بۆ ئەمساڵ بەشەناخۆییەكانی كەمپی ناوشار نۆژەندەكرێنەوە



بۆ ئەمساڵ بەشەناخۆییەكانی كەمپی ناوشار نۆژەندەكرێنەوە

 [email protected]

بۆ ئەمساڵی خوێندنی 2019-2020 و پێشوازیكردن لە خوێندكاران لە بەشە ناوخۆییەكان، زانكۆی سلێمانی هەڵساوە بە نۆژەنكردنەوەی چەند بەشێكی ناخۆیی لە كەمپی ناوشاری زانكۆی سلێمانی كە بەتایبەت ئەو كۆلێج و بەشانەی تێداماوە كە پزیشكین و بەهۆی نزیكییان لە نەخۆشخانەی فێركاری سلێمانی پێویستە خوێندكاران لەو شوێنەدا نیشتەجێبكرێن كە نزیك شوێنی خوێندن و هەمان كات راهێنانیشیانە، چونكە خوێندكارانی كۆلێج و بەشە پزیشكییەكان پێویستە بەردەوام لەگەڵ بەشێكی خوێندن راهێنانەكانیان لە نەخۆشخانەكاندا بێت، بەوهۆیەشەوە كۆلێج و بەشە پزیشیكییەكان لە كەمپی ناوشار (كەمپە كۆنەكە)، نیشتەجێدەكرێن.
بۆ ئەمساڵی خوێندیش سەرەڕای قەیرانی دارایی و كەمی بودجەی تەرخانكراو، سەرۆكایەتی زانكۆی سلێمانی بە هەوڵی جددی پرۆفیسۆری یاریدەدەر د. رەزا حەسەن سەرۆكی زانكۆو سەرجەم بەڕێوەبەرە دڵسۆزەكانی بەڕێوەبەرایەتی بەڕێوەبەرایەتییەكان، توانراوە چەند بەشێكی ناوخۆیی نۆژەن بكرێتەوەو ئامادە بكرێت بۆ ئەوەی لەگەڵ دەستپێكی ساڵی نوێی خوێندن تاڕاددەیەك كێشەی پاك و خاوێنی و خزمەتگوزارییەكانی بەشە ناوخۆییەكان چارەسەربن و بتوانرێت پێشوازی لە خوێندكاران بكرێت تێیاندا، بۆ ئەو مەبەستەش بەهیمەتی سەرۆكی زانكۆ و بەڕێوەبەرە دڵسۆزەكان توانراوە بەشی 4 و 5 ی بەشە ناوخۆییەكانی ناوشار كەناسراوە بە بەشەناوخۆییەكانی "ئیسكان"  ، نۆژەنبكرێتەوە.
 هەرچەند تائێستا كاركردن تێیاندا بەردەوامە، بەڵام بەپێی وتەی ئەندازیاران و سەرپەرشتیارانی، پرۆژەكە زیاتر لە 90%ی تەواوبووەو لە ئایندەیەكی زۆر نزیكدا ئامادە دەبێت بۆئەوەی پێشوازی لە خوێندكاران بكرێت .
 
 
لەو بارەیەوە عەبدوڵڵا قادر خدر بەڕێوەبەری ئەندازەو پڕۆژەكان لە زانكۆی سلێمانی رایگەیاند: لەسەر فەرمانی پرۆفیسۆری یاریدەدەر د. رەزا حەسەن سەرۆكی زانكۆ، دەستمان كردووە بە نۆژەنكردنەوەی چەند بەشێكی ناوخۆیی لە كەمپی كۆن، كە ئەوانیش بەشە ناوخۆییەكانی 4 و 5 كە لەئێستادا كارەكانی لە كۆتاییدایە.
 
