لە زانكۆی سلێمانی یەكەمین كۆنفرانسی نێودەوڵەتی زانستی ماتماتیك بەڕێوەچوو



لە زانكۆی سلێمانی یەكەمین كۆنفرانسی  نێودەوڵەتی زانستی ماتماتیك بەڕێوەچوو

 [email protected]

ئەمڕۆ 24-9-2020، لە ژێر چاودێری پڕۆفیسۆری یاریدەدەر د. ڕەزا حەسەن سەرۆكی زانكۆی سلێمانی و ئامادەبوونی د. مهابات كامیل سەرۆكی زانكۆی هەڵەبجەو چەندین مامۆستاو ژمارەیەك میوانی بیانی، بە جێبەجێكردنی رێنماییە تەندروستی و خۆپارێزییەكان لە پەتای كۆرۆنای "كۆڤید19" لە هۆڵی كۆنفرانسی كۆلێجی زانست، یەكەمین كۆنفرانسی نێودەوڵەتی زانستی ماتماتیك بەڕێوەچوو كە لەلایەن هەردوو كۆلێجی زانست و كۆلێجی پەروەردەی زانكۆی سلێمانی ئامادەكراوەو ماوەی دوو رۆژ دەخایەنێت و بەشێكی زۆری پێشكەشكردنەكان بەشێوەی "ئۆنلاین" دەبێت و یەكێك لە میوانەكانی كۆنفرانسەكەش پڕۆفیسۆر كۆچەر بیركار دەبێت.

سەرەتای كۆنفرانسەكەش بە ساتێك وەستان بۆ رۆحی پاكی شەهیدانی كوردستان دەستیپێكرد، دواتر وتەی بەخێرهاتن و دەستپێكی كۆنفرانس لەلایەن  پڕۆفیسۆر د. فەرەیدون قادر ڕاگری كۆلێجی پەروەردەی زانكۆی سلێمانی بەهەردوو زمانی كوردی و ئینگلیزی خوێندرایەوە، كە تێیدا بەگرنگییەوە باسی لە ئەنجامدانی ئەم كۆنفرانسەكرد، كە لە سەرەتای ساڵی 2020 ەوە ئامادەكارییان بۆ كردووە، و دەبوایە مانگی نیسانی ئەمساڵ ئەنجامبدرایە، بەڵام بەهۆی بڵاوبوونەوەی ڤایرۆسی كۆرۆناوە ناچاربوون دوای بخەن بۆ ئێستا، وتیشی: بە شانازییەوە زانكۆی سلێمانی بۆ ئەم كۆنفرانسە گرنگە چەندین شارەزاو پسپۆڕی جیهانی بانگهێشت كردووە، كە یەكێك لەوانە پڕۆفیسۆر كۆچەر بیركارە، كە بە شێوەی ئۆنلاین بەشداردەبێت .
راشیگەیاند: ئاشكرایە وێڕای قەیرانی دارایی كە چەند ساڵێكە بەرۆكی وڵاتەكەمانی گرتووەو رێگربووە لە  باش بەڕێوەچوونی كارەكان بۆ ئەمساڵیش بڵاوبوونەوەی ڤایرۆسی كۆرۆنا زیاتر كاریگەری هەبووە لەسەر چالاكییە زانستی و ئەكادیمییەكان، بەڵام سەرەڕای ئەو رێگرییانە زانكۆی سلێمانی یەكێك بووە لەو زانكۆیانەی كە توانیوێتی نەوەستێت و بەهەوڵ و ماندووبوونی هەموولایەك توانراوە كاری زۆر باش بكات و بەوەش رانكینی زانكۆی سلێمانی لەسەر ئاستی زانكۆكانی عیراق و زانكۆكانی جیهانیش بەشێوەیەكی باش بەرزبووەوتەوە گەیشتووەتە ئاستێكی باش كە ئەمەش جێگەی خۆشحاڵییە.
ئاماژەی بەوەشدا، كۆنفرانسی نێودەوڵەتی زانستی ماتماتیك-یش كە ئەمڕۆ بەڕێوەدەچێت چەندین توێژینەوەی زانستی ئاست بەرزی تێیدا پێشكەشدەكرێت و لەلایەن پسپۆڕانەوە گفتوگۆی چڕوپڕی زانستی لەبارەوە دەكرێت.
پاشان پڕۆفیسۆری یاریدەدەر د. ڕەزا حەسەن سەرۆكی زانكۆی سلێمانی بەو بۆنەیەوە وتەیەكی پێشكەشكردوو رایگەیاند: زۆر سوپاسی رێكخەرانی ئەم كۆنفرانسە نێودەوڵەتییە دەكەین و هیوادارین بەشێوەیەكی باش كارەكانی بەڕێوەبچێت، وتیشی: وەك سەرۆكایەتی زانكۆی سلێمانی پشتگیری تەواوی بەڕێوەچوونی ئەم جۆرە كۆنفرانسە زانستییانە دەكەین، هەروەها وتی: وەك ئاگادارن بڕیاربوو ئەم كۆنفرانسە لە مانگی چواری ئەمساڵدا ببەسترێت، بەڵام بەداخەوە بەهۆی بڵاوبوونەوەی پەتای ڤایرۆسی كۆرۆنای كۆڤید19 ، كە هەموو جیهانی گرتەوە نەتوانرا لەو كاتەدا ئەنجامبدرێت، بەڵام ئەمڕۆ بەخۆشحاڵییەوە سەرەڕای بەردەوامی بڵاوبوونەوەی ڤایرۆسی كۆرۆنا بەهەوڵ و هیمەتی مامۆستایان و فەرمانبەرانی هەردوو كۆلێجی زانست و پەروەردە توانرا ئەو راستییە بسەلمێنن كە زانكۆمان لە كاتی قەیرانەكانیشدا دەتوانێت داهێنان ئەنجامبدات و بەردەوامبین لە بەرەو پێشبردنی رەوتی زانست لە وڵاتەكەماندا.
وتیشی: لای هەموومان روونە پڕۆسەی خوێندنی باڵا  تەنها بریتی نییە لە فێركردنی خوێندكارو پێدانی بڕوانامەی دەرچوون كە ئەمە بەشێكی پرۆسەی خوێندنی زانكۆییە، بەشەكەی تری بریتییە لە، ئەنجامدانی توێژینەوەی زانستی و بڵاوكردنەوەی لە گۆڤارە ئاست بەرزە كان لە لایەن مامۆستایانەوە، هەروەها بەشداریكردنی مامۆستایان لە كۆنفرانسە نێودەوڵەتییەكان لە دەرەوەی وڵات و ئەنجامدانی پڕۆژەی هاوبەش لە رێگای سیمینارو وۆركشۆپی نێودەوڵەتی لەگەڵ زانكۆ پێشكەوتووەكانی دنیاو دروستكردنی گروپی ریسێرجی گەورە لەگەڵ توێژەرە باشەكانی زانكۆ پێشكەوتووەكاندا. 
 لە كۆتایی وتەكانیدا سەرۆكی زانكۆی سلێمانی رایگەیاند: كە وەك سەرۆكایەتی زانكۆ بەهەموو شێوەیەك پشتگیری و هاوكاری ئەم جۆرە كارانە دەكەین و هیوای سەركەوتنیش بۆ كۆنفرانسەكە دەخوازین.
دواتر پڕۆگرامەكانی یەكەم رۆژی كۆنفرانس دەستیپێكرد، كە پێشكەشكردنەكان بە شێوەی ئۆنلاین بەڕێوەدەچێت.
  




 2020-09-24
 2306