سەرۆكی زانكۆی سلێمانی پیرۆزبایی جەژنی ڕەمەزانی پیرۆز لە سەرجەم مامۆستایان و فەرمانبەران و خوێندكارانی زانكۆی سلێمانی دەكات



سەرۆكی زانكۆی سلێمانی پیرۆزبایی جەژنی ڕەمەزانی پیرۆز لە سەرجەم مامۆستایان و فەرمانبەران و خوێندكارانی زانكۆی سلێمانی دەكات

 [email protected]

بەبۆنەی هاتنی جەژنی رەمەزانی پیرۆزەوە، سەرۆكی زانكۆی سلێمانی پەیامێك بڵاودەكاتەوە، كە ئەمە دەقەكەیەتی:

"بەناوی پەروەردگاری بەخشندە و میهرەبان ....
پێشەكی بەبۆنەی هاتنی جەژنی رەمەزانی پیرۆزەوە، بەناوی خۆم و ئەندامانی ئەنجومەنی زانكۆی سلێمانی پیرۆزبایی لە سەرجەم مامۆستایان و فەرمانبەران و خوێندكارانی زانكۆی سلێمانی دەكەم. هەروەها رێگەم بدەن بە ناوی ئێوەشەوە پیرۆزباییەكی گەرم لە كەس و كاری سەربەرزی  شەهیدە نەمرەكان و پێشمەرگە قارەمانەكانی كوردستان بكەم. بەرێزان مامۆستایان، فەمانبەران ، خوێندكارانی زانكۆی سلێمانی ... جەژنی رەمەزانی پیرۆزی ئەمساڵ هاوكاتە لەگەڵ هەڵمەتەكانی دەزگا تەندروستییەكان و زانكۆو دامەزارەوە زانستییەكان بۆ رووبەڕووبونەوەی ڤایرۆسی كۆرۆنا كە تەواوی جیهانی گرتووەتەوەو وڵاتەكەشمان بەدەرنەبووە لەو ڤایرۆسە كوشندەیەو بەو هۆیەشەوەو لەبەر پارێزگاری لە تەندروستی خوێندكارە ئازیزەكانمان، پرۆسەی خوێندن لە ناو كەمپەسەكانی زانكۆدا راگرا، بەڵام بەهەوڵی بێوچان و بەردەوامی وەزارەتی خوێندنی باڵاو ئەنجومەنی زانكۆمان و مامۆستایانی ئازیز توانراوە لە زۆربەی كۆلێجەكان بەشێوەی ئەلیكترۆنی درێژە بە خوێندن بدرێت و نەهێڵرێت خوێندنی ئەمساڵی خوێندكارانمان بە فیڕۆ بڕوات.

 مامۆستایان و فەرمانبەران و خوێندكارانی ئازیز.. هەموومان دەزانین هاتنی ڤایرۆسی كۆرۆناو ئەو قەیرانە داراییە قوڵەی چەند ساڵێكە هەرێمەكەمانی گرتووەتەوەو خراپبون گوزەرانی هاووڵاتییان، مامۆستایان و فەرمانبەرانی زانكۆش بەدەر نەبوون لەو قەیرانە داراییەو دواكەوتنی مووچە كەسەرچاوەی ژیان و گوزەرانیانەو كاریگەری راستەوخۆی خستووەتە سەر ژیانیان، لەم بۆنە پیرۆزەشدا داوا لە وەزارەتی خوێندنی باڵاو ئەنجومەنی وەزیران دەكەین كە دەستكاری مووچەی مامۆستایانی زانكۆ نەكرێت كە تاكە سەرچاوەی داهاتی  ئەم توێژە گرنگەی كۆمەڵگەی كوردستانە...

 بەڕێزان هەرلە دەستپێكی بڵاوبوونەوەی ڤایرۆسی كۆرۆنای "كۆڤید19" و تەشەنەسەندنی مەترسییەكانی لەسەر وڵاتەكەمان، زانكۆی سلێمانی وەك ناوەندێكی ئەكادیمی و زانستی لە وڵاتەكەماندا، بە ئەركی سەرشانی خۆی زانی و بەشێوەیەكی خۆبەخشانە هاوشانی كەرتی تەندروستی و ناوخۆ، توانی كاربكات بۆ رووبەڕوبوونەوەی ڤایرۆسی كۆرۆناو لەو پێناوەشدا سەرجەم تاقیگەكانی خۆی خستە خزمەتی رووبەڕوبوونەوەی ڤایرۆسەكەو هاوكاریكردنی كەرتی تەندروستی لە دابینكردنی چەندین پێداویستی و هەروەها هەڵمەتەكانی هۆشیاركردنەوەی هاووڵاتییانمان بۆ خۆپارێزی لە ڤایرۆسەكە، كە ئەمە جێگەی فەخرو شانازییە.. مامۆستایان و فەرمانبەران و خوێندكارانی ئازیز وێڕای پیرۆزبایی جەژنی رەمەزانی پیرۆز، هیوا دەخوازین جەژنی ڕەمەزانی ئەمساڵ كۆتایی ناخۆشییەكان بێت بۆ وڵاتەكەمان  سەركەوتن بێت بەسەر كۆرۆناداو هیواخوازیشین خوێندكارە ئازیزەكانمان سەركەوتووبن، پێشیان دەڵێن هەوڵ و كوششتان بەرچاو و درەوشاوەیە هیوامان وایە هەر بەو گڕوتینەی پێشوتان بەردەوامبن بۆ ئەوەی وەك هەمیشە زانكۆكەتان زانكۆی دایك بە پێشەنگی ناوەندە زانستی و ئەكادیمییەكانی كوردستان بمێنێتەوە، ئومێدەوارین جەژن و پشوویەكی خۆش بەسەربەرن.
دووبارە جەژنتان پیرۆز.. 
 
‎پرۆفیسۆری یاریدەردەر
  ‎د.رەزا حەسەن 
‎سەرۆكی زانكۆی سلێمانی





 2020-05-23
 2329