ئاڵوگۆڕ لە پۆستى سەرۆکى زانکۆى سلێمانى ئەنجامدرا



ئاڵوگۆڕ لە پۆستى سەرۆکى زانکۆى سلێمانى ئەنجامدرا

 kosar othman([email protected])

 وەزیرى خوێندني باڵا : زانکۆى سلێمانى ناوەندێکى گرنگى ئەکادیمى و زانستییە لە ناوچەکەدا

بە ئامادەبونى (د. ئارام محمد قادر) وەزیرى خوێندنى باڵا و توێژینەوەى زانستى، ئاڵوگۆڕى پۆستى سەرۆکى زانکۆى سلێمانى بەڕێوەچو، کە (د. کۆسارمحمد عەلى) لە شوێنى (د. ڕەزا حەسەن) وەک سەرۆکى نوێى زانکۆى سلێمانى دەستبەکاربو.

ئەمڕۆ پێنجشەمە ڕێکەوتى 2022/6/16بەئامادەبونى وەزیرى خوێندنى باڵا و توێژینەوەى زانستى و سەرۆک و ئەندامانى ئەنجومەنى زانکۆى سلێمانى و ڕاوێژکارو بەڕێوەبەرانى گشتى وەزارەت، لە ڕێوڕەسمێکى تایبەتدا لە ئەنجومەنى زانکۆ، ئاڵوگۆڕ لە پۆستى سەرۆکى زانکۆى سلێمانى ئەنجامدرا.

لە وتەیەکدا وەزیرى خوێندنى باڵا و توێژینەوەى زانستى هەوڵ و کارەکانى سەرۆکى پێشوى زانکۆى سلێمانى بەرز نرخاند کە کار و پرۆژەکانى لەماوەى ڕابردو بۆ خزمەتکردنى زانکۆ و پەرەپێدانى سێکتەرى خوێندنى باڵا لە هەرێمى کوردستان و سلێمانى دیارو بەرچاوە، بۆ ئەمەش داواى لە ئەندامانى ئەنجومەنى زانکۆى سلێمانى کرد وەک یەک تیم پاڵپشتى لە سەرۆکى نوێى زانکۆ بکەن بۆ تەواوکردنى ئەرک و پرۆژە زانستییەکان. هەر لە وتەکەیدا د. ئارام محمد قادر ئاماژەى بە دەستکەوتە زانستییەکانى زانکۆى سلێمانى کرد کە رۆژ دواى رۆژ باشتر لەسەر نەخشەى ئەکادیمیاى جیهانى دەدرەوشێتەوەو لە ڕیزبەندى جیهانى زانکۆکاندا زانکۆى سلێمانى پێشەنگى زانکۆکانە، ئەمەش مایەى شانازییە بۆ زانکۆ و شارى سلێمانى و تەواوى زانکۆکانى ترى ناوچەکە.

هەروەک وتیشى لە هەمو قەیران و ئاڵنگارییەکاندا زانکۆى سلێمانى توانیویەتى ڕوبەڕویان بوەستێتەوەو نەهێڵێت پرۆسەى خوێندن و ڕەوتى گەشەپێدانى زانست و مەعریفە لە زانکۆ بوەستێت و هەمیشە زانکۆى سلێمانى ببێتە ڕویەکى جوانى شارى سلێمانى و ئاسودەکردنى خوێنى شەهیدان کە خەباتیان بۆ سەرخستنى کارەکانى زانکۆ و پێشکەوتنى ئەم شارە کردوە. لە بەشێکى دیکەى وتەکەیدا لە ڕێوڕەسمى ئاڵوگۆڕى پۆستى سەرۆکى زانکۆى سلێمانى، د. ئارام محمد قادر ڕایگەیاند: بەو پێیەى زانکۆى سلێمانى ناوەندێکى گرنگى ئەکادیمى و زانستییە، خەڵکى سلێمانى و هەرێمى کوردستان و کۆمیونیتى ئەکادیمى چاویان لە ئەرک و پرۆژەو کارى زانستى زیاترە لە زانکۆ و پاراستنى دەستکەوتەکانى ئەم زانکۆیە لە ڕوى زانستى و پێشکەوتنەوە. بۆیە هیوادارین لەگەڵ دەستبەکاربونى سەرۆکى نوێى زانکۆ ئەم زانکۆیە لەسەرجەم ڕوەکانەوە زیاتر پێشکەوێت و سەربەخۆیی تەواویان بۆ دەستەبەربکرێت و دەست کراوە بن بۆ ئەنجامدانى پرۆژەى گرنگى ئەکادیمى. هەر لە ڕێوڕەسمەکەدا هەریەک لە د. ڕەزا حەسەن سەرۆکى پێشوى زانکۆ و د. کۆسارمحمد عەلى سەرۆکى نوێى زانکۆ لە دو وتەى جیادا ئاماژەیان بە رۆڵ و پێگەى زانکۆى سلێمانى لە هەرێمى کوردستان و عێراق و ناوچەکە کردو دوپاتیان کردەوە وەک هەمیشە لەناو زانکۆ و دەرەوەى زانکۆ لە خزمەتکردنى زانکۆ و پێشخستنى زانکۆى سلێمانى درێغى ناکەن و ئەوەى لەتواناى ئەواندابێت بۆ پێشکەوتنى ئەم زانکۆیە بەردەوام دەبن.

 

 





 2022-06-16
 2086