خولی نوێی پێداگۆجی لە زانكۆی سلێمانی دەستیپێكرد



خولی نوێی پێداگۆجی لە زانكۆی سلێمانی دەستیپێكرد

 [email protected]

خولی دوەمی پێداگۆجی لە سەنتەری ڕاهێنانی پێداگۆجی و پەرەپێدانی ئەكادیمی لە زانكۆی سلێمانی لە بەرواری (١٢/١/٢٠٢٠) بۆ خوازیارانی بەدەستهێنانی نازناوی زانستی دەستیپێكرد تا بەرواری (٢٢/٧/٢٠٢٠) بەردەوام ئەبێت. لەم خولەدا، ٨٨ هەڵگری بڕوانامەی ماستەر و دكتۆرا بەشداریان كردوە و لە دو گروپی جیاوازدا وانە ئەخوێنن. 

لەسەر ناوەڕۆكی پرۆگرامەكە، م. ستەم كامیل بەڕێوەبەری سەنتەری ڕاهێنانی پێداگۆجی ئاماژەی بەوە كرد كە ئامانجی سەرەكی لە خولی ڕاهێنانی پێداگۆجی بریتیە لە گەشەپێدانی چەند كارامەی و توانستێك تا نەوەی داهاتوی مامۆستایانی وەزارەتی خوێندنی باڵا بتوانن وەك مامۆستایەكی كارامە، داهێنەر و، پەروەردەكارێكی پرۆفیشناڵی ئاشنا بە تیۆر و زانستی نوێی پەروەردەی هاوچەرخ لە زانكۆكاندا كار بكەن، وانە بڵێنەوە و توێژینەوە زانستی ئاست بەرز ئەنجام بدەن. 
ئەم ڤیژنەی پڕۆگرامەكە، لە ڕێگەی ئەم چەند كارامەیی و توانستانە سەرەكیانەی لای خوارەوە وەردەگێڕدرێن بۆ بواری پراكتیك و لە ڕێگەی شەش مۆدیوڵ (وانە) وە دەگەیەنرێن بە بەشداربوان. كارامەییە سەرەكیەكان بریتین لە: 
 