 لیژنەی تایبەتمەند دەرخستەی پێویستی بۆ پڕۆژەكە كردووە
 وتیشی: وەك لیژنەكانی دەرخستە كە پێش دەستپێكردن بە كار دەرخستەیان ئامادەكردووە، ئەو بەشە ناوخۆییانە پێویستییان بە 250 ملیۆن دیاربووە بۆ نۆژەنكردنەوەیان، ئەویش بەپێی دەرخستەی لیژنەكان، بەڵام لای هەموومان ئاشكراو روونە، لە ئێستادا بەهۆی كەمی پارەو بودجەی پێویست ناتوانرێت ئەو بڕە پارەیە تەرخانبكرێت، بۆیەش بە راوێژو راگۆڕینەوەیەكی زۆرو بەرامبەر ئەو بڕە پارەیەی كە لەبەر دەستدایە، لەگەڵ سەرۆكی زانكۆی و لیژنە پەیوەندیدارەكان، بڕیاری ئەوەماندا لە كە شتە زۆر پێویستییەكانەوە دەستپێبكەین، بۆئەوەی هەرنەبێت بتوانین ئەو شتانەی زۆر پێویستین بۆ ئەو بەشە ناوخۆییانە دابینی بكەین، نەك هەمووی بەیەكجار، بۆ ئەوەش ئەوەی كە زۆر پێویستی یەكەم بێت نۆژەنكردنەوەی (ئاو و ئاوەڕۆكان و تەوالێت(WC) و حەمام و كارەبایی و هەندێك شوێنی سەقف و دیواری بیناكانە كە خۆی لە جبسم بۆردو بۆیەكردنەوەی دیوارەكان و پاككردنەوەو دووبارە جەلایی كردنەوەی كاشی زەویی بیناكان دەبینێتەوە، كە ئەمانە پێویستی یەكەم بوون بۆ بینای بەشە ناوخۆییەكان، چونكە هەموومان دەزانین ئەو بینایانە تەمەنیان زۆرە، لە هەمان كاتدا پێویستی زۆرمان پێی و بوونی خوێندكارێكی زۆر ناچارین دەبێت لە پێویستییە هەرە سەرەكییەكانەوە دەستپێبكەین.
 
 
بۆ نۆژەنكردنەوەی سەرجەم بیناكان پێویستمان بە بڕە پارەكی زۆر دەبێت 
 وتیشی: هەموومان دەزانین ئەو بینایانەی بەشەناوخۆییەكانی كەمپی كۆن تەمەنیان زۆرەو ماوەی چەند ساڵێكە وێرای چاككردنەوەی بەردەوام هەر كێشەیان بۆ دروستدەبێتەوە، لەبەر ئەوە ئەگەر بمانەوێت سەرجەمی بیناكان نۆژەن بكەینەوە بڕە پارەیەكی زۆری تێدەچێت، كە لە ئێستادا لەتوانای زانكۆماندا نییە، بۆیە بەو بڕە پارە كەمە دیاریكراوەی لەبەر دەستدایە ناچار دەبین كە شتە زۆر پێویستییەكان بكەین، خۆشبەختانە سەرۆكی زانكۆ زۆر هاوكارمانبووەو بەردەوام لە نزیكەوە سەردانی كردووین و پشتگیری كردووین.
 
 
 توانیومانە لە 90% ی كارەكانی نۆژەنكردنەوەی بەشەناوخۆیی 4 و 5 ی ئیسكان تەواو بكەین 
بەڕێوەبەری ئەندازەو پڕۆژەكان لە زانكۆی سلێمانی وتیشی: بەپێی دەرخستەی لیژنەی تایبەتمەند بۆ چاككرنەوەی شتە زۆر پێویستییەكان بە تەقدیری بڕی 90 ملیۆن دینارمان داناوە بۆ هەردوو بەشی ناخۆی 4 و 5 ، كە هەر بەشە ناوخۆییەك 45 ملیۆن دیناری بۆ دابین كراوە، كە بەخۆشحاڵییەوە سەرۆكایەتی زانكۆ وەك سولفەی یەكەمجاری دەستپێكردنی پڕۆژەكە بڕێكی بۆ دابین كردووین و بەڵێنیشیانداوە كە بەردەوامن لەگەڵمان.
 
