مەراسیمی كۆتایی پڕۆژەی بە جی. ئای. ئێس كردنی پشكنینی خاك لەشاری سلێمانی بەڕێوەچوو كە لەلایەن سیتی لاپی زانكۆی سلێمانییەوە ئەنجامدراوە



مەراسیمی كۆتایی پڕۆژەی بە جی. ئای. ئێس كردنی پشكنینی خاك لەشاری سلێمانی  بەڕێوەچوو كە لەلایەن سیتی لاپی زانكۆی سلێمانییەوە ئەنجامدراوە

 [email protected]

ئەمڕۆ 16-1-2020، لە ژێر چاودێری پڕۆفیسۆری یاریدەدەر د. ڕەزا حەسەن سەرۆكی زانكۆی سلێمانی و بە ئامادەبوونی د. ئاگرین عەبدوڵڵا عەزیز بریكاری وەزیری ئاوەدانكردنەوەو نیشتەجێكردنی هەرێم و عالیە تۆفیق تاهیر بەڕێوەبەری تاقیگەی بیناسازی سلێمانی و چەندین ڕاگرو مامۆستاو شارەزای بواری ئەندازیاری لە هۆڵی كۆنفرانسەكانی زانكۆی سلێمانی مەراسیمی كۆتایی پڕۆژەی بە GIS كردنی پشكنینی خاك لە شاری سلێمانی بەڕێوەچوو، كە لەلایەن سیتی لاپی سەربە زانكۆی سلێمانی و بە هاوكاری كۆمپانیای ڤیۆپایۆنێر پڕۆژەكانی ئەنجامدەدات.

سەرەتای مەراسیمەكەش بە ساتێك وەستان بۆ ڕۆحی پاكی شەهیدان دەستیپێكرد، دواتر لەلایەن پڕۆفیسۆری یاریدەدەر د. ڕەزا حەسەن سەرۆكی زانكۆی سلێمانییەوە وتاری سەرۆكایەتی زانكۆی سلێمانی بەو بۆنەیەوە خوێنرایەوە.
 سەرۆكی زانكۆی سلێمانی رایگەیاند: جێگەی شانازییە بۆ زانكۆی سلێمانی، كە توانیوێتی لە رێگەی پڕۆژەی سیتی لاپەوە بە هاوكاری كۆمپانیای ڤیۆپایۆنێر چەندین پڕۆژەی گرنگ و بەسود بە تواناو فیكرەو پێشنیاری مامۆستایان و خوێندكارانی زانكۆی سلێمانی، بۆ شاری سلێمانی ئامادەبكات كە ئەم پڕۆژانە هەم سودی زۆریان بە شاری سلێمانی گەیاندووە، هەم بوون بە پێشنیارو چارەسەر بۆ پڕۆژەو كاری بەڕێوەبەراتییەكانی شارەكە، هەروەها بۆ بەرچاو روونی و دۆزینەوەی چارەسەری گونجاو بۆ ئەو كێشانەی كە دێنە بەردەم پڕۆژەكانی شاری سلێمانی.
 سەرۆكی زانكۆی سلێمانی وتیشی: وەك زانكۆی سلێمانی خۆمان بە خۆشحاڵ دەزانین كە لەماوەی رابردوداو لە رێگەی پڕۆژەی سیتی لاپەوە توانیومانە چەندین پڕۆژەی گرنگ و سەردەمیانە ئامادەبكەین، كە سودی زۆر گەورەی بۆ شاری سلێمانی هەبووەو هاوكارییەكی گەورەش بووە بۆ بەڕێوەبەرایەتییەكانی حكومەت كە توانیویانە پڕۆژەكانیان لەسەری جێبەجێبكەن.
 تەئیكیدیشیكردەوە، وەك سەرۆكایەتی زانكۆی سلێمانی لەسەرەتای دروستبوونی پڕۆژەی سیتی لاپەوە بە هەموو شێوەیەك پشتگیری تەواوی پڕۆژەكەمان كردووە، دەستخۆشیش لە بەڕێوەبەرو سەرجەم ئەو كەس و لایەن و كۆمپانیایانەش دەكەین كە هاوكارمان بوون لە سەرخستنی پڕۆژەی سیتی لاپ.
دواتر لەلایەن د. چرۆ حەیدەر بەڕێوەبەری پڕۆژەی سیتی لاپ لە زانكۆی سلێمانی، بەوردی زانیارییەكان لەسەر پڕۆژەی بە GIS كردنی پشكنینی خاك لە شاری سلێمانی خسرایەڕوو، هەروەها گرنگی پڕۆژەكەشی بۆ ئامادەبوونی مەراسیمەكە ئاشكراكرد، بە نەخشەی تەواوی ئەو ناوچانەی كە ئەوان وەك سیتی لاپ كاریان لەسەر كردووە.
پاشان لەلایەن عالیە تۆفیق تاهیر بەڕێوەبەری تاقیگەی سلێمانییەوە، وتاری بەڕێوەبەرایەتی تاقیگەی بیناسازی سلێمانی بەو بۆنەیەوە پێشكەشكرا، كە تێیدا جەختیكردەوە، كە ئەوان وەك تاقیگەی بیناسازی سلێمانی، دەرگایان كراوەدەبێت بۆ هەموو پێشنیارو پڕۆژەیەكی زانستی كە لەلایەن زانكۆی سلێمانییەوە پێشكەشبكرێت، هەروەها سودێكی زۆر لە پڕۆژەی سیتی لاپ دەبینن بۆ ئەنجامدانی پشكنینەكانیان و هیوداریشن پەیوەندییەكانی نێوان سیتی لاپ و بەڕێوەبەرایەتی تاقیگەی بیناسازی، فراوانتر بكرێت.
             
 
 




 2020-01-16
 962