زانكۆی سلێمانی و بەڕێوبەری پەروەردەی سلێمانی لەسەر سیستمی پەروەردە ۆرك شۆپێكی هاوبەشیان ڕێكخست



زانكۆی سلێمانی و بەڕێوبەری پەروەردەی سلێمانی لەسەر سیستمی پەروەردە ۆرك شۆپێكی هاوبەشیان ڕێكخست

 kosar othman(kosar.amin@univsul.edu.iq)

 لەژێر ناونیشانی (سیستەمی پرۆگرامەكانی خوێندن لەكۆلێجی پەروەردەی بنەڕەتیی و قۆناغی بنەڕەتیی لەبەڕێوبەرایەتی پەروەردە)،بەچاودێری بەڕێزان سەرۆكی زانكۆی سلێمانی و بەڕێوەبەری گشتی پەروەردەی سلێمانی،وۆركشوپی هاوبەشی بەڕێوبەرایەتی گشتی پەروەردەی سلێمانی و زانكۆی سلێمانی- كۆلێجی پەروەردەی بنەڕەت لە زانكۆی سلێمانی بەڕێوەچوو.

بە ئامادەبوونی پڕۆفیسۆری یاریدەدەر دكتۆر رەزا حەسەن سەرۆكی زانكۆی سلێمانی و یاریدەدەرانی سەرۆكی زانكۆو ئەندامانی ئەنجوومەنی زانكۆی سلێمانی و سەرۆكی ئەنجوومەنی پارێزگای سلێمانی و بەڕێوەبەری گشتی پەروەردەی سلێمانی مامۆستایانی زانكۆو پەروەردە بەرنامەكانی یەكەم ڕۆژی ورك شۆپەكە بەڕێوەچوو كە تێیدا سێ سیمینار لەسەر پرۆگرامەكانی خوێندن پێشكەشكران.

لەوتەیەكیدا سەرۆكی زانكۆی سلێمانی پڕۆفیسۆری یاریدەدەر دكتۆر رەزا حەسەن ووتی: ئەمڕۆ خۆمان بەخۆشحاڵ دەزانین كە لەبۆنەیەكی واگرنگدا و لەگەورەترین دامەزراوەی خوێندنی باڵادا بۆ گفتوگۆكردن لەسەر بابەتێكی زۆر چارەنوس ساز لەبواری پەروەردەو فێركردن و خوێندنی باڵادا كە ئەویش پرۆگرامی خوێندنە لەسەرجەم قۆناغەكانی خوێندندا كۆدەبینەوە.

باسی لەوەشكرد كەپێشتر سیستمی پەروەردەو فێركردن جوانترین سیستم بوون بەبەراورد بە وڵاتانی دراوسێ بەڵام لەئێستادا سیستمی پەروەردە لەسەرجەم قۆناغەكانی خوێندن ئەگەر پاشەكشەی نەكردبێت ئەوا نەیتوانیوە شانبەشانی وڵاتانی دەوروبەرو دنیا هەنگاو بنێت،هۆكارەكەشی ئەوەیە كە نەمان توانیوە هاوتەریب لەگەڵ پێشكەوتنی تەكنەلۆجیای دنیا پەروەردەو فێركردنی خۆمان بگونجێنین.

وتیشی دوای تەواوبوونی ئەم ۆرك شۆپە ئێمە لە سەرۆكایەتی زانكۆی سلێمانی و بەڕێوبەرایەتی پەروەردەكانی سلێمانی چاوەڕوانی سەرنج و پێشنیارەكانی ئێوەین،تا ئێمەش لەڕێگەی خۆمانەوە وەزارەتەكانی پەروەردەو خوێندنی باڵای لێ ئاگادار بكەینەوە لەساڵانی خوێندنی داهاتوودا بكەوێتە بواری جێبەجێكردنەوە.

جێی باسە ئەم ۆركشۆپە دوو ڕۆژ بەردەوام دەبێت به‌ سپۆنسه‌ری ڕیباز فاونده‌یشن ڕێكخرابوو" ئامانج لە كردنیشی ،هەماهەنگی لەنێوان كۆلێجی پەروەردەی بنەڕەتی و بەڕێوبەرایەتی گشتی پەروەردەی سلێمانییە لەبارەی پرۆگرامەكانی خوێندنی قۆناغی بنەڕەتی،هەروەها پێداچوونەوە بەسەر پرۆگرامەكانی خوێندنی كۆلێجی پەروەردەی بنەڕەتی بەشێوەیەك لەتواناییدا بێت پێویستییەكانی خوێندنی بنەڕەتی پڕبكاتەوە،جگە لەوەش داڕشتنەوەی پڕۆگرامەكانی خوێندن لەهەردوو قۆناغی زانكۆو بنەڕەتی بەشێوەیەك كە تەواوكەری یەكتربن.





 2019-07-07
 423