بەدروشمی شكۆی ژن، شكۆی ئاشتی و پێكەوە ژیانە سەنتەری یەكسانی جێندەری زانكۆی سلێمانی و یەكێتی ژنان پانێڵێكیان ڕێكخست



بەدروشمی  شكۆی ژن، شكۆی ئاشتی و پێكەوە ژیانە سەنتەری یەكسانی جێندەری زانكۆی سلێمانی و یەكێتی ژنان پانێڵێكیان ڕێكخست

 [email protected]

لەچوارچێوەی چالاكییەكانی شانزە ڕۆژی هەڵمەتی بەرەنگاربوونەوەی توندوتیژی دژی ژنان، ئەمڕۆ 8-12-2019، سەنتەری یەكسانی جێندەری زانكۆی سلێمانی و یەكێتی ژنانی كوردستان، لە هۆڵی كۆنفرانسەكانی كۆلێجی كارگێڕی و ئابوری زانكۆی سلێمانی، پانێڵێكی هاوبەشیان لە ژێر ناونیشانی (شكۆی ژن، شكۆی ئاشتی و پێكەوە ژیانە)، ڕێكخست.
سەرەتای پانێڵەكەش بەساتێك وەستان بۆ رۆحی پاكی شەهیدانی كوردستان دەستیپێكرد، پاشان چەند كورتە فیلمێك نمایشكرا، كە گوزارشت بوو لە توندوتیژی دژی ژنان لە ناو كۆمەڵگادا، كە لەلایەن بەشی سینەمای كۆلێجی هونەرە جوانەكانی زانكۆی سلێمانییەوە بەرهەمهێنراوە.
دواتر تەوەرەكانی پانێڵەكە دەستیپێكرد كە لە چەند تەوەرێك پێكهاتبوو:
تەوەری یەكەم لەلایەن پارێزەر تەلار لەتیف محەمەد، پێشكەشكرا كە تایبەت بوو بە قسەكردن لەسەر جیاكاری جێندەری لە یاساكاندا، هەروەها تەوەری دووەمی پانێڵەكە لە لایەن د. لوقمان سیوەیلی-یەوە بەڕێوەچوو كە بابەتەكەی لەسەر ڕەوشی توندوتیژی جێندەری لە هەرێمی كوردستان و عیراق بوو، تەوەری سێیەم لەلایەن "خاتوو لەیلا عەبدوڵڵا محەمەد"، پێشكەشكرا، كە قسەكردن بوو لەسەر كەیسەكانی تایبەت بە لانەی ئارام، تەوەری چوارەمی پانێڵ لەلایەن جیهاد عومەر فەتاح پێشكەشكرا، بەناونیشانی خوێندنەوەیەك بۆ دەربازبوون لە تێڕوانینی جێندەریانە بۆ پڕۆسەی هاوسەرگیری، تەوەری پێنجەم و كۆتایی لەلایەن  خاتوو كنێر عەبدوڵڵا پێشكەشكرا، كە تایبەت بوو بە چارەسەرەكان بۆ كەمكردنەوەی توندوتیژی .
 لەپاش پێشكەشكردنی بابەتەكان لەلایەن میوانەكانەوە، دەرگای پرسیارو گفتوگۆو پێشنیارەكان بۆ ئامادەبووانی پانێڵەكە كرایەوە، ئەمەش بۆ زیاتر گۆڕینەوەی بیروڕاكان لەسەر كۆی بابەتەكە.




 2019-12-08
 589