سەرۆكی زانكۆ لەگەڵ راگرو سەرۆك بەشەكانی سەرجەم كۆلێجەكانی زانكۆ كۆبووەوە



سەرۆكی زانكۆ لەگەڵ راگرو سەرۆك بەشەكانی سەرجەم كۆلێجەكانی زانكۆ كۆبووەوە

 [email protected]

 ئەمڕۆ 17-11-2022، پرۆفیسۆر د. كۆسار محمد سەرۆكی زانكۆی سلێمانی و پرۆفیسۆر د. كاوە جەمال یاریدەدەری سەرۆكی زانكۆ بۆ كاروباری كارگێڕی و دارایی و پرۆفیسۆری یاریدەدەر د. پێشڕەو حەمەجان یاریدەدەری سەرۆكی زانكۆ بۆ كاروباروی خوێندكاران، لەگەڵ راگرو سەرۆك بەشەكانی سەرجەم كۆلێج و بەشەكانی زانكۆ سەبارەت دەستپێكردنەوەی دەوامی خوێندكاران، كۆبوونەوە.

سەرەتا سەرۆكی زانكۆی سلێمانی دەستخۆشی لە راگرو سەرۆك بەشەكانی كۆلێجەكانی زانكۆ كرد، بۆ هەوڵ و ماندوبوونیان كە لەماوەی رابردودا لە دەستپێكردنەوەی خوێندنی ساڵی نوێ و بەرێكردنی كارە ئیدارییەكانی كۆلێجەكان بە شێوەیەكی باش، پاشان سەرۆكی زانكۆ رایگەیاند: راگرتنی ئەو چەند رۆژەی دەوامی خوێندكاران لەلایەن ئەنجومەنی زانكۆوە بەهۆی خۆپیشاندانەكانی ئەمدواییەی خوێندكاران (ئیجباری)بوو ، تاكو ئاسایی بوونەوەی دۆخەكەو رێگری لە تێكدانی ئارامی شارو تێكچوونی پرۆسەی خوێندن.

سەرۆكی زانكۆی سلێمانی داواشی لە راگرو سەرۆك بەشەكان كرد كە لە نزیكەوە، لەگەڵ خویندكاراندا قسە بكەن و هەوڵی جددی بدەن كە لەسەرەتای هەفتەی داهاتووەوە دەوامی ئاسایی خوێندكاران، لەسەرجەم بەش و كۆلێجەكان دەستپێبكاتەوە.

وتیشی: داواكاری خوێندكاران بۆ پێدانی دەرماڵەو بە یاسایی كردنی داواكارییەكی رەوایە، بەڵام ئەو بابەتە لەدەسەڵاتی ئێمەدا نییە، بەڵكو لە دەسەڵاتی ئەنجومەنی وەزیراندایە، هەروەها بابەتی كەمكردنەوەی پارەی خوێندنی بارالێڵ تەنها لەدەسەڵاتی وەزارەتی خوێندنی باڵاو وەزارەتی داراییدایە.

 سەرۆكی زانكۆی سلێمانی راشیگەیاند: پێویستە راگری كۆلێج و سەرۆك بەشەكانی زانكۆ رۆڵی گرنگ بگێڕن بۆ ئەوەی هەفتەی داهاتوو، دەوامی خوێندكاران لەسەرجەم زانكۆ دەستپێبكرێتەوەو مامەڵەی یاسایی لەگەڵ ئەو خوێندكارانەشدا بكرێت كە پابەند نابن بە دەوامكردنەوە.

راشیگەیاند: وەك سەرۆكایەتی زانكۆی سلێمانی و ئەنجومەنی زانكۆ، لەسەر داواكاریی خوێندكاران و دەستپێكردنەوەی خوێندن لەسەرەتای هەفتەی داهاتووەوە، بە یاننامەكمان ئامادەكردووەو لەرێگەی راگەیاندنەكانەوە، بڵاودەكرێتەوە.

دواتر پرۆفیسۆری یاریدەدەر د. پێشڕەو حەمەجان یاریدەدەری سەرۆكی زانكۆ بۆ كاروباری خوێندكاران، رایگەیاند: بەشێكی زۆری كێشەی بەشە ناوخۆییەكان، چارەسەركراون لەدابینكردنی كارەباو ئاو و غاز و زۆر پێداویستی تر، كە دەتوانین بڵێین بارودۆخی بەشە ناوخۆییەكانی زانكۆی سلێمانی و خزمەتگوزاری خوێندكارانی زانكۆی سلێمانی، بەراورد بە زانكۆكانی تری هەرێمی كوردستان لە ئاستێكی زۆر باشدایە، وتیشی: زانكۆی سلێمانی تاكە زانكۆیە لەسەر ئاستی هەموو زانكۆكانی هەرێمی كوردستان كە بەشی ناوخۆیی بۆ خوێندكارانی پارالێڵ بەخۆرایی دابین كردوە، كە بە تەنها لە زانكۆی سلێمانی خوێندكاری پارالێڵ بەبێ بەرامبەر لەبەشە ناوخۆییەكان دەمێنێتەوە.

پاشان د. كاوە جەمال یاریدەدەری سەرۆكی زانكۆ بۆ كاروباری كارگێڕی و دارایی، رایگەیاند: یەكێك لە داواكارییەكانی خۆپیشاندانەكەی خوێندكاران، بابەتی مەنهەجی خوێندن و بەرزكردنەوەی ئاستی زانستی خوێندن بوو لە زانكۆ، ئێمە هەموومان دەزانین كە خودی زانكۆی سلێمانی بەردەوام لە هەوڵی باشكردنی مەنهەجی خوێندن و ئاستی زانستی مامۆستاكان و خودی زانكۆدایە، هەڵسەنگاندن و راپۆرتی دامەزراوە زانستییە نێودەوڵەتییە باوڕپێكراوەكان و دەزگا زانستییەكان شاهێدی ئەوەن كە ئاستی خوێندن و ئاستی مامۆستاكانی زانكۆی سلێمانی لە چی ئاستێتی باشدایە، هەوڵەكانیش بەردەوامن بۆ بەرزكردنەوەی ئاستی زانستی زانكۆ، لە هەموو رووەكانەوە.

دواتر دەرگای گفتوگۆو پێشنیارەكان بۆ راگرو سەرۆك بەشەكان كرایەوە، بۆ پێشنیارەكان و چۆنێتی دەستپێكردنەوەی دەوامی خوێندكاران لەسەرەتای هەفتەی داهاتووەوە.

 





 2022-11-17
 350