مامۆستایەكی زانكۆی سلێمانی بەهاوكاری دوو مامۆستای زانكۆكانی دهۆك و بابل كتێبێكی گرنگ ئامادە دەكات و دەبێتە پڕۆگرامی خوێندن لە كۆلێژی یاسا



مامۆستایەكی زانكۆی سلێمانی بەهاوكاری دوو مامۆستای زانكۆكانی دهۆك و بابل كتێبێكی گرنگ ئامادە دەكات و دەبێتە پڕۆگرامی خوێندن لە كۆلێژی یاسا

 kosar othman([email protected])

 پڕۆفیسۆر د. محەمەد جەلال، مامۆستای كۆلێژی یاسای زانكۆی سلێمانی، بە هاوكاری هەریەك لە پڕۆفیسۆر د.عەبدوڵا فازڵ میرانی مامۆستا لە كۆلێژی یاسای زانكۆی دهۆك و پڕۆفیسۆر د.عەبدولڕەسوڵ عەبدولڕەزا ئەسەدی مامۆستا لە كۆلێژی یاسای زانكۆی بابل، كتێبێك بە زمانی عەرەبی ئامادە دەكەن بە ناونیشانی (یاسای نێودەوڵەتی تایبەت لە ناكۆكی یاساكان و ناكۆكی تایبەتمەندی دادوەریی نێودەوڵەتی و جێبەجێكردنی حكومە بیانییەكان) و كتێبەكەش لەلایەن ڕێبوار محەمەد ڕەشید مافپەروەر و شارەزای دادوەری، وەرگێڕدراوەتە سەر زمانی كوردی.

ئەم كتێبە بەهۆی گرنگییەكەیەوە بووەتە پڕۆگرامی خوێندنی خوێندكارانی كۆلێژی یاسای زانكۆی سلێمانی و چەندین زانكۆی دیكە. د. محەمەد جەلال، پڕۆفیسۆر لە یاسای نێودەوڵەتی تایبەت لە كۆلێژی یاسای زانكۆی سلێمانی، بە سایتی زانكۆی راگەیاند: كتێبەكە لەبارەی بابەتی ناكۆكی نێودەوڵەتی یاساكانە كە لە گرنگترین بابەتەكانی یاسای نێودەوڵەتی تایبەتە، كە وەزیفەیەكی سەرەكی هەیە بۆ دیاریكردنی ئەو یاسایەی كە پێویستە پەیڕەو بكرێت لە نێوان چەند یاسایەكی ناكۆكدا، هەروەها بۆ دیاریكردنی تایبەتمەندی نێودەوڵەتی دادگا نیشتمانییەكان، جگەلەوەش تاچەند یاسادانەری نیشتمانی رێگە دەدات بە جێبەجێكردنی حكومە دادوەرییە بیانییەكان، لەكاتێكدا یاسادانەری عێراقی تایبەتمەندی دادوەری نێودەوڵەتی رێكنەخستووە بەتەواوی.

وتیشی "لەكتێبەكەدا ئەم بابەتە دابەش دەكەین بەسەر سێ‌ دەروازەدا، ئەوانیش باسی (ناكۆكی یاساكان، ناكۆكی تایبەتمەندی دادوەری نێودەوڵەتی، چۆنییەتی جێبەجێكردنی حكومەكانی دادگا بیانیەكان لە عێراق) دەكەین". د. محەمەد جەلال كێیە؟ د. محەمەد جەلال حەسەن، پڕۆفیسۆر لە یاسای نێودەوڵەتی تایبەت لە كۆلێژی یاسای زانكۆی سلێمانی، زیاتر لە پێنج كتێبی چاپكراوی هەیە كە دووانیان كراوەتە پڕۆگرامی خوێندنی خوێندكارانی قۆناغی چوارەمی كۆلێژی یاسا لە زانكۆكان، هەروەها تا ئێستا 18 توێژینەوەی زانستی ئاستبەرزی ئەنجامداوە.

ئەو پڕۆفیسۆرە لێهاتووەی زانكۆی سلێمانی چەندین خول و كۆنگرەی نێودەوڵەتی و ناوخۆیی لە بواری یاسادا بینیووە، بۆ ماوەی چەند ساڵێك سەرۆكی بەشی یاسا بووە لە كۆلێژی یاسای زانكۆی سلێمانی، جگەلەوەش جێگری سەرۆكی دەستەی گۆڤاری زانكۆی سلێمانییە.

د. محەمەد جەلال، دوو بڕوانامەی ماستەری لە بواری یاسا هەیە لەگەڵ دكتۆرا، هەروەها ئەندامی رێكخراوی عێراقییە بۆ چارەسەری كێشەكان و گفتوگۆكان، ئەمە جگەلەوەی سەرپەرشتی توێژینەوەی خوێندكارانی ماستەر و دكتۆرا دەكات لەگەڵ لیژنەكانی سەرۆكایەتی زانكۆی سلێمانی.

 

 





 2022-11-09
 619