پانێڵێك سەبارەت بە پێداگۆجی مۆدێرن بەڕێوەچوو



پانێڵێك سەبارەت بە پێداگۆجی مۆدێرن بەڕێوەچوو

 [email protected]

 وەك یەكەم چالاكی زانستی كردنەوەی خولی دووەمی  پێداگۆجی، زانكۆی سلێمانی  لەگەڵ زانكۆی گەرمیان، پانێڵێكی دەربارەی پێداگۆجی ئەنجامدا، چوارچێوەی پرسیارو تێرامانەكان   (ڕیفلێكشنەكان)ی پانێڵەكە، تایبەتبون بە ئایدیای پێداگۆجی و بەربەست و دەرفەتەكانی بەردەم سەر ڕێگەخستنی كلتورێكی نوێی كاری زانكۆیی و ڕێگاكانی وانەوتنەوە .

پانێڵستەكان پێكهاتبوون لە بەڕێزان مامۆستا ئایرین شوان مامۆستا لە پەیمانگای تەكنیكی كوردستان و د. ئیسماعیل محەمەد مامۆستای زانكۆی گەرمیان، كە وەك دەرچووی یەكەم خولی پێداگۆجی، باسی ئەزموونی خۆیان كرد لەكاتی خوێندنی كۆرسەكە، دواتر چونەوەیان بۆ ناو ژینگەی كاری خۆیان، هەروەها بە بایەخەوە باسی ئەو وانانەیان كرد كە لە كۆرسەكە فێربوون و دواتر بەشێك لەو ئەزمونەیان بەشكردوە لەگەڵ فێرخوازەكاندا.
لە پاڵ ئەمانەشدا مامۆستایان "راهێنەرەكان"ی وانەبێژ لە خولی یەكەم هەریەك لە بەڕێزان د. ئەسعەد محەمەد بەڕێوەبەری سەنتەری ڕاهێنانی پێداگۆجی و پەرەپێدانی ئەكادیمی لە زانكۆی گەرمیان و د. ڕێژین هارون سەرۆكی بەشی كارگێڕی كاری كشتوكاڵی لە زانكۆی سلێمانی، باسیان لە ئەزمونی خۆیان كرد، وەك یەكەم ڕاوندی كۆرسی پێداگۆجی لە وڵاتی فینلاند پاشان وەك ڕاهێنەر لە كاتی بەشكردنی بەشێك لەو ئەزموونە لەگەڵ مامۆستایانی كوردستان .
 پانێڵەكە لەلایەن مامۆستا ستەم كامیل بەڕێوەبەری سەنتەری ڕاهێنانی پێداگۆجی و  پەرەپێدانی ئەكادیمی لە زانكۆی سلێمانییەوە بەڕێوەبرا.
سەرەكی ترین ئامانج لە ئەنجامدانی ئەم پانێڵە گەیاندنی پەیامێك بوو بۆ ئامادەبووان، كە چەند گرنگە مامۆستاكانمان لە بواری پسپۆڕی وردی خۆیان ماستەر یاخودا دكتۆرا بەدەست دەهێنن، چ لەناوەوەی هەرێم بێت یاخود لە زانكۆكانی دەرەوە، بە ئەندازەی ئەمە گرنگە برەو بە توانست و كارامەییەكانی بواری پێداگۆجی و ژینگەی كاری زانكۆییان بدەن .
 




 2020-01-05
 255