مەڵبەندی كوردۆلۆجی زانكۆی سلێمانی كتێبێك بۆ منداڵان چاپ دەكات



مەڵبەندی كوردۆلۆجی زانكۆی سلێمانی كتێبێك بۆ منداڵان چاپ دەكات

 [email protected]

تازەترین بەرهەمی پڕۆفیسۆر د.ئیبراهیم محەمەد جەزا لە بەشی جیۆلۆجی  پەڕتووكێكی بواری زەویناسییە كەبەتایبەت بۆ منداڵان نووسیویەتی. نووسەر لە پێشەكی كتێبەكەدا دەنووسێت:" چەندین ساڵە سەرقاڵی نووسینی پەڕتووكی زەویناسیم بەزمانی كوردی بۆ گەورەكان و بەتایبەتی بۆخوێندكارانی زانكۆ، كە هیوادارم ئەو چەند كتێبەی بەندە سوودی هەبووبێت و كتێبخانەی كوردی دەوڵەمەندتركردبێت. گومانیشم نییە كە كارەكانم بێ كەموكوڕیی نییە و هەوڵدەدەم لە چاپەكانی داهاتوودا هەركەمییەك هەبێت چاكیان بكەم. بەبیرمدا هات بۆچی كتێبێكی زەویناسی بۆمنداڵان نەنووسم؟ سەیرم كرد لەوبابەتەمان لە كتێبخانەی كوردیدا نییە و زەویناسیش زانستێكە لە ئێستادا لەزانكۆكانی كوردستان جێگەی خۆی كردۆتەوە و وڕۆڵی تایبەتی هەیە لە تێگەیشتنی باری جیۆلۆجی كوردستان... بەهەرحاڵ دەستم كرد بەنووسینی ئەم كتێبە بۆمنداڵانی كورد، ئەزانن بۆماوەیەك ڕامام و نەمدەزانی چۆن دەستپێبكەم! تائێستا نووسینەكانم بۆ گەورەكان بووە، لەوانەیە بابەتەكان لەڕووی زانستییەوە پێشكەتوو بووبێت بەڵام بۆ من ئاسانتر بوو وەك لەدەستپێكردن بە نووسین بۆ منداڵان،  بۆیە ئاسان نییە نووسین بۆ كەسانێك كە لەقۆناغی خوێندنی بنەڕەتیدابن، دەبێت ئەو بابەتە وا یلێبكرێت كە ساكارو ئاسان بێت و لەهەمانكاتدا بابەتە زانستییەكەش زیانی پێ نەگات."  ئاشكرایە نووسین بۆ منداڵ پێویستە كورت بێت و ساكار بێت و وشەكان بڵاوبن و نابێت وردەكاری باس بكرێت و تا بتوانیت وێنەی ڕەنگاو ڕەنگ بەكاربهێنیت، نووسەر لەم ؛تێبەدا هەوڵی تەواوی دووە كە ئەوبنەمایانە پەیڕەوبكات. هیوادارین منداڵە چاوگەشەكانی كورد سوود لەم كتێبەوەربگرن و جێگەی خۆی لەناو منداڵاندا بكاتەوە و كتێبخانەی كوردیش دەوڵەمەندتر بكات . نووسەر دەنووسێت:"  بەباشم زانی كە لە ئێستادا كتێبەكە قەبارەیەكی بچووكی هەبێت و پاش بڵاوبوونەوە و وەرگرتنی بیر و ڕای منداڵانی كوردستان ئەگەر كاردانەوەی خوێنەران باش بوو، ئەوە دەكرێت بۆ چاپەكانی داهاتوو پڕۆژەكە گەورە بكرێت و زانیاری زۆر زیاتر لەخۆبگرێت". بە سوپاسەوە مەڵبەندی كوردۆلۆجی  زانكۆی سلێمانی  ئەركی چاپكردنی ئەم كتێبەی لە ئەستۆگرت.

 





 2019-09-15
 494