توێژینەوەیەكی زانكۆی سلێمانی بە هاوبەشی زانكۆیەكی ناوداری جیهانی دەرگای نوێ بەڕووی زانستی ڤایرۆسدا ئەكاتەوە



توێژینەوەیەكی زانكۆی سلێمانی بە هاوبەشی زانكۆیەكی ناوداری جیهانی دەرگای نوێ بەڕووی زانستی ڤایرۆسدا ئەكاتەوە

 [email protected]

توێژینەوەیەكی زانكۆی سلێمانی بە هاوبەشی زانكۆی نۆتینگهامی بەریتانی لەسەر دەستنیشانكردنێكی خێرا و وردی  ڤایرۆسی جگەر لە جۆری B دەرگایەكی تازە ئەكاتەوە بەڕووی زانستی ڤایرۆسی گەردیی.

رێكەوتی ٢ی ٦ی ٢٠٢٠ دا، توێژینەوەیەكی د. پەیوەست جمال جلال لە بەشی بایۆلۆجی  كۆلێژی زانست لە گۆڤارێكی نێودەوڵەتی ئاست بەرز قبووڵ كرا لەژێر ناونیشانی (Nanopore sequencing from extraction-free direct PCR of dried serum spots for portable hepatitis B virus drug-resistance typing)  واتا (ڕیزبەندنی ترشە ناوكیەكانی ڤایرۆسی جگەری جۆری B بە بێ پاكژ كردنەوەی ترشە ناوكیەكە و ڕاستەخۆ زیادكردنی بە ئامێری PCR لە سیرۆمی وشكبۆوەوە). توێژینەوەكە لە گۆڤاری Journal of Clinical Virology قبوولكراوە كە فاكتەری كاریگەری گۆڤارەكە بریتیە لە 3.020 و بە یەكێك لە گۆڤارە بەهێزەكانی بواری ڤایرۆسات دادەنرێت. 
توێژینەوەكە ڕێگایەكی نوێی خستۆتە ڕوو بۆ دەست نیشان كردنی ڤایرۆسی جگەری جۆری B (hepatitis B virus) بەبێ بەكارهێنانی هیچ جۆرە كیتێك بۆ پاكژكردنەوە و جیاكردنەوەی ترشە ناوكی ڤایرۆسەكە كە ئەكرێ ئەم جۆرە ڕێگایە زۆر كات بگێڕێتەوە لەو ناوچانەی كە دەست كەوتنی پێداویستیەكانی دەستنیشانكردنی ڤایرۆسەكە ئەستەمە. شایانی وتنە زۆرێك لە سامپڵەكانی توێژینەوەكە لە كوردستان كۆكراوەتەوە و دەست نیشان كراوە پاشان نێردراوە بۆ ووڵاتی بەریتانیا  بۆ كاری زیاتر. هەروەها سامپڵ لە ووڵاتانی بەرازیل و بەریتانیاش بەهەمان شێوە كۆكراوەتەوە و دەستنیشانكراوە و بۆ گواستنەوەی سەرجەم سامڵەكان سوود لە جۆرە فلتەرێكی تایبەت وەرگیراوە بەبێ لەدەستدانی بڕی ڤایرۆسەكە. پاشان ڕیزبەندی ترشەناوكیەكانی ڤایرۆسەكە كراوەو توانرا جینۆتایپە جیاوازەكانی ڤایرۆسەكەش دەستنیشان بكرێت. 
ئەم توێژینەوەیە بریتیە لە سێهەم كاری هاوبەشی توێژەرەكەی زانكۆی سلێمانی و توێژەرانی زانكۆی نۆتینگهامی بەریتانی. شایانی باسە پلان هەیە كەوا لە داهاتوویەكی نزیكدا كاری هاوبەشی تر لەنێوان توێژەرانی هەردوو زانكۆدا ئەنجام بدرێت. بوونی ئەم جۆرە توێژینەوانە سەلمێنەری ئەو ڕاستیەیە كەوا توێژەرانی زانكۆكانی كوردستان هیچی كەمتر نیە لە توێژەرانی دنیا تەنها پێویستی بە فرسەت و ژینگەی گونجاوی كاركردنە.
لینكی توێژینەوەكە:
  https://www.sciencedirect.com/science/article/pii/S1386653220302250
 
    

 




 2020-06-07
 2642