هەڵمەتی پشكنینی كۆرۆنا بۆ مامۆستایان و فەرمانبەران و خوێندكارانی زانكۆی سلێمانی دەستپێكرد



هەڵمەتی پشكنینی كۆرۆنا بۆ مامۆستایان و فەرمانبەران و خوێندكارانی زانكۆی سلێمانی دەستپێكرد

 [email protected]

ئەمڕۆ 29-3-2021، بەسەرپەرشتی راستەوخۆی پڕۆفیسۆری یاریدەدەر د. ڕەزا حەسەن سەرۆكی زانكۆی سلێمانی و لەژێر چاودێری بەڕێوەبەرایەتی گشتی تەندروستی سلێمانی لەلایەن تیمی گەڕۆكی سەربە نەخۆشخانەی شەهید تاهیر عەلی والی بەگ، هەڵمەتی پشكنینی كۆرۆنا بۆ مامۆستایان و فەرمانبەران و خوێندكارانی زانكۆی سلێمانی دەستیپێكرد، كە بڕیارە سەرجەم مامۆستایان و فەرمانبەران و خوێندكارانی زانكۆی سلێمانی بگرێتەوە.
لەسەرەتای دەستپێكردنی هەڵمەتەكەش پڕۆفیسۆری یاریدەدەر د. ڕەزا حەسەن سەرۆكی زانكۆی سلێمانی لە كۆنگرەیەكی رۆژنامەنووسیدا رایگەیاند: ئاشكرایە بۆ جارێكی تر مەترسییەكانی ڤایرۆسی كۆرۆنا لە ناوچەكە سەری هەڵداوەتەوەو رێژەی تووشبوون بە ڤایرۆسەكە بەرزبووەتەوە، بۆیە زانكۆی سلێمانی یەكێكە لەو دامەزراوانەی كە لە ئێستادا دەوامی ناو كەمپسەكانی دەستپێكردووەتەوە و ژمارەیەكی زۆری خوێندكاران لە بەشەناوخۆییەكاندا هەن و هەمان كات ژمارەیەكی زۆری خوێندكار لە ناو هۆڵەكانی خوێندندا هەن، بۆیە پێویستە بە شێوەیەكی هۆشیارانە مامەڵە لەگەڵ دۆخەكەدا بكەین، بۆیە لەژێر راسپاردەی راستەوخۆی وەزیری خوێندنی باڵا بە هەماهەنگی لەگەڵ بەڕێوەبەرایەتی تەندروستی سلێمانی دەستمانكردووە بە هەڵمەتی پشكنینی كۆرۆنا لەناو زانكۆدا، بە ئامانجی ئەوەی داتایەكی تەواومان لەبەردەستدابێت بۆ بڕیاردان لەسەر هەر حاڵەتێك ئەگەر رووبدات .
سەرۆكی زانكۆی سلێمانی راشیگەیاند: بەهۆی مەترسییەكانی بڵاوبوونەوەی كۆرۆنا خوێندن لە زانكۆی سلێمانی بەشێوازی ئاوێتە بووە، بۆیە ئەوەی تێبینیمان كردووە سیستمەكە زۆر سەركەوتووبووە، لە هەمان كاتدا هەر كاتێك مەترسییەكانی نەخۆشییەكە زۆربووبێت شێوازی خوێندنی ئەلیكترۆنیمان بەكارهێناوە، بەپێچەوانەشەوە هەركاتێك نەخۆشییەكە رووی لە كەمبوون بووبێت خوێندكارانمان هێناوەتەوە نێو هۆڵەكانی خوێندن، بۆیەش ئەو سیستمەی كە تا ئێستا پەیڕەومان كردووە زۆر سەركەوتووبووەو تائێستا رێژەی لە 75% ی خوێندنی ئەمساڵ بەخۆشحاڵییەوە بەشێوەیەكی باش بەڕێوەچووەو تەواوكراوە، ئەوەی كەماوەتەوە لەماوەی دوو مانگی داهاتوودا دەتوانین تەواوی بكەین.
