سەرۆكی زانكۆی سلێمانی رێزلێنان دەبەخشێتە مامۆستایەكی بەشی فیزیای كۆلێجی زانست



سەرۆكی زانكۆی سلێمانی رێزلێنان دەبەخشێتە مامۆستایەكی بەشی فیزیای كۆلێجی زانست

 [email protected]

ئەمڕۆ سێشەممە 27-9-2022، لە رێورەسمێكدا پرۆفیسۆر د. كۆسار محمد سەرۆكی زانكۆی سلێمانی ، رێزلێنانی بەخشییە پرۆفیسۆری یاریدەدەر د. بروسكە عبداللە ئەژدەر مامۆستا لە كۆلێجی زانست بەشی فیزیا، لە پای ئەنجامدانی توێژینەوەیەكی سەركەوتوو لە بواری تەكنەلۆژیای نانۆدا، كە بۆ یەكەمجارە لەسەر ئاستی هەرێمی كوردستان و عیراقدا بەشێوەیەكی سەركەوتوو ئەنجامدرابێت.
توێژینەیەوەكەی د. بروسكە عبداللە لە بواری تەكنەلۆژیای نانۆ-دایە، كە بۆ یەكەمجار بەسەركەوتوویی لە زانكۆی سلێمانی ئەنجامدراوە، كە تایبەتە بە هەستەوەری شێ لە ماددەی نانۆیی باریۆم- فیرایت بەدوو ستراكچەری جیاواز. 
ئاڵنگاریی سەرەكی لەبەردەم ئەم توێژینەوەیەدا، بریتی بووە لەجیاكردنەوەی پراكتیكی دوو ستراكچەری بلوری (كریستاڵی) باریۆم (تاك فیرایتی و شەش فیرایتی) و دروستكردنی هەستەوەری شێ لە هەریەكە لەو دوو ستراكچەرە، لەگەڵ پشكنینی هەستیاریی هەستەوەرەكان لە مەودای شێی (30-90%)، خەسڵەتی نەگەیەنەریشی بۆ ئەو مەودای شێیە و پلەی گەرمی (25-600 پلەی سەدی) و لەرەلەری (10كیلۆ- 2مێگا هێرتز).
ئەنجامی ئەم توێژینەوەیە، داهێنانی زاراوەیەكی نوێ و ناوازەیە لەلایەن زانكۆی سلێمانییەوە بەناوی (Humidito-dielectric)، كە بۆ یەكەمجار لەسەر ئاستی جیهان زاراوەكە بۆ فەرهەنگی زانستی سەربار كرا، مەبەست لە زاراوەكە لێكۆڵینەوەو لێكدانەوەی گۆڕانكارییەكانی سیفەتە كارەباییەكی ماددەی نانۆییە لەژێر كاریگەری ڕێژەی جیاوازی شێدا.
هەرلەو رێورەسمەدا سەرۆكی زانكۆی سلێمانی سوپاسی پرۆفیسۆری یاریدەدەر د. د. بروسكە عبداللە-ی كردو هیوای سەركەوتنی زیاتری بۆ خواست لە كارە زانستییەكانیدا، هەمان كات بەڵێنی هاوكاری و پشتگیری زیاتری پێدا، راشیگەیاند: بوونی مامۆستاو داهێنەری وەك د. بروسكە عبداللە بۆ زانكۆی سلێمانی و وڵاتەكەمان جێگای فەخرو شانازییە.
 ئەم توێژینەوەیە دەروازەیەكی نوێی لەبەردەم توێژەرانی چەندین بواردا واڵاكردوە، وەك بوارەكانی ئەلیكترۆنیك و پزیشكی و ژینگە و كشتوكاڵ ...هتد
 پرۆفیسۆری یاریدەدەر، د. بروسكە عەبدوڵڵا ئەژدەر، مامۆستا لە كۆلێجی زانست بەشی فیزیا، هاوڕێ لەگەڵ مامۆستا سەروەر حەسەن، توێژەر لەكۆلێژی ئەزمەڕ بۆ بەهرەداران (وەزارەتی پەروەردە)، توێژینەوەكەیان ئەنجامداوە و ئەنجامەكانی توێژینەوەكەیان لەگۆڤارێكی نێودەوڵەتی ڕەسەنی ئاست-بەرزدا (Results in Physics) بڵاوكردووەتەوە، كە فاكتەری كاریگەریی (4.5)ـە.
 




 2022-09-27
 391