بە ئامادەبوونی سەرۆكی زانكۆی سلێمانی دووەمین پێشانگای ناساندنی زانكۆ نایابەكانی ئێران لە سلێمانی كرایەوە



بە ئامادەبوونی سەرۆكی زانكۆی سلێمانی دووەمین پێشانگای ناساندنی زانكۆ نایابەكانی ئێران لە سلێمانی كرایەوە

 [email protected]

ئەمڕۆ 23-8-2021، بە ئامادەبوونی پرۆفیسۆر د. ڕەزا حەسەن سەرۆكی زانكۆی سلێمانی، دووەمین پێشانگای ناساندنی زانكۆ نایابەكانی وڵاتی ئێران لە شاری سلێمانی كرایەوە، كە ماوەی سێ رۆژ دەخایەنێت، لە رۆژی 23ی 8ی 2021 تاكو 25ی 8ی2021 بەردەوام دەبێت.


دووەمین پێشانگای ناساندنی زانكۆ نایابەكانی وڵاتی ئێران لە شاری سلێمانی، بە ئامادەبوونی د. هەڤاڵ ئەبوبەكر پارێزگاری سلێمانی و ئازاد محەمەد سەرۆكی ئەنجومەنی پارێزگای سلێمانی و پرۆفیسۆر د. ڕەزا حەسەن سەرۆكی زانكۆی سلێمانی و مەهدی شوشتەری سەركونسوڵی كۆماری ئیسلامی ئێران لە سلێمانی و چەندین مامۆستای زانكۆ و ئەكادیمیست و كەسایەتی، لە هۆڵی هۆتێل هایكرێست لە سلێمانی كرایەوە.


سەرەتای رێورەسمەكەش بە خوێندنەوەی چەند ئایەتێك لە قورئانی پیرۆز دەستیپێكرد، دواتر مەهدی شوشتەری سەركونسوڵی كۆماری ئیسلامی ئێران لە سلێمانی وتەیەكی بەو بۆنەیەوە پێشكەشكردو، جەختیكردەوە كە كۆماری ئیسلامی ئێران وەك دەوڵەتێكی دراوسێ هەمیشە لە هەوڵی پتەوكردنی پەیوەندییە ئابوری و كلتوریی و فەرهەنگی زانستییەكانیدایە لە نێوان هەرێمی كوردستان و كۆماری ئیسلامی ئێراندا و هەدوو وڵاتی دراوسێش پەیوەندییەكی بەهێزو مێژووییان هەیە لە هەموو بوارەكاندا، وتیشی: ئەم پێشانگایەی ئەمڕۆش كە ناساندنی زانكۆ نایابەكانی كۆماری ئیسلامی ئێرانە هەرێمی كوردستان بە تایبەت شاری سلێمانی بۆ خۆی هەوڵێكی گرنگە لە پێناو زیاتر نزیكبوونەوە لە یەكترو پتەوكردنی پەیوەندییە ئەكادیمی و زانستییەكانی نێوان زانكۆكانی ئێران و هەرێمی كوردستان.


پاشان د. هەڤاڵ ئەبو بەكر پارێزگاری سلێمانی وتەیەكی پێشكەشكردو رایگەیاند:  بەهێزكردنی پەیوەندییەكانی نێوان زانكۆكانی ئێران زانكۆ كارێكی گرنگەو كردنەوەی ئەم جۆرە پێشانگایەنەش بۆ زیاتر ناساندنی زانكۆ نایابەكانی ئێران بە هەرێمی كوردستان رێگە خۆشكەرە بۆ ئەوەی پەیوەندییە زانستی و ئەكادیمییەكانی نێوان زانكۆكانی هەرێمی كوردستان و ئێران پتەوتر بكرێن و هەم بواریش بۆ فێرخوازان و خوێندكارانی هەرێمی كوردستان بڕەخسێنرێت تاكو بە ئاسانی بتوانن زەمالەی خوێندیان لە پێشكەوتوو ئاست بەرزەكانی ئێراندا دەستبكەوێت و بتوانن خوێندنی بەكالۆریۆس و ماستەرو دكتۆران لەو زانكۆیانە بخوێنن و پەرە بە ئاستی زانستی خۆیان بدەن.
دواتر پڕۆفیسۆر د. ڕەزا حەسەن سەرۆكی زانكۆی سلێمانی كە هەمان كات وەك نوێنەری وەزیری خوێندنی باڵا بەشداربوو، وتەیەكی پێشكەشكردو رایگەیاند: ئەمڕۆ بەخۆشحاڵییەوە لەم رێورەسمەدا بە بەشداریدەكەین كە ناساندنی زانكۆ نایاب و ئاستبەرزەكانی كۆماری ئیسلامی ئێرانە لە سلێمانی.


وتیشی: وەك زانكۆ سلێمانی لەماوەی رابردودا توانیومانە چەندین پڕۆژەی گرنگ و باش جێبەجێبكەین كە یارمەتیدەرێكی باش بووە بۆ بەرزكردنەوەی ئاستی زانستی و رانكینی زانكۆكەمان كە یەكەم زانكۆیە لەسەر ئاستی هەرێمی كوردستان و لەسەر ئاستی عیراقیش لە پلەیەكی باشدایە، لەوانەش جێبەجێكردنی سیستمی بۆڵۆنیایە كە كە ئەمە لە چەندین وڵاتی ئەوروپا جێبەجێدەكرێت كە تێیدا خوێندكار چەقی فێربوونەو دەتوانین ئەو ئاستەنگانەی كە دێتە بەردەم خوێندكارانمان كە لە دەرەوە دەخوێنن بە ئاسانی چارەسەریان بكات ، هەروەها چەندین پڕۆژەی ترمان جێبەجێكردووە كە بەسوودی گەورەی بۆ زانكۆكەمان و خوێندكارانمان هەبووە هەم لەرووی ئاستی زانستییەوە هەم لەرووی رانكینی زانكۆوە كە بەشێوەیەكی باش بەرەو پێشچووە، هەروەها پرۆژەی زۆر گەورەو باشمان هەبووە بۆ هاندانی توێژەرانمان بۆ ئەوەی هانی توێژەرەكانمان بدەین زۆرترین توێژینەوەی زانستی ئەنجامبدەن و لە گۆڤارە ئاست بەرزە خاوەن "ئیمپاكت فاكتەرەكاندا"، بڵاویبكەنەوە، كە ئەمەش كاریگەری باشی لەسەر ئاستی زانستی زانكۆمان هەبووە.


 ئاماژەی بەوەشدا، زانكۆی سلێمانی بەدەر لەو كارانە پەیوەندی زۆرباشی لەگەڵ زانكۆ ئەوروپی و ئەمریكی و ئێرانییەكاندا هەبووەو چەندین یاداشتنامەی لێكتێگەیشتن لەنێوان زانكۆكانی ئێران و زانكۆی سلێمانیدا واژۆكراوەو كاری جددی كراوە بۆ پتەوكردنی پەیوەندییە زانستی و ئەكادیمییەكان لەنێوان زانكۆكانی ئێران و زانكۆی سلێمانیدا .


 





 2021-08-23
 767