پیرۆزبایی سەرۆكی زانكۆی سلێمانی لە رۆژی جیهانیی زمانی دایك



پیرۆزبایی سەرۆكی زانكۆی سلێمانی لە رۆژی جیهانیی زمانی دایك

 [email protected]

بەبۆنەی رۆژی جیهانیی زمانی دایك سەرۆكی زانكۆی سلێمانی پیرۆزبایی لە سەرجەم خەڵكی كوردستان و سەرجەم نەتەوەو پێكهاتەكانی كوردستان دەكات، كە ئەمە دەقەكەیەتی: 

 
بەبۆنەی رۆژی جیهانیی زمانی دایك، پیرۆزباییەكی گەرم لە خەڵكی خۆشەویستی كوردستان و سەرجەم نەتەوە و پێكهاتەكانی كوردستان دەكەم.
 
زمانی ئێمە، شوناسی ئێمەیە و دەبێت بیپارێزین، لەناوچوونی زمانەكەمان واتە لەناوچوونی نەتەوەكەمان، ئێمەی نەتەوەی كورد بەدرێژایی مێژوو خەباتمان كردووە و قوربانمان داوە لەپێناو ئازادی و سەربەخۆییدا، بەشێكی گرنگ لەشوناسی نەتەوەیی ئێمە زمانمانە، بۆیە ئەركی هەموومانە پارێزگاری لە زمانی شیرینی كوردی بكەین. پەرەی پێبدەین و سنوورەكانی بەكارهێنانی فراوان بكەین. بوونی ئێمە وەك مرۆڤێكی خاوەن شوناس و نەتەوە، پەیوەستە بە پاراستنی زمانەكەمان و هەموو هەوڵێكیش لەپێناو كوردستان و دۆزە رەواكانیدا، بەبێ پاراستنی زمانی دایكمان بێئەنجام دەبێت.
 
لەم پێناوەشدا زانكۆی سلێمانی زانكۆی (دایك)، وەك دامەزراوەكی ئەكادیمی و زانستی گرنگ لە هەرێمی كوردستاندا، هەرلەسەرەتای دامەزراندنییەوە، لەرووی ئەكادیمی و زانستییەوە هەوڵی پاراستنی زمانی كوردی داوە، كە لە كۆلێجی زمانی زانكۆ و لە رێگەی  خوێندنی وانەی كوردۆلۆجی كە لە هەموو كۆلێج و بەشەكانی زانكۆ زمانی كوردی بەشێوەیەكی زانستی هاوشێوەی وانەكانی تر دەخوێندرێت ، ئەمەش لە پێناو زیاتر برەودان بە زمانی شیرینی دایك و فراوانكردنی سنوورەكانی بەكارهێنانی .
 
بۆیە هەرلەم یادە پیرۆزەدا بەناوی سەرۆكایەتی زانكۆی سلێمانی و ئەنجومەنی زانكۆی سلێمانییەوە، پیرۆزباییەكی گەرم ئاڕاستەی سەرجەم مامۆستایان و خوێندكاران و فەرمانبەرانی زانكۆمان و سەرجەم هاووڵاتییانی كوردستان دەكەین.
 
دووبارە پیرۆزە.. 
 
 
      پرۆفیسۆر 
د. رضا حسن حسین 
سەرۆكی زانكۆی سلێمانی
 

 





 2022-02-21
 1751