سەرۆكی زانكۆ لەگەڵ ڕاگرو یاریدەدەری ڕاگرو سەرۆك بەشەكانی زانكۆی سلێمانی كۆبووەوە



سەرۆكی زانكۆ لەگەڵ ڕاگرو یاریدەدەری ڕاگرو سەرۆك بەشەكانی زانكۆی سلێمانی كۆبووەوە

 kosar othman([email protected])

ئەمڕۆ 1-12-2021، پرۆفیسۆر د. رضا حسن حسین ، سەرۆكی زانكۆی سلێمانی و یاریدەدەرانی سەرۆكی زانكۆ و ئەندامانی ئەنجومەنی زانكۆ، لەگەڵ یاریدەدەری راگر و سەرۆك بەشەكانی زانكۆی سلێمانی كۆبوونەوە.

لەو كۆبوونەوەیەدا سەرۆكی زانكۆی سلێمانی وتی خۆم بەخۆشحاڵ دەزانم كە لەگەڵ ئێوە لەنزیكەوە دادەنیشم گوێ لەداواكاری و كێشەكانتان دەگرم وتیشی من وام دانابوو كەساڵانە بەلایەنی كەمەوە دوو جار لەگەڵ ئێوە كۆببمەوە بەڵام لەبەر كۆرۆنا نەمانتوانی لەساڵانی پێشوو ئەو كۆبونەوانە ئەنجام بدەین.

باسی لەوەشكرد كە ساڵی پار لەڕوویی داراییەوە لەئەزمەیەكی گەورەی داریدا بوون بەڵام بەهەوڵ و ماندوبوونی راگر و یاریدەدەری راگرو سەرۆك بەش و مامۆستایان ئەو ساڵەشمان تێپەڕاند، وتیشی بەپێویستی دەزانم كە لێرەوە سوپاسی یەك بەیەكتان بكەم كە بەشداربوون لەبەرەو پێشچوونی زانكۆی سلێمانی،چونكە ئێمە دەزانین كە سەرۆك بەش ئەركێكی زۆریان لەسەرە بەبێ ئەوەی هیچ شایستەیەكی داراییان هەبێت.

سەرۆكی زانكۆی سلێمانی وتیشی ئەمساڵ هەوڵێكی زۆرماندا كە بەشێكی داهاتی زانكۆ بگەڕێتەوە بۆ زانكۆ لە 30-9 ئەو بڕیارە جێبەجێكرا كە دەتوانین لەو بڕە پارەیە بەشەوانەی ئێوارانی مامۆستایان و هەندێك پێداویستی پێ دابین بكەین كەموكوڕیەكانی زانكۆ بەپێی گرنگییان پڕبكەینەوە.

هەر لەو كۆبوونەوەیەدا سەرۆكی زانكۆو یاریدەدەری سەرۆكی زانكۆ بۆ كاروباری خوێندكاران باسیان لەو بارودۆخە كرد كە لە چەند رۆژی رابردودا روویدا، كە تێیدا خوێندكارانی زانكۆ بۆ داواكردنی دەرماڵە خۆپیشاندانیان ئەنجامدا، وتیشی: هەرلەسەرەتای داواكارییەكانی خوێندكاران سەرۆكایەتی زانكۆی سلێمانی و ئەنجومەنی زانكۆ، پشتگیری تەواوی داواكارییە رەواكانی خوێندكاران بوون و پێشتریش بە چەندین نووسراو داواكاری فەرمی، سەرو خۆمان لێ ئاگاداركردووەتەوە، هەمیشەش وتومانە خۆپیشاندان مافێكی رەوای خوێندكارانە، بەڵام بەشێوەیەكی هێمانەو دور لە توندوتیژی.

سەرۆكی زانكۆی سلێمانی راشیگەیاند: هەر بۆ مەبەستی هێوركردنەوەی دۆخەكەو داواكاری كەسوكاری خوێندكاران ئەنجومەنی زانكۆی سلێمانی پشت بەست بەو دەسەڵاتانەی بەپێی یاسا پێی دراوە، ماوەی چەند رۆژێك دەوامی خوێندنی لە زانكۆ راگرتووە.

باسی لەوەشكرد كە ئێمە هەوڵەكانمان بۆ چارەسەركردنی كێشەی خوێندكاران چڕ كردەوە هەر لەگەڵ سەرۆكی حكومەت و پەرلەمان و سەرۆكی لایەنە سیاسیەكان چەندین دیدار رێكخرا بۆ لەنزیكەوە ئاگاداربوون لەكێشەو داواكاری خوێندكاران: داواشی كرد كە هەمووان ئەو خوێندكارانە بە كوڕو كچی خۆیان بزانن و گۆێ لەداواكارییەكانیان بگرن چونكە ئایندەی ئەم وڵاتە لەدەستی ئەواندا دەبێت.

لەكۆتایی كۆبوونەوەكەشدا گوێیان بۆ داواكاری و پێشنیارەكانی ئامادەبووان گرت و پێیان ڕاگەیاندن كە ئەوەی لەدەسەڵاتی ئەماندا بێت بۆیان چارەسەر دەكەن.

 

 

 





 2021-12-01
 1422