاروباری شەهیدان و ئەنفالكراوان ووتی ئامانج لەم سەردانە بۆ قسەكردنە لەسەر ئەو بڕیارەی كە لە ئەنجومەنی وەزارەتی خوێندنی باڵا وتوێژینەوەی زانستییەوە دەرچووە لەسەر زیادكردنی وانەی جینۆساید بۆ قۆناغەكانی خوێندن لە زانكۆكانی هەرێمی كورستان و ئاماژەی بەوەشدا كە ئەوان وەك وەزارەت و بەڕێوبەرایەتی كاروباری شەهیدان دەتوانن هاوكارێكی باش بن لەو بوارەدا ئەویش بە یاریمەتیدانیان بۆ دانانی مەنهەجی خوێندن و وانەووتنەوە چونكە ئەوان خاوەنی مەنهەجێكی باش و ئەرشیفێكی دەوڵەمەندن لەو بوارەدا.

هەر لەو كۆبونەوەیەشدا د.پەروین نوری شارەزا لە بواری مێژووی زارەكی ئاماژەی بەوەدا و ووتی: پێویستە ئەو مەنهەجەی كەلە بواری جینۆساید دادەنرێت مەنهەجێكی گشتگيربێت بەجۆرێك هەرلەسەرەتای دروستبوونی حكومەتی عێراقییەوە زانیاری بدرێتە خوێندكاران لەگەڵ هەموو ئەو نەهامەتیانەی كەلە ژێر دەستی ئەو دەسەڵاتانە بەسەر گەلی عێراق بەگشتی و گەلی كورد بەتایبەتی هاتووە، پاشانیش باس لە هەموو ئەو كارەساتانە بكرێت كە بەسەر گەلانی دونیادا هاتووە و بەجینۆساید ناسێنراون وەك جینۆسایدی ئەرمەن و هۆلۆكۆست و پاشانیش جینۆسایدی هندییە سورەكان بۆ ئەوەی خوێندكاران بتوانن زانیاری تەواویان هەبێت لەم بوارەدا، لە بەرامبەریشدا سەرۆكی زانكۆی سلێمانی زۆر سوپاسی كردن و ووتی:  تا ئێستا كەموكوڕی زۆر هەیە لەم بوارەدا هەربۆیە ئەنجومەنی وەزارەتی خوێندنی باڵا و توێژینەوەی زانستی بەباشی زانی كە وانەیەك لەبواری جینۆسایددا بۆ قۆناغەكانی خوێندن زیادبكرێت بۆئەوەی كەنەوەكانی داهاتوو شارەزایی ئەوەبن كە میللەتی كورد لەسەر دەستی حكومەتەكان چی بەسەرهاتووە، دكتۆر ڕەزا حەسەن داواشی لێكردن كە لە ڕێگەی دروستكرنی لیژنەی هاوبەشەوە بتوانرێت مەنهەجێكی باشی خوێندن دابنرێت بۆ سەرجەم قۆناغەكانی خوێندن و وا لە خوێندكارانی  قۆناغی چوار بكرێت كە  توێژینەوە لە بواری جینۆسایددا بكەن ئەمە جگەلە خوێندی باڵا چونكە دەكرێت لە زانكۆی سلێمانی وەك ناوەندێكی ئەكادیمی لەسەرجەم  لایەنەكانی ئەم بوارەدا توێژینەوە بكرێت.





 2017-08-07
 401