ئەنجومەنی زانكۆی سلێمانی بۆ ئیدانەكردنی شەهیدبوونی دوو مامۆستاكەی زانكۆی سەڵاحەدین ڕێوڕەسمێكی ماتەمینیان ئەنجامدا



ئەنجومەنی زانكۆی سلێمانی بۆ ئیدانەكردنی شەهیدبوونی دوو مامۆستاكەی زانكۆی سەڵاحەدین ڕێوڕەسمێكی ماتەمینیان ئەنجامدا

 kosar othman([email protected])

 ئەمڕۆ 29ی حوزەیرانی 2022  ئەنجومەنی زانکۆی سلێمانی ڕێوڕەسمێكی ماتەمینی و ناڕەزایەتییان دژی شەهید بوونی هەردوو هاوپیشەیان د.کاوان اسماعیل و  د. ادریس عزەت ئەنجامدا.

لەسەرەتای ڕێوڕەسمە ماتەمینیەکەدا پڕۆفیسۆر دكتۆر كۆسار محمد علی سەرۆكی زانكۆی سلێمانی پرسەو سەرەخۆشی خۆیی و ئەنجوومەنی زانكۆی سلێمانی ئاڕاستەی زانکۆی سەڵاحەدین و خانەوادەی هەریەک لە (د. کاوان ئیسماعیل)  و (د.ئیدریس حەمەخان)كرد.

وتیشی:ئەمە كارەساتێكی زۆر گەورەیە بۆ هەموومان ئەو مامۆستا بەڕێزانە كە چەندین ساڵە بەشێوەیەكی ئەكادیمی خزمەت بە زانكۆو نەوەكانمان دەكەن لەپای ئەو هەموو خزمەتە زۆر ناشرین و دڕندانە شەهیدكران، باسی لەوەشكرد كە بەتوندی ئیدانەی ئەم جۆرە تاوانانە دەكەن و داواكاریشن لەلایەنە پەیوەندیدارەكان دیاردەی كوشتن بنبڕ بكەن.

 سەرۆكی زانكۆی سلێمانی باسی لەوەشكردەوە كە لەدەستدانی ئەو دوو مامۆستا بەڕێزەخەسارەتێكی گەورەیە بۆ بواری زانست و خوێندنی باڵا بەتایبەت کەهەردووکیان کەسانێکی ئەکادیمی بەتواناو شارەزاو لێهاتوی زانکۆی سەڵاحەدین بوون، وتیشی: دوبارە بەناوی ئەنجوومەنی زانکۆی سلێمانییەوە پرسە و سەرەخۆشی لەزانکۆی سەڵاحەدین و کەسوکار و بنەماڵە بەڕێزەکانیان دەكەم، لەخوای گەورە داواکارم سەبووری و ئارامی بەدڵ و دەروونی هەموو لایەک بدات و ڕۆحی پاکیان بەبەهەشتی بەرین شاد بکات ، تاوانباریش بەسزای یاسایی خۆی بگات.

 

 





 2022-06-29
 390