رێكخراوێكی ئەڵمانی چەند بەشێكی كۆلێجی كشتوكاڵ نۆژەندەكاتەوە



رێكخراوێكی ئەڵمانی چەند بەشێكی كۆلێجی كشتوكاڵ نۆژەندەكاتەوە

 zanyar.fatah@univsul.edu.iq

رێكخراوی "GIZ"ی ئەڵمانی، بینایەك و دوو دەواجنی كۆلێجی زانستە ئەندازیارییە كشتوكاڵییەكان نۆژەندەكاتەوەو زۆرینەی پێداویستییەكانیشی بۆ دابین دەكات.

لەماوەی رابردودا رێكخراوی "GIZ"ی ئەڵمانی ئامادەیی خۆی نیشاندا بۆ هاوكاریكردنی كۆلێجی كشتوكاڵی زانكۆی سلێمانی، راگرایەتی كۆلێج پێشنیاری بۆ كردن بینایەكی نێو بەشی زانستی ئاژەڵ و دوو دەواجنی هەمان بەش نۆژەن بكەنەوە.
رێكخراوە ئەڵمانییەكە، كە ساڵانێكە لە هەرێمی كوردستان كاردەكەن و چەندین كرێكاریان لە پرۆژەكانیاندا خستۆتە سەر كار، لە 17ی شوباتی 2019 دا دەستیان بە نۆژەنكردنەوە كرد لە كەمپی كۆلێجی زانستە ئەندازیارییە كشتوكاڵییەكان.
مەهدی عەبدوڵڵا ئەندازیاری سەرپەرشتیاری نۆژەنكردنەوەكە، دەڵێت "ئەو بینایەی كارمان تێدا دەكرد، سەرەتا وەك كەلاوەیەك وابوو، هیچی بەسەر هیچەوە نەبوو.. دوو دەواجنەكەیش بەكەڵكی هیچ نەدەهاتن".
لە پرۆژەی نۆژەنكردنەوەكەدا 40 كرێكارو شەش وەستا بەشدارییان كرد، كە رۆژانە هەشت كاتژمێر كاریان دەكرد.
ئەندازیاری سەرپەرشتیاری نۆژەنكردنەوەكە وتی "ئێمە لە رێكخراوی "GIZ" یەكێك لە ئامانجەكانمان ئەوەیە زۆرترین كەس بخەینە سەر كار، لەم چەند ساڵەی رابردوویشدا توانیومانە بەباشی ئەوە بكەین".
ئەو كرێكارانەی لەنۆژەنكردنەوەی بەشەكانی كۆلێجدا كاریان دەكرد، بە بەردەوامی هێلەكی كاركردن و كڵاوی خۆپاراستن و پێڵاوی گونجاویان لەپێدا بوو. مەهدی عەبدوڵڵا وتی "ئەمانە لە پرەنسیپە سەرەكییەكانی كاركردنی ئێمەن، بەلای ئێمەوە پاراستنی گیانی كرێكارەكان لەهەموو شت گرنگترە، پێویستە لە كوردستان ئەوە ببێتە كلتور".
لە 11ی نیساندا كارەكانی نۆژەنكردنەوەكە كۆتاییان هات، لە ئێستایشدا، بیناكە بۆ كاری ئیداری گونجاوە و هەموو پێداویستییەكانیشی بۆ دابین كراوە. دوو دەواجنەكەیش زۆربەی پێداویستییەكانی بۆ دابین كراوە و سیستمی ئاوخواردنەوەكەیشی تەواو بووە.

 





 2019-07-10
 240