سەرۆكایەتی زانكۆی سلێمانی ئیدانەی هەوڵی تیرۆركردنی د. كەمال ئەحمەد سەعید دەكات



سەرۆكایەتی زانكۆی سلێمانی ئیدانەی هەوڵی تیرۆركردنی د. كەمال ئەحمەد سەعید دەكات

 zanyar.fatah@univsul.edu.iq

سەرۆكایەتی زانكۆی سلێمانی لە بەیاننامەیەكدا وێڕای ئیدانەكردنی هەوڵی كوشتنی (د.كەمال ئەحمەد سەعید) پزیشكی نەشتەرگەری و مامۆستای كۆلێژی پزیشكی لە زانكۆی سلێمانی، داوا لە حكومەت و داواكاری گشتی دەكات لەسەر ئەم كارە توقێنەرانە بێنە دەنگ، ئەمەش دەقەكەیەتی :
بەیاننامە بەناوی سەرۆكایەتی و ئەنجومەنی زانكۆی سلێمانییەوە بە توندی هێرشكردنە سەر بەڕێز (د.كەمال ئەحمەد سەعید) پزیشكی نەشتەرگەری و مامۆستای زانكۆی سلێمانی مەحكوم و شەرمەزار دەكەین كە ئێوارەی ئەمڕۆ (دووشەممە 3ی 12ی 2018 لەڕێگەی چەكدارێكەو لە نۆرینگەی تایبەتی خۆی تەقەی لێكراو بە سەختی بریندار كرا. ئێمە لەكاتێكدا دڵگرانیی خۆمان رادەگەیەنین بە هەوڵی كوشتنی بەڕێز (د.كەمال ئەحمەد سەعید) مامۆستاو سەرۆكی لیژنەی بەرزكردنەوەی پلەی زانستی لەكۆلێژی پزیشكی زانكۆی سلێمانی، داوا لە هێزەكانی ئاسایش و پۆلیس و دەزگا ئەمنیەكان دەكەین بە زووترین كات تۆمەتبارانی ئەم كارە دزێوە دەستگیر بكەن. داواش لەحكومەت و داواكاری گشتی و لایەنە پەیوەندیدارەكان دەكەین، بە زووترین كات بێنە دەنگ و ئەم جۆرە كارە توقێنەرانەو هەموو ئەوانەی لەژێر هەر پەردەو بیانوویەكدا بێت دەیانەوێت شكۆی زانكۆ و مامۆستایانی بشكێنن و هانی توندوتیژی و گێرەشێوێنی بدەن ئیدانەو شەرمەزار بكەن، بەتایبەت كە ئەمە یەكەم جار نییە رووداوی لەو شێوەیە دووبارە دەبێتەوە. سەرۆكایەتی زانكۆی سلێمانی داوا لە وەزارەتی تەندروستی و بەڕێوەبەرایەتی گشتیی تەندروستی سلێمانی بۆ چارەسەی بەپەلەو پێویست بۆ بەرێز د.كەمال ئەحمەد سەعید مامۆستا كۆلێژی پزیشكی زانكۆی سلێمانی بكەن و درێغی نەكەن و ئامادەیی زانكۆی سلێمانیش دەردەبڕین بۆ هەر جۆرە هاوكارییەك بۆ ئەم مەبەستە.
پڕۆفیسۆری یاریدەدەر د.ڕەزا حەسەن
سەرۆكی زانكۆی سلێمانی
 
 




 2018-12-03
 322