 
لەبەر كەمی پارەی پێویست، كارمان لەسەر نۆژەنكردنەوەی شتە زۆر سەرەكی و پێویستییەكان كردووە
تەئكیدیشیكردەوە، ئەو بڕە پایە ناتوانرێت سەرجەمی پێویستییەكان دابین بكات، تەنها شتە زۆر سەرەكی و پێویستییەكان نەبێت، بۆیەش دەتوانین شتە زۆر پێویستییەكان بۆ بەشە ناوخۆییەكان بكەین، كە پێشتر باسمان كرد.
 
 
كاتێكی زۆر كەممان لەبەردەستدابووە
وتیشی: ئێمە لە دەستپێكردنی پڕۆژەكەوە كاتێكی زۆر كەممان لەبەردەستدابووە، كە هەندێك لە  رۆژەكان كەوتووەتە رۆژانی جەژنی قوربانی پیرۆزەوە، كە ئێمە بەردەوام كارمان كردووە، خۆشبەختانە توانیومانە كاری باشی تێدا بكەین و لەو ماوە زۆر كەمدا بەشێكی زۆری پڕۆژەكە تەواو بكەین و لەنزیكترین كاتدا بگەینە كۆتایی و ئامادەی بكەین، بۆ ئەوەی لەگەڵ دەستپێكی ساڵی نوێی خوێندن، خوێندكاران تێیدا نیشتەجێ بكرێن.
 
 
لۆدێكی زۆر لەسەر بەشە ناخۆییەكانی كەمپی ناو شار هەیە
جەمال نەسرەدین رەووف بەڕێوەبەری بەشە ناوخۆییەكانی كەمپی ناوشار (كەمپی كۆن) رایگەیاند: بۆ نیشتەجێكردنی خوێندكارانی دەرەوەی شار لە بەشەناوخۆییەكانمان، بەوەی كە هەیە ئەگەر بەپێی ستاندارد ئیش بكەین یاخود بە پێی ژمارەی خوێندكار، چونكە بۆ نیشتەجێكردنی خوێندكار لە بەشە ناوخۆییەكان ئەو دوو بابەتە زۆر كاریگەری هەیە بۆیە ئەگەر بە پێی ستاندارد ئیش بكەین پێویستە، بۆ هەر ژووێكی 20 مەتری لە 4 خوێندكار زیاتری تیانەبێت، بەڵام ئێمە بەهۆی بوونی لۆدێكی زۆر لەسەرمان بە تایبەت لە كەمپی كۆنی زانكۆ وازمان لە ستانداردەكە هێنا، لەبەر ئەوەی ئێمە زیاتر بەشە پزیشكییەكان لێرە دەمێننەوەو دەبێت شوێنی مانەوەیان لە شوێنی خوێندیان و نەخۆشخانەكانەوە نزیك بێت، چونكە ئەو بەشانە رۆژانە بەشێكی خوێندیان دەبێت سەردانی نەخۆشخانەكان بكەن، بۆیە تائێستا توانیومانە بەو توانا دیاریكراوەی كە هەمانە، سەرەڕای نەبوونی بودجەی پێویست، بەڵام توانیومانە خوێندكاران جێبكەینەوە كە بە پێی خواستی خۆیان لەو ژوورانەدا دەمێننەوە كە دەیانەوێت بەیەكەوەبن واتە نیشتەجێكردنی خوێندكار بەزۆر نییە لە ژورێكدا، بەڵكو خوێندكار بە خواستی خۆی لەگەڵ كامە لە خوێندكارانی هاوڕێی بیەوێت لەوێ دەمێنێتەوە نیشتەجێدەكرێت.
 
 
بەشێكی زۆری بەشە ناخۆییەكان نۆژەنكراونەتەوەو ئامادەكراون
جەمال نەسرەدین وتیشی: خۆشبەختانە بۆ ئەمساڵی خوێندن ئامادەكاری پێویست كراوەو بە هەوڵی سەرۆكی زانكۆو سەرەڕای نەبوونی پارەی پێویست توانراوە دەست بكرێت بە نۆژەنكردنەوەی بینای بەشە ناوخۆییەكان، كە ئەمە جێگەی دڵخۆشییەو ئەوەندەی ئێمە ئاگادارین، كاركردن لە بیناكان گەیشتووەتە كۆتایی و لە نزیكترین كاتدا ئامادەدەبن.
 
