وتاری سەرۆکی زانکۆی سلێمانی لەدیداری سلێمانی بۆ لامەرکەزی



وتاری سەرۆکی زانکۆی سلێمانی لەدیداری سلێمانی بۆ لامەرکەزی

 kosar othman([email protected])

 بەناوی خوای گەورەو میهرەبان

- بەڕێزان ئەندامانی مەکتەبی  سیاسی و سەرکردایەتی لایەنە سیاسییەکان.
- بەرێزان ئەندامانی پەرلەمانی کوردستان.
- بەڕێزان سەرۆکی ئەنجوومەنی پارێزگاو پارێزگارو جێگری پارێزگاری سلێمانی.
- بەڕێزان ئەندامانی ئەنجوومەنی پارێزگای سلێمانی.
- بەڕێزان سەرۆک زانکۆکانی کوردستان.
- بەڕێزان قائمقام وحاکمە بەرێزەکان و مامۆستایانی زانکۆ.
- سەرجەم کەسایەتییە بەڕێزەکانی ئامادەبوو لەم دیدارە.
بەناوی سەرۆکایەتی هەردوو ئەنجوومەنجی زانکۆی سلێمانی و زانکۆی پۆلی تەکنیکی سلێمانی پڕ بەدڵ بە خێر هاتنی گەرم لە ئێوەی بەڕێز دەکەم بۆ (دیداری سلێمانی بۆ لامەرکەزیەت) کە بەهاوکاری ناوەندی کاروباری یاسایی یەکێتیی نیشتمانیی کوردستان ئەنجام دەدرێت.
ئامادەبوانی خۆشەویست
ئەمڕۆ هەردوو زانکۆ وەک دوو ناوەندی ئەکادیمی و دوو دەزگای زانستی گەورە لە کوردستان کە خاوەنی چەندین بڕوانامەی بەرزی زانستیین لە سەرجەم بوارەکانی حوکمدان وە بەتایبەتی لە بواری سیستمی لامەرکەزیەتیدا، هەوڵ دەدەین لە رێگای ئەم کەسایەتییە خاوەن بڕوانامە بەرزانەوە لەگەڵ چەند کەسایەتییەکی خاوەن ئەزموونی کاریگەری سەرکەوتوو بەشێوەیەکی زانستییانە تیشک بخەینە سەر گرنگی چەمکی لامەرکەزیەت لە سیستمی حوکمدانی دنیای ئەمڕۆدا.
وەک ئاشکرایە لای ئێوەی بەڕێز بە درێژایی مێژووی حکومەتی عیراق لەسەرەتای دروستبوونی دەوڵەتی عیراق تا ساڵی 2005 هەمیشە سیستمی حوکمڕانی لە عیراقدا مەرکەزی بووە، هۆکاری ئەم جۆرە حوکمڕانییە مەرکەزییە هەمیشە بریتی بووە لە بەهێزکردنی دەسەڵاتی سیاسی ئەو حیزبەی حوکمڕانی کردووە لەبەرئەوە سیستمی لامەرکەزییان بە هەڕەشە بۆ سەر دەسەڵاتی خۆیان زانیوە، بەڵام خۆشبەختانە پاش رووخانی رژێمی بەعسی فاشی لە ساڵی 2005 کاتێک جارێکی تر دەستوور نووسراوە، تا رادەیەک ئاماژە بە سیستەمی حوکمڕانی لامەرکەزی کراوە لە دەستوری نوێی عیراقدا، ئەمە ئەوەمان پێ دەڵێت کە سیستەمی لامەرکەزی لە عیراق و هەرێمی کوردستان خۆی لە خۆیدا بە نیسبەت گەلی عیراق تازەیەو لە هەمان کاتیشدا سیستەمێکی ئاڵۆزە، بۆیە پێویستە لەلایەن کەسانی پسپۆڕو خاوەن ئەزموونی کارگێڕی چەندین دیدارو سیمینارو کۆنفرانسی لەسەر ببەسترێت بۆ زیاتر تێگەیشتن لەم جۆرە سیستەمە، وە ئەنجامدانی ئەم دیدارەی ئەمرۆ هەست کردنمانە بەو راستییە زانستییەو هەوڵێکە بۆ زیاتر شرۆڤەکردنی سەرجەم لایەنە نەزانراوەکانی ئەم سیستەمە.
هیوادارین ئەم بابەت و توێژینەوانەی ئەمڕۆ لەم دیدارە پێشکەش دەکرێت لە داهاتوودا ببێت بەبەشێک لە کارنامەی ئەو پڕۆژەیەی کە لە ئێستادا هەوڵی بۆ دەدرێت لە کوردستان جێبەجێ بکرێت بۆ سەرجەم پارێزگاکان.
 
 
 
 




 2021-02-20
 276