دەزگای مرۆیی مام هاوكاری بەشەناوخۆییەكانی زانكۆی سلێمانی دەكات



دەزگای مرۆیی مام هاوكاری بەشەناوخۆییەكانی زانكۆی سلێمانی دەكات

 [email protected]

ئەمڕۆ 16-11-2020، لە كۆنگرەیەكی رۆژنامەنووسیدا لە هۆڵی كۆنفرانسی سەرۆكایەتی زانكۆی سلێمانی، د. پێشڕەو حەمەجان یاریدەدەری سەرۆكی زانكۆی سلێمانی بۆ كاروباری خوێندكاران و  فەلاح سەڵاح  سەرۆكی دەزگای مرۆیی مام رایانگەیاند: وەك سەرەتایەك ئەمڕۆ دەزگای مرۆیی مام چەندین هاوكاری خۆپارێزی لە ڤایرۆسی كۆرۆنای پێشكەش بە زانكۆی سلێمانی كردووە، كە هاوكارییەكان دەمامك و پاكەرەوە"معقم"و ئامێری پێوانەی گەرمی جەستەو پێوانەی ئۆكسجین و جلوبەرگی تایبەت بەخۆپارێزی بۆ تیمەكانی زانكۆ.

سەرەتا د. پێشڕەو حەمەجان یاریدەدەری سەرۆكی زانكۆی سلێمانی بۆ كاروباری خوێندكاران سوپاسی دەزگای مرۆیی مامی كرد بۆ ئەو هاوكارییانەو رایگەیاند: وەك زانكۆی سلێمانی ژمارەیەكی زۆر خوێندكارمان هەیە كە بەشێكی زۆریان لە بەشەناوخۆییەكاندا دەمێننەوە، لەماوەی رابردوودا بەهۆی مەترسییەكانی بڵاوبوونەوەی ڤایرۆسی كۆرۆناوە نەتوانراوە بەشەناوخۆییەكان بەڕووی خوێندكاراندا بكرێنەوە، بەتایبەت بۆ ئەو خوێندكارانەی دەرەوەی شار كە وانەی پراكتیكییان لەناو كەمپەسدا هەیە وێڕای ئەوەی بارودۆخی ئابوری و ئەو قەیرانە قوڵەی كە رووی لە هەرێمی كوردستان كردووەو نەبوونی مووچەو بودجەی پێویست نەدەتوانرا زۆر پێداویستی خۆپارێزی و تەندروستی كە پێویستن بۆ خوێندكاران دابینی بكەین، هەروەها دوو كێشەی سەرەكی هەبوون كە ئەوانیش نەبوونی چاكەرەوەو پاكەرەوە لە بەشەناوخۆییەكان، بەهۆكاری نوێنەكردنەوەی گرێبەستی كۆمپانیاكانی پاكەرەوەو چاكەرەوە، بەڵام بەسوپاسەوە ئەمڕۆ لەلایەن دەزگای مرۆیی مامەوە ژمارەیەك پێداویستی خۆپارێزی وەك دەمامك و پاكەرەوە "معقم" و ئامێری پێوانەی گەرمی جەستەو پێوانەی ئۆسجین و جلوبەرگی تایبەت بەخۆپارێزی بۆ تیمەكانی زانكۆ بۆ دابین كراوە، وێڕای سیانەو دابینكردنی پێداویستی بەشە ناوخۆییەكان، كە ئەمە جێگەی دەسخۆشییەو دەتوانرێت هاوكارێكی باش بێت بۆ بەشەناوخۆییەكان و ئەو خوێندكارانەی كە وانەی پڕاكتیكی لە ناو كەمپەسدا دەخوێنن.
وتیشی: وەك زانكۆی سلێمانی بەردەوام لەخەمی خوێندنی خوێندكارانداین، ئەو سیستمە ئاوێتەیەی كە بۆ خوێندنی ئەمساڵیش لە زانكۆ پەیڕەو دەكرێت، بۆ پاراستنی گیانی خوێندكارانەو هەموولایەك دڵنیا دەكەینەوە بە كەمبوونەوەی مەترسییەكان بارودۆخەكە ئاسایی دەكەینەوە، وتیشی: هیواداین هەموولایەك تەندروست و سەلامەت بن.
پاشان فەلاح سەڵاح سەرۆكی دەزگای مرۆیی مام رایگەیاند: دەزگای مرۆیی مام هەمیشە لە خەمی خوێندن و زانستدابووەو لەم باودۆخە ناهەموارە ئابورییەشدا بە ئەركی سەرشانی خۆی دەزانێت هاوكاری خوێندكاران و زانكۆ بكات، لە پێناو بەردەوامبوونی خوێندن و پاراستنی گیانی خوێندكاراندا، ئەمڕۆش وەك سەرەتاییەك، كۆمەڵێك پێداویستی خۆپارێزی بۆ زانكۆی سلێمانی دابین كردووە، كە دەمامك و پاككەرەوە "معقم" و ئامێری پێوانەی گەرمی جەستەو پێوانەی ئۆكسجین و جلوبەرگی تایبەت بەخۆپارێزییە بۆ تیمەكانی زانكۆ، جەختیشیكردەوە لە داهاتووشدا هاوكارییەكان بۆ خوێندكاران بەردەوامدەبێت.
 
   
 




 2020-11-16
 1005