 سەرجەم پێداویستییەكان بۆ بەشەناوخۆییەكان دابین دەكرێت  
 راشیگەیاند: ئەوەی لەسەرو نیشتەجێكردن و جێكردنەوەی خوێندكار لە ئەستۆی ئێمەدایە، بریتییە لە دابینكردنی پێویستی وەك (قەرەوێڵەو تەباخ و سەلاجەو راخەرو هەندێك ئەساس)، كە پێویستی سەرەكی ژیانەو دەبێت لە بەشە ناوخۆییەكاندا دابین بكرێت، بۆیە ئێمە ئەو بابەتانەمان بەشێوەیەكی باش دابین كردووە، بەڵام بۆ بابەتی پێخەف، بەڕێوبەرایەتی تەندروستی و سەلامەتی زانكۆ هەیە، كە بۆ پاراستنی تەندروستی خوێندكاران بەهیچ شێوەیەك رێگانادات پێخەفی خوێندكارێك خوێندكارێكی تر بەكاری بهێنێت، لەبەر تێچوویەكی زۆریش لەسەرمان كە توانای دابینكردنی ئەو بڕە پارە زۆرەمان نییە، تا هەموو ساڵێك پێخەفی نوێ بۆ هەموو خوێندكارێك بكڕین، لەبەر ئەوە بە پێی رێنماییەكانی بەڕێوەبەرایەتی تەندروستی و سەلامەتی دەبێت، خوێندكار خۆی پێخەفی خۆی لەگەڵ خۆیدا بهێنێت و لەگەڵ خۆشیدا بیباتەوە بۆ ماڵەوەیان بەمەبەستی شتنی.
 
لەپلانی چوار ساڵەماندا داوای دروستكردنی چوار بینای نوێمان كردووە
 وتیشی: لە پلانی چوار ساڵەماندا داوامان كردووە چوار بینای پێج نهۆمی بۆ بەشە ناخۆییەكان دروستبكرێت، بۆ ئەوەی تا چەند ساڵێكی تر كێشەی نیشتەحێكردنی خوێندكارانمان نەمەێنێت، هەموومان دەزانین لە سنووری پارێزگای هەڵەبجەوە بیگرە تاكو دەگاتەوە پێنجوێن و بۆ قەڵادزییەو رانیەو تا كۆیەش، ئەم ناوچانە راستە بەشێكی زۆریان زانكۆی لێیە، بەڵام كۆلێجی پزیشكییان نییە، بۆ یە خوێندكارانی هەموو ئەو ناوچانە روو لە زانكۆی سلێمانی دەكەن، لەبەر ئەوەش لۆدێكی زۆر دەكەوێتە سەر زانكۆی سلێمانی .
 
 بۆ ساڵی ئایندە لە رێگەی سیتمێكی نوێوە خوێندكاران لە بەشەناوخۆییەكان وەردەگیرێن
بەڕێوەبەری بەشە ناوخۆییەكانی كەمپی ناوشار (كەمپی كۆن) ئاماژەی بەوەشدا، ئێمە بۆ ساڵی ئایندە سیستمێكی نوێ دەخەینەكار بۆ وەرگرتنی خوێندكاران لەبەشە ناخۆییەكان، كە سیستمەكە (online) ە، كە  لەرێگەی ئەو سیستمەوە خوێندكار دەتوانێت بەشی ناوخۆیی وەربگرێت، كە ئەوە بەشێكی زۆری كێشەو كەموكورتییەكان چارەسەر دەكات، كە ئەم سیستمە زۆر نوێیەو بۆیەكەمجارە لە زانكۆی سلێمانی پەیڕەو دەكرێت. 
 
      
 
 




 2019-09-07
 251