زانكۆی سلێمانی بڕوانامەی رێزلێنانی بەخشییە خوێندكارانی بەشداربووی هێڵی گەرمی 122 ی بەرەنگاربوونەوەی كۆرۆنا



زانكۆی سلێمانی بڕوانامەی رێزلێنانی بەخشییە خوێندكارانی بەشداربووی هێڵی گەرمی 122 ی بەرەنگاربوونەوەی كۆرۆنا

 [email protected]

ئەمڕۆ 10-6-2020، لەرێورەسمێكی شایستەداو بە جێبەجێكردنی رێنماییە خۆپارێزی و تاكپارێزییەكان لە ڤایرۆسی كۆرۆنا، بەسەرپەرشتی پرۆفیسۆری یاریدەدەر د. ڕەزا حەسەن سەرۆكی زانكۆو ئامادەبوونی د. هەڤاڵ ئەبوبەكر پارێزگاری سلێمانی و ئاوات محەمەد قائیمقامی سلێمانی، بروانامەی رێزلێنان بەخشرایە ئەو خوێندكارە خۆبەخشانەی كۆلێجی پزیشكی كە لەماوەی رابردودا لەسەر  هێڵی گەرمی 24 سەعاتی 122ی بەرەنگاربوونەوەی ڤایرۆسی كۆرۆنا كاریان كردووەو رێنمایی هاووڵاتیانیان كردووە و وەڵامی پرسیارەكانیان داوەتەوەو زانیاری پێویستیان بە هاووڵاتییانداوە لەسەر ڤایرۆسی كۆرۆنا(covid19)، كە ڤایرۆسێكی نوێیەو پەتایەكی جیهانییەو لەسەرجەم وڵاتانی دونیا بڵاوبووەتەوەو مەترسییەكی گەورەی لەسەر ژیان و ئاسایشی تەندروستی مرۆڤایەتی دروستكردووە.

