لە رۆژی جیهانی فەلسەفەدا، زانكۆی سلێمانی سیمپۆزیۆمێكی هاوبەشی سازكرد



لە رۆژی جیهانی فەلسەفەدا، زانكۆی سلێمانی سیمپۆزیۆمێكی هاوبەشی سازكرد

 [email protected]

ئەمڕۆ 15-11-2021، بەبۆنەی رۆژی جیهانی فەلسەفەوە، كۆلێجی پەروەردەی بنەڕەتی زانكۆی سلێمانی، بە هاوبەشی زانكۆی ڕاپەڕین لەژێر ناونیشانی "رەهەندەكانی فەلسەفەی زانست " لە هۆڵی ئیسماعیل بێشكچی، كۆلێجی پەروەردەی بنەڕەت، سیمپۆزیۆمێكی ئەنجامدا.
لە سەرەتای سیمپۆزیۆمەكەشدا لە لایەن د. ئازاد حەمە، وتەی پێشەكی سیمپۆزیۆمەكە پێشكەشكرا، كە تێدا كورتەیەكی لەسەر مێژووی فەلسەفەو پەیوەندی فەلسەفە و زانستە سروشتییەكان خستەڕوو، كە تێدا بە روونی باسی لە پێشینەی زانستە سروشتییەكان كرد كە سەرجەمیان پێشینەیەكی فەلسەفییان هەیە، هەر لە زانستی پزیشكییەوە، تاكو زانستەكانی فیزیا و كیمیا و ئەندازیاری ..هتد.
پاشان وتەی سەرۆكایەتی زانكۆی سلێمانی لەلایەن پڕۆفیسۆر د. كاوە عبداللە یاریدەدەری سەرۆكی زانكۆ بۆ كاروباری زانستییەوە پێشكەشكرا، كە تێیدا بە كورتی باسی لە پەیوەندی پتەو و  دێرینی فەلسەفەو زانستە سروشتییەكان كرد،  هەروەها خۆشحاڵی خۆشی پیشاندا، كە لە رۆژی فەلسەفەدا سیمپۆزیۆمێك لەسەر پەیوەندی نێوان فەلسەفەو زانستە سروشتییەكان ئەنجامدەدرێت، كە تێدا كەسانی شارەزا لە هەدوو بوارەكەدا بەوردی شیكردنەوە بۆ ئەو پەیوەندییانە دەكەن و گفتوگۆی زانستییانەی لەسەر ئەنجامدەدەن.
 
دواتر بەشی یەكەمی سیمپۆزیۆمەكە دەستیپێكرد، كە تێیدا؛
د. حسن حسین ، باسی لە فەلسەفەی زانست و بابەتەكانی كرد، هەروەها د. هەژار معروف باسی لە فەلسەفەی پزیشكی كرد، د. حسین رابی بابەتێكی لەسەر (Induvtive vs. deduvtive reasoning and scientific  revolution)  پێشكەشكردو  د. محمد طاهیر باسی لە فەلسەفەی زانست و مێژووی كیمیا كرد.
 
لە بەشی دووەمی سیمپۆزیۆمەكەدا؛ 
د. ئەیاد محمد، باسی لە (Phi) لە ئاین-دا كرد، هەروەها د. ئازاد حەمە بابەتێكی لەسەر هیچ(nothing)  لە فەلسەفەدا پێشكەشكرد، د. عباس مصطفی باسی لە پراگماتیزم (Pragmatism)  لە زماندا كرد، مامۆستا كۆرش ئارارات، بابەتێكی لەسەر رەهەندەكانی هۆشمەندی لە فیزیای بایۆلۆجیدا پێشكەشكرد.
 
لە كۆتایی سیمپۆزیۆمەكەدا، دەرگای گفتوگۆ بۆ ئامادەبووان كرایەوەو گفتوگۆ لەسەر كۆی بابەتەكان كرا.
 




 2021-11-15
 459