پەیامی سەرۆكایەتی زانكۆ لە یادی 236 ساڵەی دامەزراندنی شاری سلێمانی



پەیامی سەرۆكایەتی زانكۆ لە یادی 236 ساڵەی دامەزراندنی شاری سلێمانی

 [email protected]

بەبۆنەی 236 ساڵەی دامەزراندنی شاری سلێمانی سەرۆكایەتی زانكۆی سلێمانی، بروسكەیەكی پیرۆزبایی ئاڕاستەی سەرجەم هاووڵاتییانی ئەو شارە دەكات، كە ئەمە دەقەكەیەتی:

ئەمڕۆ 236 ساڵ بەسەر دامەزراندنی شاری سلێمانیدا تێپەڕدەبێت كە لەسەر دەستی بابانییەكان لە ساڵی ۱۷۸٤ی زاینی دروستكراوە، لەسەرەتای دامەزراندنییەوە تائێستا سلێمانی هەمیشە هێمای جوانی پێكەوە ژیان و قوربانیدان و رۆشنبیری و ئەدەب و زانست و داهێنان بووە، تا ئەوەی نەتەوەیەكگرتووەكان بە شاری داهێنانی ئەدەب و ڕۆشنبیری دیاریكردووە، لە هەموو قۆناغەكانی شۆڕشی بەرگری لە ماف و خاكی كوردستان، سلێمانی هەمیشە ڕۆڵی پێشەنگی هەبووەو مێژوو شاهیدە كە چەندین قوربانی لەو پێناوەدا داوە، تا ئەوەی بە شاری هەڵمەت و قوربانی ناسێنراوە، لە رووی زانست و زانیاری و پێشكەوتنیشەوە، سلێمانی یەكەم شاری كورستان بووە كە زانكۆی تێدا دامەزراوەو لە ئێستاشدا یەكێكە لە شارە پێشەنگەكان لە رووی پێشكەوتنی زانست و ئەكادیمییەوە، سلێمانی  هەرلە سەرەتای دامەزراندنییەوە لانكەی سەرهەڵدانی شۆڕش و قوربانیدان بووە، هەمیشە دەنگی ناڕازی دژی نادادی و زوڵم و داگیركاری لەشاری سلێمانییەوە سەرچاوەی گرتووە، سلێمانی هەمیشە مەیدانی سەرهەڵدانی شاعیرو ئەدیب و كەسە گەورەكانی وەك نالی و مەحوی و سالم و كوردی و سەدەها كەسایەتی مێژوویی و زانای گەورەو فەیلەسوف بووە، بۆیە هەمیشە جێگەی شانازیی بووە بۆ كوردو كوردستان.
بۆیە لەیادی 236 ساڵەی دامەزراندنی ئەمشارەدا بەناوی سەرۆكایەتی و ئەنجومەنی زانكۆی سلێمانییەوە پیرۆزبایی گەرم ئاڕاستەی سەرجەم هاووڵاتییانی ئەم شارە دەكەین.
 
پڕۆفیسۆری یاریدەدەر 
د. ڕەزا حەسەن   
سەرۆكی زانكۆی سلێمانی  
 
 




 2020-11-14
 137