لە سەرەتای رێورەسمەكەشدا، د. هەڤاڵ ئەبوبەكر پارێزگاری سلێمانی وتەیەكی پێشكەشكردو وێڕای دەستخۆشی لە خوێندكاران رایگەیاند: ئێوە وەكو خوێندكارانی كۆلێجی پزیشكی زانكۆی سلێمانی جێگەی شانازین بۆ سلێمانی و هەموو هەرێمی كوردستانیش كە لەرێگەی ئەم پڕۆژە دەستە جەمعییەوە توانیتان خزمەت بە گەل و نیشتمانەكەتان بكەنەو ببنە سمبولێك بۆ بەرەنگاربوونەوەی ڤایرۆسی كۆرۆناو رزگاركەری مرۆڤ كە ئەمڕۆ جیهان رووبەڕوی ڤایرۆسێكی كوشندە بووەتەوە كە ژیانی مرۆڤایەتی لە جیهاندا خستووەتە بەر مەترسییەكی گەورە، وتیشی: ئێوە بەم كارە خۆبەخشییەتان توانیتان ئەزموونێك بۆ خۆتان دروستبكەن لە پسپۆڕییەكەی خۆتاندا كە لە دوارۆژدا ببێتە بنەمایەكی باش و ئەزموونێك بۆ خزمەتتان لە بوارەكەی خۆتان كە بواری تە ندروستی خەڵكە كە كارێكی پیرۆزو مرۆڤانەیە، دواتر ئاوات محەمەد قائیمقامی سلێمانی  وتەیەكی پێشكەشكردوو تێیدا زۆر دەستخۆشی لە خوێندكاران كرد، كە شانەشانی دەزگا تەندروستییەكان توانیان لە بەرەنگاربوونەوەی ڤایرۆسی كۆرۆنادا كاربكەن و جێگە دەستیان هەبێت.
پاشان پرۆفیسۆری یاریدەدەر د. ڕەزا حەسەن سەرۆكی زانكۆی سلێمانی وتەیەكی بەم بۆنەیەوە پێشكەشكردوو رایگەیاند:  بەناوی سەرۆكایەتی زانكۆی سلێمانییەوە لە ناخی دڵمانەوە سوپاسگوزاریتان دەكەین، كە لە كاتێكدا كە بەهۆی ئەو بارودۆخەی ڤایرۆسی كۆرۆناوە هتوچۆكردن قەدەغەكرابوو هیچ بنكەیەكی تەندروستی و هیچ نۆڕینەگەیەكی تەندروستی نەبوو ئێوە بە خۆبەخشانەو بە بێ ماندوبوون توانیتان 24 سەعات لەرێگەی ئەو هێڵە گەرمەوە رێنماییە پێویستییەكان لەبارەی ڤایرۆسی كۆرۆناوە بە هاووڵاتییان بدەن، هەروەها وەڵامی پرسیاری هاووڵاتییان بدەنەوە لەبارەی ڤایرۆسەكەو رێگاكانی خۆپاراستن لێی، بۆیە ئەمە یەكێكە لەو كارانەی كە جێگەی دەستخۆشییەو مرۆڤایەتی لە یادی ناكات و شانازییەكی گەورەیە بۆ شاری سلێمانی و  زانكۆی سلێمانی، هەروەها وتی: زانكۆی سلێمانی هەمیشە لەگەڵ كەرتی تەندروستی و لەەڵ بەڕێوەبەرایەتییە خۆجێییەكان لە هەوڵدابوون بۆ كۆتایی هێنان بەم ڤایرۆسە مەترسیدارە كە رووبەڕووی هەموو دونیا بووەوە كە كوردستانیش لێی بەدەرنەبوو ، بۆیە ئێمە ئەمڕۆ ئەمەی ئێمە دەیكەین كەمترین سوپاسگوزارییە بۆ ئێوەی خوێندكاران، هیواداریشین وەك وەفایەك بۆ ماندوبوونیان و هەوڵەكانیان لەو پێناوەدا سەرجەم دكتۆرو كارمەندانی تەندروستی و كارمەندانی وەزارەتی ناوخۆ هێزە ئەمنییەكان سوپاسیان بكرێت و دەستخۆشیان لێبكرێت، كە رۆژانە بە بێ وەستان رووبەڕووی جەنگ دەبنەوە لەگەڵ ئەم ڤایرۆسەداو ژیانی خۆیان دەخەنە مەترسییەوە، وتیشی: داواش لە حكومەتی هەرێم دەكەین هەوڵ و ماندوبوونی ئەوان لەبەرچاوبگرێت و هاوكاری تەواویان بكات و بەجدیی گوێ لە داوا ڕەواكانیان بگرێت و پێداویستییەكانیان بۆ دابین بكات.
پاشان بەڕێوەبەری جێبەجێكاری كۆمپانیای "پاتریس" خاوەنی بیرۆكەی دامەزراندنی هێڵی گەرم بۆ رووبەڕووبوونەوەی ڤایرۆسی كۆرۆنا وتەیەكی پێشكەشكردو رایگەیاند: بیرۆكەی دامەزراندنی هێڵی گەرم  لە شاری سلێمانییەوە سەری هەڵدا، بەڵام دواتر پرۆژەكە گەورەكراو سەرجەم هەرێمی كوردستانی گرتەوە لەسەرجەم شارەكانی هەرێم خرایەكار.
 راشیگەیاند: بەم پڕۆژەیە شاری سلێمانی و زانكۆی سلێمانی سەلماندی كە هەمیشە پێشەنگ بووە و توانیوێتی داهێنەربێت، وتیشی: زۆر سوپاسی خوێندكاران دەكەین كە توانیویانە 24 سەعات لەسەر ئەم هێلە گەرمە كاربكەن و وەڵامی هاووڵاتییان بدەنەوەو رێنمایی تەندروستی و خۆپارێزی بدەنە هاووڵاتییان لەبارەی ڤایرۆسی كۆرۆناو لەم كاتەدا لۆدی سەر نەخۆشخانەكان كەمبكەنەوە، بۆیە جێگەی ئاماژەیە ئێمە توانیومانە لەرێگەی ئەو هێڵە گەرمەوە لەماوەی سێ مانكی رابردودا وەڵامی (116) هەزار پەیوەندی بدەینەوە، كە بە تەنها 48 هەزار پەیوەندی لە پارێزگای سلێمانی بووەو زیاتر لە 12 هەزارو 100 بەدواداچوونمان كردووە بۆ كەیسەكان، بۆیە ئەمە ئەو پەڕی جێگەی دەستخۆشییەو شتێكتان سەلماند كە لە مێژووی سلێمانی و زانكۆی سلێمانی و تەمەنی ئەو خوێندكارانەشدا دەمێنێتەوە كە كاریان لەو پرۆژەیەدا كردووە.
 وتیشی: پڕۆژەكە ئەوەندە پڕۆژەیەكی ستراتیجی بوو لەسەر ئاستی هەرێمی كوردستان جێبەجێكراو سوپاسی هەموو ئەو كۆمپانیایانەی پەیوەندی دەكەین كە بەشداربوون لە پڕۆژەكەدا .
دواتر لەلایەن نوێنەری خوێندكارانی بەشداربوو پڕۆژەكەوە سوپاسی سەرۆكایەتی زانكۆی سلێمانی  پارێزگارو قائیمقامیەت و سەرجەم لایەنە پەیوەندیدارەكان كرا، بۆ سازكردنی ئەو رێورەسمە، هەروەها سەرجەم كەموكوڕی و داواكاری خوێندكاران خرانەڕوو.
هێڵی گەرمی 122 ی بەرەنگاربوونەوەی ڤایرۆسی كۆرۆنا لەلایەن 73 خوێندكاری كۆلێجی پزیشكی زانكۆی سلێمانی 24 سەعات بەڕێوەدەبرێت كە لەسەرەتای سەرهەڵدانی ڤایرۆسی كۆرۆناو تەشەنەسەندنی مەترسییەكانی ڤایرۆسەكە بەشێوەیەكی بەردەوام بەكاركردن دەستیكردووە، كە رۆژانە لە رێگەی ئەو هێڵەوە هاووڵاتییان لەماڵی خۆیانەوە دەتوانن بە بێ بەرامبەر پەیوەندی بكەن و چ پرسیارو زانیاری و رێنماییەكیان بوێت، وەڵامیان دەدرێتەوەو خزمەتگوزارییان پێشكەش دەكرێت.




 2020-06-10
 2397