لە زانكۆی سلێمانی هەڵمەتی باوەشێكی سەوز بۆ زانكۆ بەڕێوەدەچێت



لە زانكۆی سلێمانی هەڵمەتی باوەشێكی سەوز بۆ زانكۆ بەڕێوەدەچێت

 [email protected]

لە چوارچێوەی پێواژۆی بۆڵۆنیادا، وانەی ژینگەی كاری زانكۆیی، كە هەموو ساڵێك خوێندكارانی قۆناغی یەكەمی سەرجەم كۆلێجەكانی زانكۆ تێیدا فێری كاری خۆبەخشی و ژینگە دۆستی دەكرێن، بۆ ئەمساڵیش لەژێر ناوی "باوەشێكی سەوز بۆ زانكۆ"، هەڵمەتێكی فراوانی چاندنی نەمام لە چواردەوری كەمپی نوێی زانكۆی سلێمانی ، لەلایەن خوێندكارانی قۆناغی یەكەمی سەرجەم كۆلێژەكانەوە بەڕێوەچوو.  

پرۆفیسۆری یاریدەدەر د. رێژین هارون لێپرسراوی پێواژۆی بۆڵۆنیا لە زانكۆی سلێمانی  رایگەیاند: لە چوارچێوەی پێواژۆی بۆڵۆنیادا، ماوەی چەند ساڵێكە وانەیەكمان هەیە بەناوی ژینگەی كاری زانكۆیی ، كە هەموو ساڵێك خوێندكارانی قۆناغی یەكەم دێن، لەو وانەیە هەفتەیەكیان باسی كاری خۆبەخشی و كلتوری پەیوەست بوون بە ژینگەوە دەكات، كە هەم فێری كاری خۆبەخشی دەكرێن، هەم فێری ژینگە دۆستی دەكرێن، لەبەر ئەوەی لیژنەیەكی باڵا لەسەر ئاستی زانكۆی سلێمانی بۆ ئەو مەبەستە دروستكراوە ، كە ئەو لیژنەیە هەڵدەستێت بە دابینكردن و كارئاسانی بۆ ئەو پرۆسەیە، كە ماوەی هەفتەیەك دەخایەنێت .
 
وتیشی: لیژنەكە پێكهاتوون لە مامۆستایانی كۆلێژەكانی ئەندازیاری و فەرمانبەران و مامۆستایانی كۆلێژی كشتوكاڵ و  هەروەها مامۆستایانی چەندین كۆلێژی تری زانكۆ كە پێكەوە كار دەكەین ، هەروەها وتی: بۆ جێبەجێكردنی پرۆسەكەش بە پراكتیكی لەلایەن زانكۆوە ئەو شوێنانەی كە هەن و پێویستیان بە سەوزكردن هەیە دەكرێنە ئامانج .
 
ئاماژەی بەوەشدا، ئەم پرۆسەیە لە ساڵی 2019 ەوە دەستیپێكردووەو ئەمە سێیەمین جارە ئەم پرۆسەیە بەڕێوەدەچێت، كە راستەوخۆ خوێندكارانی خۆشەویست تێیدا بەشداربوون ، بۆ ئەمساڵیش هەڵمەتەكەمان ناونا "باوەشێكی سەوز بۆ زانكۆ"، ئەمەش لەبەر ئەوەی ویستمان پشتێنەیەك "سیاجێك" لە درەخت لە پشتەوەی كەمپی زانكۆ دروست بكەین ، كە هەم بۆ دامەزراندنی پشتێنەیەكی سەوز بۆ زانكۆ هەم بۆ بابەتی كەمكردنەوەی رەشەبا .
 
د. رێژین راشیگەیاند: لە پڕۆسەكەی ئەمساڵیشدا سەرجەم خوێندكارانی قۆناغی یەكەمی هەموو كۆلێژەكان بەشداردەبن، بۆئەوەی فێری كلتوری ئینتماو پەیوەست بوون و خۆشەویستی بۆ زانكۆ چاندنی نەمامێك بێت، لەو رێگەیەوە خۆشەویستی بۆ ژینگەو زانكۆ و وڵاتەكەی لادروستبێت و گەشە بكات.
 
هەرلەو هەڵمەتەدا دەیان نەمام لەلایەن خوێندكارانی قۆناغی یەكەمی سەرجەم كۆلێژەكانی زانكۆی سلێمانییەوە چاندرا، كە تێیدا پشتێنەیەكی سەوز بەدەوری كەمپی نوێی زانكۆی سلێمانی دروست كرا.
 
 
 




 2021-12-19
 1474