1. كارامەیی ئەلیكترۆنی: بەكارهێنانی تەكنەلۆجیا لە پرۆسەی فێربوندا. 
2. كارامەیی پێداگۆجی: بریتیە لە تێڕامان و شارەزابون لە باگراوندی فەلسەفی پرۆسەی پەروەردە و فێربون. مەشقكردن لەسەر تیۆرە نوێ و هاوچەرخەكان لەبوای كاری وانەوتنەوە. هەروەها، بەهێزكردنی توانستی گەیاندنی بەشداربوان، تابتوانن ئەم تێگەشتنە مەعریفەیە قوڵە بگوێزنەوە بۆ ناو هۆڵەكانی خوێند و ئەو كایە زانستیەی كە كاری تیا ئەكەن.
3. كارامەیی ڕاهێنەرایەتی: لێرەدا بەشدابو مەشقیپێدەكرێت لەسەر ڕۆڵی هاوچەرخی مامۆستا. لەبری ئەوەی خودی مامۆستا لەسەنتەری پرۆسەی پەروردەدا بێت، لە دنیای ئێستا مامۆستا ڕۆڵی ئاراستەكەر و ڕەهێنەر ئەبێت و فێرخواز سەنتەری پرۆسەی پەروەردەیە. 
4. كارامەیی هەڵسەنگاندن: لەم بەشەدا جەخت دەكرێتە سەر گەشەپێدانی توانستەكانی هەڵسەنگاندنی بەشداربو، تێڕامانانە دەرگیر دەبین لەگەڵ ئەم پرسیارانەدا: چۆن و بە چ رێگەیەك ئەتوانین تێگەشتنی فێرخواز هەڵسەنگێنین؟ كامانەن ئەو پێوەر و ستانداردە مۆدێرنانەی لە بواری هەڵسەنگاندندا بەكار دێت؟ هتد 
5. كارامەیی ڕەوشت و پڕۆفیشناڵێتی: لەم بەشەدا كار لەسەر گەشەپێدانی بەرپرسیارێتی پڕۆفیشناڵانەی مامۆستا دەكرێت لە كاركردنی بەشێوەیەكی ڕەوشتیانەی بەرز لە ژینگەی كاری زانكۆیدا.
6. كارامەیی ئەفراندن و كارسازی: لەم بەشەدا، كار دەكرێت لەسەرگەشەپێدان و بەرزكردنەوەی ئاستی بیركردنەوەی كارسازیانەی مامۆستا، تا مامۆستا بزانێت كە چەند گرنگە ژینگەی فێربونی زانكۆی ببەسترێتەوە بە بازاڕی كارەوە. گرنگە پەروەردەی زانكۆی بەجۆرێك بێت كاتێك خوێندكارێك زانكۆ تەواو دەكات، تەنها چاوەڕوانی دامەزراندن نەبێت لە كەرتی گشتی، بەڵكو خاوەن متمانە بێت بە توانای ئەفراندن و كەسایەتی خۆی بۆ دروستكردن و دەستخستنی كار. ئەمەش لە رێگەی مامۆستایەكەوە دەبێت كە توانست و كارامەیی پێویستی هەبێت، تا بتوانێت ئەم پەیامە بگەیەنێت. 
7. كارامەیی بیركردنەوەی ڕەخنەیی و سەرنجدان: لە كۆی پرۆگرامەكەدا، لە ڕێگەی چەندین چالاكی جیاوازەوە،  هەوڵدەدرێت توانستی ڕەخنەیی و تێڕامانی مامۆستا دەربارەی بەها و ڕەفتارەكانی خۆی گەشەی پێبدرێت. توانستی ئەوەی مرۆڤ هەنگاوێك بێتە دواوە و لە دورەوە بتوانێت سەرنج لە شێوازی وانەوتنەوە و كاركردنی خۆی بدات، كاریگەرییەكی زۆر باشی دەبێت لەسەر پرۆسەی فێربون و پەروەردەی زانكۆی. 
 
لەم خولەدا، وانەكان بەشێوازێكی زۆر نوێ دەوترێنەوە. لە ڕێگەی وانەوتنەوە بە تیم، كە تیایدا دو ڕاهێنەر پێكەوە لە هۆڵی خوێندندا دەبن، بەشداربوان كراون بە سەنتەری پرۆسەی مەشقپێكردنەكە. لە رێگەی دابەشكردنی بەشداربوان بەسەر  گروپێكی چەند كەسی، بەشداربوان خۆیان خەریكی پەروەردەكردنی خۆیان دەبن و، ڕاهێنەرەكانیش تەنها كاریان ئاراستەكردن و سەرپەرشتیكردنیانە. لەم شێوازەدا، بوارێكی زۆر فراوان دەكرێتەوە بۆ بەشدار بو تا پرۆسەی فێربونی خۆی دابڕێژێت و هاوكاری هاوڕێكانی بكات لە گفتوگۆ و بیروڕا گۆڕێنەوەدا. 
سەبارەت بە خولی داهاتوی پێداگۆجی، م. ستەم كامیل پێی ڕاگەیاندین كە لە مانگی هەشتی داهاتودا خولی نوێی پێداگۆجی ڕادەگەیەنین و لە سەرەتای مانگی نۆدا دەست دەكەین بە وانەخوێندن. هەروەها داوای لە خوازیارانی بەدەستهێنانی نازناوی زانستی كرد كە لە ئێستاوە هەوڵبدەن پێداویستیەكانیان ئامادە بكەن وەك توانستی زمانی ئینگلیزی و بڕوانامە ئەكادیمیەكانیان. 
 
 
 
 

 





 2020-02-04
 3681