خستنەڕووی راسپاردەكانی كۆنفرانسی پەرەپێدانی سەنتەرەكانی جێندەرناسی لە زانكۆكانی كوردستان لە پانێلێكدا



خستنەڕووی راسپاردەكانی كۆنفرانسی پەرەپێدانی سەنتەرەكانی جێندەرناسی لە زانكۆكانی كوردستان لە پانێلێكدا

 [email protected]

ئەمڕۆ 29-4-2018، لەمیانی چالاكییەكانی سەنتەری خوێندنی جێندەرو توندوتیژی  زانكۆی سلێمانی بەسەرپەرشتی د.یوسف گۆران  وەزیری خوێندنی باڵاو توێژینەوەی زانستی و پرۆفیسۆری یاریدەدەر د. رەزا حەسەن حسێن سەرۆكی زانكۆی سلێمانی، سەنتەری خوێندنی جێندەرو توندوتیژی  زانكۆی سلێمانی  لە هۆڵی روناكبیری زانكۆ هەستا بە ئەنجامدانی پانێڵێك بۆ مامۆستا (دەهام سمكۆ حسێن) ئەمینداری وەزارەتی خوێندنی باڵاو توێژینەوەی زانستی بە ناونیشانی (خستنەڕووی راسپاردەكانی كۆنفرانسی پەرەپێدانی سەنتەرەكانی جێندەرناسی لە زانكۆكانی كوردستان).

سەرەتای چالاكییەكە بە وتەی بەخێرهاتنی میوانەكان دەستی پێكرد كە لەلایەن رێكخەران و سەرپەرشتی كارانی پانێڵەكە خوێندرایەوە.
دواتر وتەی  پرۆفیسۆری یاریدەدەر د. رەزا حەسەن حسێن سەرۆكی زانكۆی سلێمانی سەبارەت بە ئەنجامدانی ئەم چالاكییە پێشكەشكرا، كە تێیدا سەرۆكی زانكۆی سلێمانی وێرای بە خێرهاتنی میوانەكان و سوپاسكردنی ئا مادەكارانی پانێڵەكە تەئكیدیكردەوە كە هەمیشە زانكۆی دایك "زانكۆی سلێمانی" سەرچاوەی فیكرو داهێنان و بەخشینی مەعریفەو بڵاوكردنەوەی ئینتمای نەتەوەیی و كوردایەتی بووەو بەردەوامیش سەرمەشقی داهێنان بووە لە گشت بوارەكاندا، ئەمڕۆش لە بواری خوێندنی جێندەری و دروستكردنی ناوەندێكی ئەكادیمی تایبەت بە لێكۆڵینەوە لە پرسی جێندەر لە كوردستان پێش سەرجەم زانكۆكانی كوردستان كەوتووە كە لە ساڵی 2010 بۆ یەكەمین جار سەنتەری دیراساتی جێندەرو توندوتیژی لە زانكۆی سلێمانی دامەزرێندراوە، كە ئەمەش جێگەی شانازییە.
 پاشان سەرۆكی زانكۆ جەختیكردەوە كە وەك چۆن سەرۆكایەتی زانكۆ هەردەم و لە هەموو كات و ساتێكدا پشتگیری داواكاریی و پێشنیارەكانی سەنتەری خوێندنی جێندەرو توندوتیژی بووە، بەڵێنیان پێدەدەین كەلەسەر هەمان پرەنسیپ و پەیرەو بەردەوامدەبین لە پێناو بنیاد نانی كۆمەڵگایەكی بەتاڵ لە جیاوازی رەگەزی و توندوتیژی و دروستكردنی كۆمەڵگایەكی  تەندروست، كە ئەمە بە هاوكاری و كاركردنی بەردەوامی هەموو لایەك دەبێت.
پاشان پانێڵ لەلایەن مامۆستا دەهام سمكۆ حسێن بە ئامادەبوان ناسێندراو دەستپێكردنی پانێڵ بە ناونیشانی (خستنەڕووی راسپاردەكانی كۆنفرانسی پەرەپێدانی سەنتەرەكانی جێندەرناسی لە زانكۆكانی كوردستان) ئەنجامدرا، پاشان لەلایەن رێكخەرانی پانێڵ و ئامادەبوان گفتوگۆی تێروتەسەل لەسەر پێشنیارو راو بۆچونەكان كرا.
لە كۆتایی پانێڵەكەدا وتەی كۆتایی پانێڵ پێشكەشكرا.
 

 





 2018-04-29
 1614