سەرۆكی زانكۆی سلێمانی تاقیگەی فانتۆم لە كۆلێجی پزیشكی ددان دەكاتەوە



سەرۆكی زانكۆی سلێمانی تاقیگەی فانتۆم لە كۆلێجی پزیشكی ددان دەكاتەوە

 [email protected]

 لە ژێر چاودێری راستەوخۆی پرۆفیسۆر د. كۆسار محمد سەرۆكی زانكۆی سلێمانی و بە ئامادەبوونی ژمارەیەكی بەرچاو لە مامۆستایان و خوێندكارانی كۆلێجی پزیشكی ددانی زانكۆی سلێمانی لە رێورەسمێكدا تاقیگەی (فانتۆم)، لە زانكۆی سلێمانی كرایەوە، كە بۆ یەكەمجارە، ئەم تاقیگەیە لە كۆلێجی پزیشكی زانكۆی سلێمانی دەكرێتەوە.

لەو بارەیەوە د. هاوژین مەسعود بەكاربەری بەشی چارەسەركردنی ددان لە كۆلێجی پزیشكی ددانی زانكۆی سلێمانی رایگەیاند؛ بۆ یەكەمجارە تاقیگەی (فانتۆم)، لە كۆلێجی پزیشكی ددانی زانكۆی سلێمانی دەكرێتەوە، كە یەكێكە لە پێوستییە هەرە گرنگەكان بۆ هەر خوێندكارێكی كۆلێجی پزیشكی ددان، چونكە پێش ئەوەی خوێندكارلە ناو دەمی نەخۆشدا دەست بە كاركردن بكات پێویستە لەسەر مۆدێلێك كە هاوشێوەی نەخۆشی ئاساییە بە شێوازی پراكتیكی كۆرسێك ببینێ، كە چۆن كار لەسەر ددانەكان دەكات لە شێوازی پڕكردنەوەو پاككردنەوەو بچوك كردنەوەیان، ئەمەش بۆ ئەوەیە كە كاتی كاركردن بە شێوەیەكی پراكتیكی لەسەر دەم وددانی نەخۆش، خوێندكار تووشی هیچ گیروگرفتێك نەبێت، بە تایبەت لە قۆناغەكانی چوار و پێنجی خوێندنیدا، كە ئەو كات راستەوخۆ لەسەر نەخۆشی ئاسایی كاردەكات، وتیشی: ئێمە لە رێگەی ئەم تاقیگەیەوە راهێنانێكی باش بە خوێندكارانی قۆناغەكانی دووەم و سێیەمی كۆلێجی پزیشكی ددان دەكەین، لەسەر ئەو فانتۆمانەی كە هاوشێوەی نەخۆشی ئاسایین بۆ ددانەكان و بەشەكانی دەم، بۆیە لەرێگەی راهێنانەكانەوە لەسەری وا لە خوێندكاردەكرێت لەكاتی پراكتیزە كردنی كارەكەی لەسەر نەخۆشی ئاسایی لە قۆناغەكانی چوارو پێنجدا، كەمترین گرفتی بۆ دروست ببێت.

لەگەڵ كردنەوەی تاقیگەكە پرۆفیسۆر د. كۆسار محمد سەرۆكی زانكۆی سلێمانی چەند بەش و تاقیگەیەكی تری كۆلێجی پزیشكی ددانی بەسەر كردەوە كە شێوازێكی مۆدێرن و سەردەمییانە دروستكراون و ئامادەن بۆ ئەوەی خوێندكار بتوانێت راهێنانیان تێدابكات.

 





 2022-10-28
 667