لە هەفتەیادی دامەزراندنی سلێمانی لە زانكۆی سلێمانی، چەند چالاكییەك بەڕێوەچوو



لە هەفتەیادی دامەزراندنی سلێمانی لە زانكۆی سلێمانی، چەند چالاكییەك بەڕێوەچوو

 [email protected]

بۆ یادی 237 ساڵەی دامەزراندنی شاری سلێمانی و یادی دووبارە بنیاتنانەوەی زانكۆی سلێمانی لە ساڵی 1992 دا كۆلێجی زانستەمرۆڤایەتییەكانی زانكۆی سلێمانی چەند چالاكی ئەنجامدا.


ئەمڕۆ 21-11-2021، بە بۆنەی یادی 237 ساڵەی دامەزراندنی شاری سلێمانی "پایتەختی رۆشنبیری"، هەمان كات ساڵیادی دووبارە دامەزراندنەوەی زانكۆی سلێمانی لەوشارە، بە ئامادەبوونی پرۆفیسۆر د. رضا حسن حسين سەرۆكی زانكۆی سلێمانی و د. كاوە عبداللە یاریدەدەری سەرۆكی زانكۆ بۆ كاروباری زانستی و د. كاوە جمال یاریدەدەری سەرۆكی زانكۆ بۆ كاروباری كارگێڕی و دارایی و ژمارەیەكی بەرچاو لە مامۆستایان و خوێندكاران، لە هۆڵی كۆماری كوردستانی كۆلێجی زانستە مرۆڤایەتییەكان چەند چالاكییەك بەڕێوەچوو.

 

سەرەتای رێورەسمەكەش بە ساتێك وەستان بۆ رۆحی پاكی شەهیدان دەستیپێكرد، پاشان لەلایەن پرۆفیسۆر د. رضا حسن حسين سەرۆكی زانكۆی سلێمانی وتاری سەرۆكایەتی زانكۆ بەو بۆنەیەوە خوێنرایەوەو تێدا بە كورتی باسی لە مێژووی دامەزراندنی شاری سلێمانی و ئەو سەروەرییانە كرد، كە خەڵكی ئەم شارە لە مێژووی شۆڕشە یەك لەدوایەكەكانی میللەتەكەماندا تۆماری كردوون، كە هەمیشە سلێمانی و خەڵكەكەی پێشەنگی گۆڕانكاری و سەرمەشقی گیانفیدایی و قوربانیدان بوون بۆ ئەم میللەتە، هەمان كات سلێمانی بەهۆی بوونی چەندین زاناو شاعیرو نووسەرو كەسایەتی رۆشنبیرو روناكبیر، بە پایتەختی رۆشنبیری هەرێم ناسێنراوە، لەسەر ئاستی هەرێمی كوردستان و عیراقیش، شاری سلێمانی یەكێكە لە شارە زیندوو جوانەكان ، كە جێگەی سەرنجی زۆر لە كەسایەتی و رۆشنبیر و شاعیرو كەسانی تری بیانی بووە، كە لە بەرهەم و نووسینەكانیاندا وەسفی جوانی ئەم شارە رەنگی داوەتەوە، وتیشی: شاری سلێمانی یەكەم شاربووە لەسەر ئاستی هەرێمی كوردستان، كە بۆیەكەمجار زانكۆی تێدا كراوەتەوە، كە ئەمەش یەكێكی ترە لە مێژووە جوانەكانی ئەم شارە.


سەرۆكی زانكۆی سلێمانی راشیگەیاند: لەگەڵ یادی دامەزاراندنی ئەم شارەدا، لە 14ی 11 هەموو ساڵێك یادی دووبارە بنیاتنانەوەی زانكۆی سلێمانی دەكەینەوە كە بە هیمەتی دڵسۆزان و زانستخوازان، لەساڵی 1992 دا بنیاتنرایەوە، چونكە پێشتر لە ساڵی 1981 دا، بە پیلانێكی شۆڤێنییانەی رژێمی ئەو كاتەی عیراق، ئەم زانكۆیە داخراو گواسترایەوە بۆ شاری هەولێرو ناوەكەی گۆڕدرا بە زانكۆی سەڵاحەدین.


دواتر لە پانێڵكدا لەلایەن سێ مامۆستای بەشی مێژووی كۆلێجی زانستە مرۆڤایەتییەكانەوە، چەند بابەتێكی زانستی لەسەر مێژووی دروستبوونی شاری سلێمانی و زانكۆی سلێمانی پێشكەشكرا.

 

 




 2021-11-21
 697