ئەنجومەنی زانكۆی سلێمانی كۆبووەوە



ئەنجومەنی زانكۆی سلێمانی كۆبووەوە

 [email protected]

ئەمڕۆ 17-11-2020، بەسەرۆكایەتی پڕۆفیسۆری یاریدەدەر د. ڕەزا حەسەن سەرۆكی زانكۆی سلێمانی و ئامادەبوونی یاریدەدەرانی سەرۆكی زانكۆ و سەرجەم ئەندامانی ئەنجومەنی زانكۆ و بە جێبەجێكردنی رێنماییە خۆپارێزییەكان لە پەتای كۆرۆنا، كۆبوونەوەی ئاسایی ئەنجومەنی زانكۆی سلێمانی بەڕێوەچوو.

لەسەرەتای كۆبوونەوەكەدا كە نوێنەری خوێندكاران ئامادەبوو، گفتوگۆ لەسەر چەند كێشەیەكی خوێندكاران كراو چەند پێشنیارێك بۆ چارەسەركردنی ئەو كێشانە لە ئەنجومەن كراو بڕیاری چارەسەركردنی درا.
تەوەری دووەمی كۆبوونەوەكە تایبەت بوو بە گفتوگۆكردن و تاوتوێكردنی، چۆنێتی دانانی میكانیزمێكی گونجاو بۆ كردنەوەی بەشێك لە بەشە ناوخۆییەكان، كە لە قۆناغی یەكەمدا بە تەنها كۆلێجە پزیشكییەكان بكرێنەوە، كە وانەی پراكتیكییان لە نەخۆشخانەكان و تاقیگەكاندا هەیە بەڕەچاوكردنی رێنماییە تەندروستی و خۆپارێزییەكان بەشێوەیەكی توندو تۆڵ، بۆ ئەو مەبەستەش پێشنیارو راو سەرنجی سەرجەم ئەندامانی ئەنجومەن وەرگیراو گفتوگۆی تەواوی لەبارەوە كرا.
هەرلە كۆبوونەوەكەدا سەرۆكی زانكۆی سلێمانی رایگەیاند: ئاستی زانستی و كوالێتی خوێندن و ژیان و تەندروستی خوێندكاران هەردووكیان  بەلای ئێمە گرنگەو كارەكانیشمان لەسەرەتاوە بۆ ئەوە بووە هەردوو لایەنەكە زیانیان پێنەگات و ئامانجی سەرەكیشمان ئەوەیە كە بەشێوەیەك مامەڵە لەگەڵ بارودۆخەكەدا بكەین، كە زیان بە كوالێتی خوێندن و ئاستی زانستی و هەم زیان بە تەندروستی و گیانی خوێندكارانیش نەگات، ئەویش بە دانانی  میكانیزمێك دەبێت كە لەگەڵ باردۆخی ئەمڕۆدا بگونجێت، وتیشی: تائێستا بڕیاری كۆتایمان لەسەر كردنەوەی بەشە ناوخۆییەكان نەداوە تەنانەت بۆ بەشە پزیشكییەكانیش كە زۆرترین وانەی پراكتیكیان هەیە، بۆیە دەبێت گفتوگۆیەكی زۆر لەسەر ئەو بابەتە بكرێت بە تێبینیكردن و رەچاوكردنی بارودۆخەكە، بڕیارێكی حەكیمانە بدرێت لەو بارەیەوە.
دواتر د. پێشڕەو حەمەجان یاریدەدەری سەرۆكی زانكۆ بۆ كاروباری خوێندكاران، بۆ بەرچاو ڕوونی سەرجەم ئەندامانی ئەنجومەن، ئاماری وردی خوێندكارانی بەشەناوخۆییەكانی ئاشكراكرد، لەهەموو كۆلێجەكان و لەو كۆلێجانەش كە وانەی پراكتیكییان هەیە، ئەمەش زیاتر بۆ بەرچاو روونی سەرجەم ئەندامانی ئەنجومەن، تا بتوانرێت میكانیزێكی وا بدۆزرێتەوە بۆ چۆنێتی هاتنەوەی ئەو خوێندكارانەی كە وانەی پراكتیكیان هەیەو لەسەر رۆشنایی ئەو زانیارییانە بڕیارێكی دروست لەسەر چارەسەكردنی كێشەكانیان بدرێت.
پاشان راو سەرنج و پێشنیاری سەرجەم ئەندامانی ئەنجومەنی زانكۆ بۆ چارەسەركردنی كێشەكان وەرگیراو گفتوگۆی تەواوی لەسەر كرا.
    
 




 2020-11-17
 1291