ئەنجومەنی زانكۆی سلێمانی كۆبووەو چەند بڕیارێكی گرنگی دەركرد



ئەنجومەنی زانكۆی سلێمانی كۆبووەو چەند بڕیارێكی گرنگی دەركرد

 zanyar.fatah@univsul.edu.iq

ئەمڕۆ 31-7-2019، ئەنجومەنی زانكۆی سلێمانی بە سەرۆكایەتی پرۆفیسۆری یاریدەدەر د.رەزا حەسەن سەرۆكی زانكۆی سلێمانی و بە ئامادەبوونی سەرجەم ئەندامانی ئەنجومەنی زانكۆ كۆبوونەوەی ئاسایی خۆی بەڕێوەبرد.

لەسەرەتای كۆبوونەوەكەدا پرۆفیسۆری یاریدەدەر د. رەزا حەسەن سەرۆكی زانكۆی سلێمانی، باسی لە ئەنجامدانی ئەو چالاكییە كرد كە  كە پاشنیوەڕۆی ئەمڕۆ لەلایەن زانكۆی سلێمانییەوە بەڕێوەدەچێت، كە ئەویش بریتییە لە هەڵمەتی چاندنی 50 نەمام لە ناو كەمپی نوێی زانكۆی سلێمانی و سەرجەم ئەندامانی ئەنجومەنی زانكۆی سلێمانی تێیدا بەشداردەبن.
دواتر تەوەرەكانی كۆبوونەوەی ئەنجومەن دەستیپێكرد، كە سەرەتا گفتوگۆكردن بوو لەسەر كێشەو كەموكورتییەكان و وەرگرتنی راو بۆچوون و پێشنیاری ئەندامان بۆ چارەسەركردنی ئەو كەموكورتییانە.
 پاشان هەرلە كۆبوونەوەكەدا سەرۆكی زانكۆی سلێمانی بڕیاری وەزارەتی خوێندنی باڵای بە راگرە بەڕێزەكان راگەیاند، كە دەبێت سەرجەم مامۆستایانی زانكۆ 30 كاتژمێر لە هەفتەیەكدا دەوام بكەن، لە ناو زانكۆ و پابەندبن بەدەوامی رەسمییەوەو پێویستیشە كاتەكانی ئامادەبوونی مامۆستایان لە كۆلێجەكان بەپێی رێنمایی وەزارەتی و سەرۆكایەتی زانكۆ ئامادەبكرێت و لە بەش و كۆلێجەكان هەڵبواسرێت .
 هەروەها لە كۆبوونەوەی ئەنجومەنی زانكۆ گفتوگۆ لەسەر (ئیعارە)ی مامۆستایان بۆ زانكۆ ئەهلییەكان كرا، لە پاش تاوتوێكردنی لەلایەن سەرجەم ئەندامانی ئەنجومەنی زانكۆو گۆڕینەوەی راو بۆ چونەكان لەو بارەیەوە، ئەنجومەنی زانكۆی سلێمانی بڕیاریدا (ئیعارە) واتە چوونی مامۆستایانی زانكۆی سلێمانی بۆ زانكۆ ئەهلییەكان رابگرێت، ئەو مامۆستایانەش كە پێشتر بۆیان كراوە مامەڵەی تایبەتییان لەگەڵ دەكرێت.
دواتر باس لە پلانی چوار ساڵی وەزارەتی خوێندنی باڵا كرا، كە لەلایەن ئەنجومەنی وەزارەتەوە داوا لە زانكۆكان كراوە كە  پێشنیارەكانیان ئاڕاستەی وەزارەتی خوێندنی باڵا بكەن، بۆ ئەوەی كاریان لەسەر بكات و لەسەر ئەو پێشنیارانە پلانی چوار ساڵی وەزارەت دابڕێژرێتەوە، پاشان راگرەكان پێشنیارەكانیان پێشكەش بە سەرۆكی زانكۆی سلێمانی كردو لەلایەن سەرۆكی زانكۆشەوە، یەك بەیەك پێشنیارەكان لە ئەنجومەن خوێندرایەوەو گفتوگۆی تەواوی لەبارەوە كراو كۆكراوەی پێشنیارە پەسەندكراوەكانی ناو ئەنجومەنی زانكۆی سلێمانی دەكرێتە پێشنیاری زانكۆی سلێمانی، بۆ ئەوەی پێشكەش بە وەزارەتی خوێندنی باڵا بكرێت وەك پێشنیاری زانكۆی سلێمانی بۆ پلانی چوار ساڵەی وەزارەتی خوێندنی باڵاو توێژینەوەی زانستی، كە پێشتر لەلایەن ئەنجومەنی وەزارەتەوە ئەو داوایە پێشكەش بە سەرجەم زانكۆكان كراوە.
 
 
 
 




 2019-07-31
 1340