وتیشی: ئەم هەڵمەتەی پشكنینی كۆرۆنا یەكێكە لەو كارانەی كە دەكرێت بۆ ئەوەی هەوڵبدەین لەسەر بنەمایەكی زانستی بڕیار لەسەر ئەوە بدەین كە خوێندن لە زانكۆ بە چ شێوەیەك دەبێت، ئەگەر لە حاڵەتێكدا مەترسی كۆرۆنا زۆربێت واتە ئەگەر مەترسییەكان زۆربوون دەتوانین لەسەر ئەو بنەمایە خوێندن بكەینە ئەلیكترۆنی ، ئەگەریش مەترسییەكان نەگەیشتبنە حاڵەتێكی مەترسیدار ئەو كات بڕیاری تر لەو بارەیەوە دەدەین.
ئاماژەی بەوەشدا، ئەم هەڵمەتی پشكنینە داتاو زانیاری وردو زانستیمان دەداتێ بۆئەوەی لەسەر ئەو بنەما زانستییە بڕیار لەسەر شێوازی خوێندن بدەین.
وتیشی: زۆر سوپاسی وەزارەتی تەندروستی و بەڕێوەبەرایەتی تەندروستی سلێمانی دەكەین كە هەماهەنگ بوون لەگەڵمانداو هاوكارێكی سەرەكیمان بوون لەم هەڵمەتەدا .
 دواتر د. پێشڕەو حەمەجان یاریدەدەری سەرۆكی زانكۆی سلێمانی بۆ كاروباری خوێندكاران رایگەیاند: وەك زانكۆی سلێمانی ژمارەیەكی زۆر خوێندكاری بەشە ناوخۆییەكانمان هەیە كە لەم هەڵمەتەدا سەرجەمیان پشكنینی كۆرۆنایان بۆ دەكرێت، بەو خوێندكارانەشەوە كە لە بەشە ناوخۆییەكاندا نین، ئەمەش بۆ دڵنیابوونەوەمانە لە تەندروستی خوێندكاران و وەرگرتنی داتاو ئامارێكی دروست و زانستی بۆ ئەوەی لە ئایندەدا بتوانین بڕیار لەسەر بەردەوامی یان داخستنی بەشە ناوخۆییەكان بدەین، وتیشی: خۆشبەختانە تائێستا هیچ حاڵەتێكی كۆرۆنا لەناو خوێندكاراندا بەگشتی تۆمارنەكراوەو بەهاوكاری
دەزگای مرۆیی مام، توانراوە پێداویستی خۆپارێزی تەواو لە ڤایرۆسی كۆرۆنا لە دەمامك و دەستكێش و مەوادی پاكژكەرەوە بۆ بەشەناوخۆییەكان و هۆڵەكانی سەرجەم كۆلێجەكان دابین بكرێت لەگەڵ ئەنجامدانی هەڵمەتی پاكژكردنەوە (تعقیم)، كردنی سەرجەم هۆڵەكان و بەشەناوخۆییەكان.
 پاشان دڵشاد تەها عەلی بەڕێوەبەری كارگێڕی نەخۆشخانەی شەهید تاهیر عەلی والی بەگ-ی تایبەت بە پشكنینی كۆرۆنا لە سلێمانی ئاشكرایكرد، كە هەڵمەتی پشكنینی كۆرۆنا لە زانكۆی سلێمانی لەمڕۆوە دەستپێدەكات و سەرجەم مامۆستایان و فەرمانبەران و خوێندكارانی زانكۆی سلێمانی دەگرێتەوەو هەڵمەتەكەش بەردەوامی دەبێت تا سەرجەم مامۆستانیان و فەرمانبەران و خوێندكاران ،پشكنینی تەواویان بۆ ئەنجامدەدرێت.

 
 





 2021-03-29
 434