سەرۆكی زانكۆ هۆڵەكانی تاقیكردنەوەی خوێندنی باڵای بەسەركردەوە



سەرۆكی زانكۆ هۆڵەكانی تاقیكردنەوەی خوێندنی باڵای بەسەركردەوە

 [email protected]

ئەمڕۆ 19-7-2020، پڕۆفیسۆری یاریدەدەر د. ڕەزا حەسەن سەرۆكی زانكۆی سلێمانی و د. كاوە عەبدوڵڵا یاریدەدەری سەرۆكی زانكۆ بۆ كاروباری زانستی هۆڵەكانی تاقیكردنەوەی خوێندكارانی ماستەریان بەسەركردەوە.

لەماوەی رابردوداو بەهۆی بڵاوبوونەوەی ڤایرۆسی كۆرۆناوە خوێندن لەناو كەمپەكانی زانكۆ راگیراو ئەمەش بۆ پاراستنی گیانی خوێندكاران و مامۆستایان بوو، بەڵام زانكۆی سلێمانی بۆ خوێندنی ماستەرو دكتۆرا هەروەك یەكەم ئەزموون توانی بەشێوەی ئۆنلاین "ئەلیكترۆنی" بەردەوامبێت لەسەر وتنەوەی وانەكان بۆ ماستەرو دكتۆرا بەسەركەوتوویی، ئەمڕۆش تاقیكردنەوەی كۆرساتی خوێندكارانی ماستەر، بە جێبەجێكردنی رێنماییە خۆپارێزییەكان لە ڤایرۆسی كۆرۆناو ئامادەكردنی هۆڵەكانی تاقیكردنەوە بەشێوەیەكی گونجاو، توانرا تاقیكردنەوەكان لەناو هۆڵی كۆلێجەكانی ناو كەمپی زانكۆ بەشێوەیەكی سەركەوتوو بەڕێوەبچێت.
هەرئەمڕۆش پڕۆفیسۆری یاریدەدەر د. ڕەزا حەسەن سەرۆكی زانكۆی سلێمانی، بۆ لە نزیكەوە ئاگاداربوون لە بەڕێوەچوونی تاقیكردنەوەكان، هۆڵەكانی تاقیكردنەوەی بەسەركردەوەو رایگەیاند: لەگەڵ بڵاوبوونەوەی ڤایرۆسی كۆرۆناو زیادبوونی مەترسیەكان لەسەر هاووڵاتییانمان، ناچاربووین خوێندن لەناو كەمپەسەكانی زانكۆ رابگرین بۆیەش وەك یەكەم ئەزموون كە لە زۆر لە وڵاتانی دونیا تاقیكراوەتەوە، زانكۆی سلێمانی وانەكانی بە شێوەی ئۆنلاین درێژەپێدا، خۆشبەختانە ئەم ئەزموونەمان بەسەركەوتوویی بەڕێوەبرد، لە ئێستادا تاقیكردنەوەكان لە هۆڵەكانی ناو كۆلێجەكان ئەنجامدەدرێن، بەڵام بە جێبەجێكردنی رێنماییە تەندروستی و خۆپارێزییەكان، كە شوێنی تاقیكردنەوەی خوێندكاران بەشێوەیەك رێكخراوە كە ماوەی دووریان پارێزراو بێت و سەرجەم كەلوپەلە خۆپارێزییەكان لە دەمامك و دەستكێش بۆ خوێندكاران دابین كراوەو خوێندكاران بەبێ بەكارهێنانی دەمامك و دەستكێش رێگەیان پێنادرێت بێنە هۆڵەكانی تاقیكردنەوە، وتیشی: هیوای سەركەوتن بۆ خوێندكاران دەخوازین و هیواداریشین ئەم دۆخە تێپەڕێنین . 




 2020-07-19
 815