زانكۆی سلێمانی ئاهەنگی 34 هەمین خولی دەرچووانی بەڕێوەبرد



زانكۆی سلێمانی ئاهەنگی 34  هەمین خولی دەرچووانی بەڕێوەبرد

 [email protected]

لەژێر چاودێری د. ئارام محەمەد قادر وەزیری خوێندنی باڵاو توێژینەوەی زانستی هەرێم و بە ئامادەبوونی چەندین بەرپرسی حكومی و حزبی و بەرپرسی رۆشنبیری لە كونسوڵگەری كۆماری ئیسلامی ئێران و چەندین كەسایەتی و ڕۆشنبیرو روناكبیری شاری سلێمانی، زانكۆی سلێمانی ئاهەنگی 34 هەمین خولی دەرچووانی خوێندكارانی بۆ ساڵی خوێندنی 2018 بۆ 2019 لە هۆڵی كۆنفرانسی زانكۆ بەڕێوەبرد.

 لە سەرەتای دەستپێكردنی ئاهەنگەكەدا پرۆفیسۆری یاریدەدەر د. رەزا حەسەن سەرۆكی زانكۆی سلێمانی وتارێكی بەو بۆنەیەوە پێشكەشكردوو ڕایگەیاند: بەبۆنەی دەرچوونی (4200) خوێندكاری زانكۆی سلێمانی لەسەرجەم پسپۆڕییەكان، بەناوی خۆم و ئەنجومەنی زانكۆی سلێمانی پیرۆزباییەكی گەرم لە خوێندكارانی دەرچووی ئەم خولە دەكەین و هیوادارین لە پاشەڕۆژدا بتوانن لە رێگەی زانست و پسپۆڕییەكانیانەوە بە شێوەیەكی باش خزمەت بە گەل وڵاتەكەیان بكەن.
هەروەها وتی: خوێندكارانی خۆشەویست زانكۆكەتان زانكۆی سلێمانی یەكەمین زانكۆبووە لە كوردستان كە لە ساڵی 1968 دامەزراوە، لە ماوەی 51 ساڵی تەمەنیدا رۆڵێكی گرنگی هەبووە لە خەباتی ڕزگاری خوازی گەلەكەمانداو هەمیشە  سەرچاوەی پێگەیاندنی كەسانی نیشتمان پەروەرو رۆشنبیرو زانستخوازبووە و ئیلهامی بیری پێشكەوتنخوازانەی ئەم شارەبووە، لە پێگەیاندنی چەندین كەسایەتی رۆشنفیكرو نوسەرو ئەدیبی بەناو بانگی گەلەكەمان بووە، هەربۆیەش زانكۆی دایك خۆی بە بەشێك لەو شانازییە دەزانێت، كە نازناوی داهێنەر لە بواری ئەدەبدا بە شانازییەوە بە شاری سلێمانی بەخشرا لە لایەن رێكخراوی یونسكۆوە.
دواتر لەلایەن د. ئارام محەمەد قادر وەزیری خوێندنی باڵاو توێژینەوەی زانستی هەرێم، وتەیەك پێشكەشكراو تێیدا پیرۆزبایی لە خوێندكارانی دەرچووی خولی (34) هەمینی زانكۆی سلێمانی كردو رایگەیاند: خوێندكارانی خۆشەویست لە ناخی دڵمەوە پیرۆزبایتان لێدەكەم و هیوادارم لە ئایندەدا لەرێگەی بڕوانامەو پسپۆڕییەكانتانەوە خزمەت بەگەڵ و نیشتمانەكەتان بكەن، وتیشی: زانكۆی سلێمانی و شاری سلێمانی لە خەبات و بەرخۆدان بۆ ئازادی و بەدیهێنانی مافە رەواكانی گەلەكەمان هەمیشە پێشەنگ بووە، وتیشی: من شانازی بەوەوە دەكەم كە خۆم دەرچووی ئەم زانكۆیەم و قۆناغەكانی بەدەستهێنانی ماستەرو دكتۆراشم هەرلەم زانكۆ ئازیزە بووە، بۆیە زانكۆی سلێمانی وەك زانكۆی دایك هەمیشە پێشەنگ بووەو هەر واشدەمێنێتەوە .
 وەزیری خوێندنی باڵا راشیگەیاند: زانكۆی سلێمانی لە 51 ساڵی تەمەنیدا توانیوێتی بەشدارییەكی كاریگەری هەبێت لە بنیاتنانی سەرمایەی مرۆیی هەرێمەكەماندا و بە سەدان هەزاران كادیری زانستی لە پسپۆڕییە جۆربەجۆرەكان بۆ وڵاتەكەمان ئامادەبكات  كە لە ئێستادا خزمەتی بەرچاوی كوردستان دەكەن.
 ئاماژەی بەوەشدا، وەك چۆن لە رابردودا زانكۆی سلێمانی مەڵبەندی زانست و مەعریفەو پێگەیاندنی چەندین نەوە بووە، لە ئێستاشدا لە ڕیزبەندی زانكۆكانی كوردستان و لەسەر ئاستی زانكۆكانی عیراقیش لە پلەیەكی باشدایە، كە ئەمە جێگەی شانازییەكی گەورەیەوە بۆ شاری سلێمانی و هەموو كوردستانیش.
   
پاشان ئەندامانی ئەنجومەنی زانكۆی سلێمانی چوونە شوێنی تایبەتی خۆیان لە هۆڵەكەو یەك بە یەك ناوی ئەو كۆلێج و بەشانە خوێنرایەوە كە خوێندكاران تێیدا بڕوانامەیان بەپێی پسپۆڕییەكەیان پێدەبەخشرێت.
دواتر لەلایەن نوێنەری خوێندكارانەوە وتارێك خوێندرایەوەو تێیدا وێڕای پیرۆزبایی كردن لە خوێندكاران بۆ بڕینی قۆناغێكی گرنگی خوێندنیان و چوونە قۆناغێكی تری ژیانەوە كە پراكتیزە كردنی كارو پسپۆڕییەكەیانە بۆ خزمەتكردن بە كۆمەڵگاكەیان، ورەو توانای خوێندكاران بەرزكرایەوە كە نابێت بێ ئومێدبن و دەبێت زیاتر هەوڵبدەن بۆئەوەی بگەنە ئەو ئامانجانەیان كە دەیانەوێت.
پاشان یەك بەیەك خوێندكارانی كۆلێجە جیاوازەكان سوێندی یاساییان خواردو، لەلایەن راگرەكانەوە پێشكەش بە سەرۆكی زانكۆكران و داوا لە سەرۆكی زانكۆ كرا لەبەر ئەوەی ئەم خوێندكارانە لە پسپۆریی تایبەتی خۆیان، هەموو پێداویستییەكانی خوێندیان تەواو كردووە، بۆیە داوا لە سەرۆكی زانكۆكرا بڕوانامەیان لە پسپۆڕی تایبەتی خۆیان پێبدات، سەرۆكی زانكۆش بەپێی ئەو دەسەڵاتەی كە پێی دراوە بەپێی پسپۆڕییان بڕوانامەی بە خوێندكاران بەخشی.
 
 
   
 




 2019-11-28
 954