بەبۆنەی خانەنشین بوونییەوە زانكۆی سلێمانی مەراسیمێكی رێزلێنانی بۆ پرۆفیسۆر د. محەمەد رەووف مامۆستای كۆلێجی زانستی رێكخست



بەبۆنەی خانەنشین بوونییەوە زانكۆی سلێمانی مەراسیمێكی رێزلێنانی بۆ  پرۆفیسۆر د. محەمەد رەووف مامۆستای كۆلێجی زانستی رێكخست

 [email protected]

ئەمڕۆ 12-1-2021، بە ئامادەبوونی پڕۆفیسۆری یاریدەدەر د. ڕەزا حەسەن سەرۆكی زانكۆی سلێمانی و ژمارەیەك لە مامۆستایانی كۆلێجی زانستی زانكۆی سلێمانی لەبەشی بایلۆجی زانكۆ، بەبۆنەی خانەنشین بوونییەوە، مەراسیمێكی رێزلێنان بۆ پرۆفیسۆر د. محەمەد رەووف، رێكخرا .

لەسەرەتای مەراسیمەكەدا پڕۆفیسۆری یاریدەدەر د. ڕەزا حەسەن سەرۆكی زانكۆی سلێمانی، رایگەیاند:  د. محەمەد رەووف یەكێكە لەو مامۆستایانەی كە لەسەرەتای دامەزراندنی زانكۆی سلێمانییەوە تا ئێستا خزمەتێكی زۆری بە زانكۆی سلێمانی و رەوتی زانست لە هەرێمی كوردستان كردووە و چەندەها مامۆستا كە لە ئێستادا خزمەت بە وڵاتەكەمان دەكەن لەژێردەستی د. مەحەمەد-دا فێركراون و پێگەیشتوون، بۆیە وەك زانكۆی سلێمانی و بەشی بایلۆجی لە كۆلێجی زانست، قەرزاری  د. محەمەد رەوف-ین و هیوادەخوازین تەمەن درێژ و تەندروست بێت.
 دواتر چەپكە گوڵی سەرۆكایەتی زانكۆی سلێمانی لە لایەن پڕۆفیسۆری یاریدەدەر د. ڕەزا حەسەن سەرۆكی زانكۆی سلێمانی بەخشرایە بەڕێز د. محەمەد رەووف، لە پای ئەو خزمەتە زۆرەی كە بە زانكۆی سلێمانی كردووەو ساڵانێكی زۆری تەمەنی لە خزمەت گەیاندن بە رەوتی زانست و زانكۆی سلێمانی بەخشیووە.
 
د. محەمەد رەووف حسێن لە ساڵی 1951 لە گەڕەكی مەڵكەندی شاری سلێمانی لە دایكبووە، لە ساڵی 1975 بروانامەی بە كالۆریۆسی لە كۆلێجی كشتوكاڵی زانكۆی سلێمانی بەدەستهێناوە، یەكەم دامەزراندنی لە هەمان ساڵدا بوو وەكو موعید لە زانكۆی سلێمانی، بەڵام تەنها دوای 10 رۆژ لە دەوامكردن لە لایەن رژصمی ئەوكاتەی عیراقەوە دووردەخرصتەوە بۆ مەعهەدی فەنی بەغدا، لە ساڵی 1980-1982 بروانامەی ماستەر بە دەستدەهێنێت و تاساڵی 1988 وەك مامۆستا لە زانكۆی سەڵاحەدین لە شاری هەولێر خزمەتدەكات، بەڵام بەهۆی هەڵوێستە نیشتمانییەكانییەوە بۆ جارێكی تر دووردەخرێتەوە بۆ زانكۆی قادسییە لەشاری دیوانیە، لە دوای راپەڕینە مەزنەكەی بەهاری 1991 دەگەڕێتەوە بۆ شاری سلێمانی و وەك مامۆستا لە زانكۆی سلێمانی بەردەوامدەبێت لە خزمەت و لە ساڵی 2006 بروانامەی دكتۆرای بەدەستهێناوە لە بەشی بایلۆجی دواتر بە ناونیشانی پرۆفیسۆری یاریدەدەر بەردەوامبووە لە خزمەت لە زانكۆی سلێمانی، تاكو خانەنشینكردنی.
د. محەمەد رەووف یەكێك بووە لەو مامۆستا دڵسۆزو نیشتمانپەروەرانەی زانكۆی سلێمانی كە بەردەوام لە خەمی پێشكەوتنی زانست و وڵاتدا بووەو چەندین مامۆستای زانكۆ لەژێر سەرپەرشتی ئەودا بروانامەی دكتۆراو ماستەریان پێبەخشراوە، كە لە ئێستادا خزمەت بە رەوتی زانست و ئەكادیمیا دەكەن لە زانكۆكانی هەرێمی كوردستان.       
 
    
 




 2021-01-12
 519