رێورەسمێك لەسەر پڕۆژەی دۆكیومێنتكردنی گەڕەك و بینا كۆنەكانی شاری سلێمانی بەڕێوەچوو



رێورەسمێك لەسەر پڕۆژەی دۆكیومێنتكردنی گەڕەك و بینا كۆنەكانی شاری سلێمانی بەڕێوەچوو

 zanyar.fatah@univsul.edu.iq

ئەمڕۆ 18-7-2019، لە بینای پارێزگای سلێمانی مەراسیمێكی فراوان لەسەر پڕۆژەی دۆكیومێنتكردنی گەڕەك و بینا كۆكانی شاری سلێمانی ، كە یەكێكە لە پڕۆژەكانی سیتی لاپی زانكۆی سلێمانی بەڕێوەچوو.

لە رێورەسمەكەدا پرۆفیسۆری یاردەدەر د. رەزا حەسەن حسێن سەرۆكی زانكۆی سلێمانی و هەریەك لە پارێزگاری سلێمانی و سەرۆكی ئەنجومەنی پارێزگای سلێمانی و  قائیمقام و بەڕێوەبەری چەند فەرمانگەیەك و چەند مامۆستایەكی زانكۆو چەندین كەسایەتی شاری سلێمانی ئامادەبوون، كە تێیدا سەرەتا لەلایەن د. چرۆ حەیدەر بەڕێوەبەری سیتی لاپی سلێمانییەوە بە كورتی باس لە بیرۆكەی دروستبوونی سیتی لاپ كرا، كە وەك سەنتەرێكی هاوبەشی نێوان زانكۆی سلێمانی و كۆمپانیای ڤیوپایەنێر بە گرێبەستێكی هاوبەش، سەنتەری "سیتی لاپ" دەستی بەكارەكانی كردووە.
 راشیگەیاند: لەماوەی چەند ساڵی رابردودا سیتی لاپ چەندین پڕۆژەی جێبەجێكردووە، كە چەند بەرێوەبەرایەتییەكی شاری سلێمانی سوودی لە پڕۆژەكان بینیوە، هەروەها بەوردی باسی لەو پڕۆژانەكرد كە لەماوەی دەستبە كاربوونییەوە، سەنتەری سیتی لاپ ئەنجامی داون .
 پاشان پرۆفیسۆری یاریدەدەر د. ئەمجەد قەرەداغی سەرپەرشتیاری پڕۆژەی دۆكیومێنتكردنی گەڕەك و بیناكۆنەكانی شاری سلێمانی، كە یەكێكە لە پڕۆژە گرنگەكانی سەنتەری سیتی لاپ، بەوردی  باسی لە پڕۆژەی دۆكیومێنتكردنی گەڕەك و بیناكۆنەكانی شاری سلێمانی كرد كە لەماوەی كاركردنیاندا توانیویانە زانیاری ورد لەسەر چەندین گەڕەك و بینای دێرینی شاری سلێمانی كۆبكەنەوەو بەشێویەكی زانستی دۆكیومێنتیان بكەن و نەخشەی تەواویان بۆ بكێشن، كە ئەمە بە چەند قۆناغێكی ورد بەشێوەیەكی زانستی لەلایەن چەندین ئەندازیارەوە لە زانكۆی سلێمانی كاری وردیان لەسەر كراوە.
دواتر لەلایەن پرۆفیسۆری یاریدەدەر د. رەزا حەسەن سەرۆكی زانكۆی سلێمانییەوە، كۆپی نەخشە ئامادەكراوەكان پێشكەشی هەریەك لە د. هەڤاڵ پارێزگاری سلێمانی و ئازاد محەمەد سەرۆكی ئەنجومەنی پارێزگاو ئاوات محەمەد قائیمقامی سلێمانی و خاتوو شاناز برایم ئەحمەد و هەریەك لە داواكاری گشتی و بەڕێوەبەرایەتی شارەوانی سلێمانی و كەمال رەشید رەحیم بەرێوەبەری شوێنەواری سلێمانی و كەسایەتی ناسراوی شاری سلێمانی مامۆستا جەمال عەبدول كرد. 
  پاشان دەرگای پێشنیارو گفتوگۆ بۆ ئامادەبووان كرایەوەو ئامادەبووان راو سەرنج و پێشنیارەكانیان سەبارەت بە پڕۆژەكە، بۆ ستافی كاری پڕۆژەكە خستەڕوو.
 
 
 

 





 2019-07-18
 303