زانكۆی سلێمانی و زانكۆی پۆڵیتەكنیكی سلێمانی دیداری سلێمانی بۆ لامەركەزی ئەنجامدەدەن



زانكۆی سلێمانی و زانكۆی پۆڵیتەكنیكی سلێمانی دیداری سلێمانی بۆ لامەركەزی ئەنجامدەدەن

 [email protected]

ئەمڕۆ 20-2-2021، لەژێر ناونیشانی (سیستمی لامەركەزی سیستەمێكی هاوچەرخ بۆ خزمەتی هاووڵاتیان) لە هۆڵی هۆتێل رامادا زانكۆی سلێمانی و زانكۆی پۆڵیتەكنیكی سلێمانی بە هاوكاری ناوەندی كاروباری یاسایی یەكێتیی نیشتمانیی كوردستان، دیداری سلێمانی بۆ لامەركەزی لە سلێمانی-یان بەڕێوەبرد .
 
زانكۆی سلێمانی و زانكۆی پۆلیتەكنیكی سلێمانی بەهاوكاری ناوەندی كاروباری یاسایی یەكێتیی نیشتمانیی كوردستان و بە ئامادەبوونی پڕۆفیسۆری یاریدەدەر  د.ڕەزا حەسەن سەرۆكی زانكۆكانی سلێمانی و  پڕۆفیسۆری یاریدەدەر د. ئالان فەرەیدون سەرۆكی زانكۆی پۆلیتەكنیكی سلێمانی و پارێزگاری شارەكە و چەندین لێپرسراوی حزبی و حكومی و مامۆستای زانكۆ و پسپۆڕان،  دیداری سلێمانی بۆ لامەركەزی ئەنجامدرا.
 
لە سەرەتای دیدارەكەدا پڕۆفیسۆری یاریدەدەر د. رەزا حەسەن سەرۆكی زانكۆی سلێمانی وتەیەكی پێشكەشكردو و رایگەیاند: سیستمی لامەركەزی سیستمێكی قوڵە و بۆ تێگەیشتن لێی پێویستە چەندین توێژینەوە و پانێڵ سازبكرێت.
 
وتیشی: سوپاسی لێپرسراوی ناوەندی یاسایی یەكێتیی نیشتمانیی كوردستان دەكەم كە زۆر هاوكاربوون بۆ سازكردنی ئەم دیدارە و هیوادارین توێژینەوەكانی ئەم دیدارە لە داهاتوودا ببنە كارنامەی ئەو پڕۆژە لامەركەزییەی كە لە ئێستادا هەوڵی بۆ دەدرێت لە هەرێمی كوردستان.
 
دیداری سلێمانی بۆ لامەركەزی دوو پانێڵی لە خۆ گرتبووە كە پانێڵی یەكەم لەلایەن پڕۆفیسۆری یاریدەدەر د. ئالان فەرەیدون سەرۆكی زانكۆی پۆلیتەكنیكی سلێمانییەوە پێشكەشكرا و هەریەك لە د. یوسف گۆران وەزیری پێشووی خوێندنی باڵا و د. هەڤاڵ ئەبوبەكر پارێزگاری سلێمانی و حاكم خدر بەشدار بوون.
 
 پانێڵی یەكەم بە گشتی باسی لە سیستمی لامەركەزی كرد وەك سیستمێكی هاوچەرخ بۆ خزمەتی هاووڵاتیان لە بواری حوكمڕانی و سەربەخۆیی دادگاكان و ئەنجومەنی خۆجێی.
دواتر پانێڵی دووەمی دیدارەكەی بە سەرپەرشتی پڕۆفیسۆری یاریدەدەر د. رەزا حەسەن سەرۆكی زانكۆی سلێمانی پێشكەشكرا، كە هەریەك لە پڕۆفیسۆری یاریدەدەر د. مستەفا رەسول حسێن و  پڕۆفیسۆری یاریدەدەر د. نەرمین مەعروف و عەبدلرەحمان ساڵح شارەزای بواری دارایی و بانك بەشداربوون.
 كە سەرەتا پڕۆفیسۆری یاریدەدەر د. مستەفا رەسول حسێن بابەتێكی لەسەر لامەركەزییەتی كارگێری لە دیدی یاساییەوە پێشكەشكرد، پاشان پڕۆفیسۆری یاریدەدەر د. نەرمین مەعروف بابەتێكی لەسەر لامەركەزییەت و گەشەی ئابوری پێشكەشكرد كە تێیدا بەوردی باسی لە گرنگی لامەركەزیەت كرد بۆ گەشەپێدانی ئابوری لە وڵات لە هەموو رووەكانەوە، پاشان عەبدلرەحمان ساڵح بابەتێكی لەسەر بانكی هەرێم و لامەركەزییەتی دارایی لە حاڵەتی جێبەجێكرداندا پێشكەشكرد.
 لە كۆتایی پانێڵەكەشدا دەرگای گفتوگۆو پرسیار بۆ ئامادەبووانی دیارەكە كرایەوەو بە وردی وەڵامی پرسیارو پێشنیارەكان لەسەر كۆی بابەتی لامەركەزی كارگێری و دارایی پارێزگاكان درانەوە.
 




 2021-02-20
 147