بەهەوڵی سەرۆكانی زانكۆی سلێمانی و زانكۆی پۆلیتەكنیك خوێندكارە دەستگیركراوەكانی زانكۆ ئازاد دەكرێن



بەهەوڵی سەرۆكانی زانكۆی سلێمانی و زانكۆی پۆلیتەكنیك خوێندكارە دەستگیركراوەكانی زانكۆ ئازاد دەكرێن

 [email protected]

 ئەمڕۆسێشەممە 22-11-2022، سەرۆكی هەردوو زانكۆی سلێمانی و زانكۆی پۆلیتەكنیكی سلێمانی یاریدەدەرانی سەرۆكی زانكۆو ژمارەیەك لەئەندامانی ئەنجومەنی زانكۆكان، سەردانی بەڕێوەبەرایەتی ئاسایشی سلێمانیان كردو لەلایەن بەرێوەبەری ئاسایشی سلێمانییەوە پێشوازیكران، ئامانج لەسەردانەكەش بەدواداچوون بوو بۆ كەیسی ئەو خوێندكارانەی دەستگیركراون و هەوڵدان بوو بۆ ئازادكردنیان. 
لەسەردانەكەدا سەرۆكی هەردوو زانكۆ بەپاڵپشتی بەڕێز قوباد تاڵەبانی جێگری سەرۆكی حكومەتی هەرێم، داوایان لە ئاسایشی سلێمانی كرد خوێندكارانی دەستگیركراو ئازادبكرێن، چونكە ئەو خوێندكارانە بەكەسوكاری خۆیان دەزانن و هەرئەوانیش خاوەنی داوای رەوای خوێندكارانن و نایانەوێت لەپرۆسەی خوێندن و زانست دوابكەون، لەبەرامبەریشدا بەسوپاسەوە جێگری سەرۆكی حكومەت پاڵپشتی تەواوی بۆ هەردوو سەرۆكی زانكۆی راگەیاندو لایەنە پەیوەندیدارەكانی راسپارد لەئەمڕۆوە بەپێی رێكارە یاساییەكان دەست بەئازادكردنی ئەو خوێندكارانە بكرێت. 
لەوتەیەكیشیاندا پرفیسۆر دكتۆر كۆسار محمد سەرۆكی زانكۆی سلێمانی و سەرۆكی زانكۆی پۆكیتەكنیكی سلێمانی پرۆقیسۆری یاریدەدەر دكتۆر هۆشیار عەبدوڵا عەزیز، بەناوی هەردوو زانكۆوە، سوپاسی وەزیری خوێندنی باڵاو توێژینەوەی زانستییان كرد، كە هەمیشە پشتیوانی داوای رەوای خوێندكاران بووەو لەو چوارچێوەیەشدا لەمانگی 7ی ئەمساڵەوە نوسراویان ئاڕاستەی ئەنجومەنی وەزیران كردووە بۆ دابینكردنی شایستە داراییەكانی خوێندكاران.
 لەدیداریشیاندا لەگەڵ هیوای شەهید ئەحمەدی صناعە بەڕێوەبەری ئاسایشی سلێمانی رایگەیاند، ئەوانیش ئەو خوێندكارانە بە كەسوكاری خۆیان دەزانن و مامەڵەیەكی زۆر یاساییان لەگەڵدا كراوەو بگرە لەبەرئەوەی خوێندكاری زانكۆو پەیمانگان جیاواز لەهەر بەندكراوێكی دیكە مامەڵەیان لەگەڵ كراوە. 
جێی ئاماژەیە بەپێی خشتەی ساڵنامەی زانكۆو پەیمانگاكان كە ساڵانە دیاری دەكرێت، پێویست دەكات خوێندكار پابەندی تەواوی بەكات و بەشداری وانەكانیەوە هەبێت و بە بەردەوامی چاودێری ئامادەبوونی خوێندكاردەكرێت و بۆ ئەو مەبەستەش لیژنەی پێویست لەزانكۆكان و وەزارەتی خوێندنی باڵاو توێژینەوەی زانستی و رێكخراوە نێوەدەوڵەتییەكان چاودێری پرۆسەكە دەكەن و لەهەر كەموكوڕییەكدا گرفتی گەورە بۆ پرۆسەی خوێندن و ئاستی زانستی زانكۆكان و خوێندكاران دروست دەبێت.




 2022-11-22
 295