كارە كارگێڕییەكانی زانكۆی سلێمانی بە ئەلیكترۆنی دەكرێت



كارە كارگێڕییەكانی زانكۆی سلێمانی بە ئەلیكترۆنی دەكرێت

 kosar othman([email protected])

  سەرجەم كارە كارگێڕییەكان لە زانكۆی سلێمانی بە ئەلیكترۆنی دەكرێت، ئەوەش لەپێناوی كەمكردنەوەی رۆتین‌و خێرا رایكردنی كارە كارگێڕییەكانی زانكۆ.

ڕۆژی سێشه‌ممه‌ ڕێكه‌وتی 27-9-2022 پرۆفیسۆر دكتۆر كۆسار محەمەد سەرۆكی زانكۆی سلێمانی لەگەڵ بەڕێوەبەری ته‌كنه‌لۆژیای زانیاری و ئامار و لیژنەیەك لە وەزارەتی خوێندنی باڵاو توێژینەوەی زانستی كۆبوونەوەیەكی ئەنجامدا، كە تایبەت بوو بە كارەكانی بە ئەلیكترۆنیكردنی سیستمی كارگێڕی زانكۆی سلێمانی.

لەكۆبوونەوەكەدا توانا سەعید عەلی به‌ڕێوه‌به‌ری به‌رێوه‌به‌رایەتی ته‌كنه‌لۆژیای زانیاری و ئاماری زانكۆی سلێمانی سوپاسی لیژنه‌ی چالاككردنی سیستمی (mhe-erp) کرد، كه‌ له‌ وه‌زاره‌تی خوێندنی باڵاوه‌ هاتبوونە زانكۆی سلێمانی به‌ مه‌به‌ستی ئه‌نجامدانی وۆركشۆپێك ده‌رباره‌ی ئه‌وه‌ی چۆن بتوانن سه‌رجه‌م كاره‌ كارگێڕییه‌كان له‌ زانكۆدا به‌ ئه‌لكترۆنی بكرێت.

لای خۆیشییەوە، سەرۆکی زانکۆی سلێمانی پشتیوانی خۆی و زانکۆی سلێمانی بۆ جێبەجێکردنی تەواوی سیستەمەکە لەزانکۆی سلێمانی دوپاتکردەوە و سوپاسی وەزارەتی خوێندنی باڵا و سەرپەرشتیارانی سیستەمەکەی کرد. لیژنه‌كه‌ی وه‌زاره‌تی خوێندنی باڵا پێكهاتبوو له‌ دكتۆر ئیسماعیل یه‌عقوب و مامۆستا ئاسۆ خه‌لیل و مامۆستا دانا.

سیسته‌مه‌كه‌ له‌ ساڵی (2017)ه‌وه‌ به‌ فه‌رمانی قوباد تاڵه‌بانی جێگری سه‌رۆكی حكومه‌ت و وه‌زیری پیشووتری وه‌زاره‌تی خوێندنی باڵا دکتۆر یوسف گۆران بڕیاری له‌سه‌ر دراوه‌ له‌ ئێستادا له‌ دیوانی وه‌زاره‌تی خوێندنی باڵا و (14) چوارده‌ زانكۆ كارایه‌.





 2022-09-28
 591