لە ژێر دروشمی بۆ نەهێشتنی گەندەڵی تۆش هاوكاربە كۆلێجی یاسای زانكۆی سلێمانی و دەستەی دەسپاكی هەرێم پانێڵكیان ئەنجامدا



لە ژێر دروشمی بۆ نەهێشتنی گەندەڵی تۆش هاوكاربە كۆلێجی یاسای زانكۆی سلێمانی و دەستەی دەسپاكی هەرێم پانێڵكیان ئەنجامدا

 [email protected]

ئەمڕۆ 3-12-2019، بە ئامادەبوونی پرۆفیسۆری یاریدەدەر د. ڕەزا حەسەن سەرۆكی زانكۆی سلێمانی و د. هەڤاڵ ئەبوبەكر پارێزگاری سلێمانی و حاكم ئەحمەد ئەنوەر سەرۆكی دەستەی دەسپاكی هەرێم و چەندین دادوەرو بەرپرسی حكومی و حزبی و مامۆستایانی كۆلێجی یاسای زانكۆی سلێمانی، لە چوار چێوەی چالاكییەكانی هەفتەی بەرەنگاربوونەوەی گەندەڵی و لە ژێر دروشمی (بۆ نەهێشتنی گەندەڵی تۆش هاوكاربە) كۆلێجی یاسای زانكۆی سلێمانی و دەستەی دەسپاكی هەرێمی كوردستان، بە هاوبەشی سەنتەری لێكۆڵینەوەی یاسایی و رامیاری، لە هۆڵی كۆنفرانسەكانی  كۆلێجی یاسای زانكۆی سلێمانی پانێڵێك ئەنجامدرا.

 سەرەتای پانێڵەكەش بە ساتێك وەستان بۆ رۆحی پاكی شەهیدان دەستیپێكرد، دواتر لەلایەن پڕۆفیسۆری یاریدەدەر د. ڕەزا حەسەن سەرۆكی زانكۆی سلێمانی وتارێك بەو بۆنەیەوە پێشكەشكراو، تێدا تەئكیدی لەسەر گرنگی ئەنجامدانی ئەم جۆرە چالاكییانە كردەوە، كە تێیدا بە شێوەیەكی زانستی و لەلایەن كۆمەڵێك پسپۆڕو شارەزای بواری یاسایی تاوتوێی چۆنێتی بەرەنگاربوونەوەی دیاردەی گەندەڵی دەكرێت، كە یەكێكە لە پەتا مەترسییدارەكان و بوونی لە هەروڵاتێك و كۆمەڵگەیەكدا كاریگەری گەورەی زۆر مەترسیدار لەسەر وڵات و تاك بەتاكی كۆمەڵگا بەجێدەهێڵێت، بۆیە پێویستە لەرێگەی دەزگا تایبەتمەندەكان و كۆمەڵگەی مەدەنی و هاووڵاتییان و دەسەڵاتی دادوەرییەوە كار بۆ ڕێگریكردن لە دیاردەی گەندەڵی و  بنەبڕكردنی بكرێت، تا بتوانین دادوەری كۆمەڵایەتی لە كۆمەڵگادا بچەسپێنین و كۆمەڵگەیەكی دوور لە گەندەڵی و خراپ بەكارهێنانی دەسەڵات و بە هەدەردانی موڵك و سامانی گشتی بنیادبنرێت .
سەرۆكی زانكۆی سلێمانی وتیشی: پێم خۆشە لەم رۆژەدا كە رۆژی جیهانی بەرەنگاربوونەوەی گەندەڵییە ئەمە بڵێم كە پێویستە هەموومان دەستخۆشی لە سەرۆك و ئەندامانی دەستەی دەسپاكی بكەین كە لە ماوەی دامەزراندنیاندا زۆر بە لە خۆبردویی و دڵسۆزییەوە توانیویانە كاری جددی بكەن بۆ ڕێگریكردن لە گەندەڵی لە سەرجەم دامودەزگاكانی حكومەتدا لە لوتكەوە تاكو خوارەوە، كە ئەمە كاریگەری زۆری هەبووە لەسەر كەمكردنەوەی دیاردەی گەندەڵی، هەروەها پەردەلادان و ئاشكراكردنی چەندین دۆسییەی گەندەڵی كە ئەمە بۆ خۆی جێگەی دڵخۆشییەو سەرەتایەكی زۆر باشە بۆ ڕیشەكێشكردنی گەندەڵی و بنیاتنانی كۆمەڵگەو وڵاتێكی دوور لە گەندەڵی .
پاشان بەشەكانی پانێڵەكە دەستیپێكرد كە لەلایەن میوانەكانەوە بە شێوەیەكی زانستی باس لە هۆكارەكانی دروستبوونی گەندەڵی و كاری دادگاكان و داواكاری گشتی و دەزگا چاودێرییەكانی وەك دەسەڵاتی یاسادانان و دەزگای چاودێری دارایی  كرا لە ئاشكراكردنی دۆسییەی گەندەڵی و ڕێگریكردن لە خراپ بەكارهێنانی دەسەڵات و بە هەدەردانی سامانی گشتی.
لە كۆتایی پانێڵەكەشدا چەند كاتێك درا بە ئامادەبووان تاكو پرسیارو پێشنیارەكانیان ئاڕاستەی بەڕێوەبەرو میوانەكانی پانێڵەكە بكەن.
   
 




 2019-12-03
 200